ئەرێ خەونا مۆندیالێ بۆ ئیراقێ ب دووماهی هات؟
ئەڤرۆ، دۆڤچوون:
جەماوەرێ وەرزشی یێ هەلبژارتیێ ئیراقێ چاڤەڕێ نە بۆ ئەنجامدانا یارییەكا ڤەبر د پاشكۆیێ دەربازبوون بەر ب مۆندیالا جیهانی ئەوا بڕیارە ل 31ێ ڤێ مەهێ ل وەلاتێ مەكسیك بهێتە كرن، هەلبژارتیێ ئیراقێ دێ چاڤەڕێ سەركەڤتیێ یارییا دناڤبەرا هەلبژارتیێ بۆلیڤیا و سۆرینام بیت ئەوا یارییا وان ل 26ێ ڤێ مەهێ هێتە كرن.
كاودانێن دەڤەرێ ڕێگرن
ژبەر شەڕێ نوكە یێن د ناڤبەرا ئەمریكا-ئیسرائیل دژی ئیرانێ گەشتێن فروكەڤانی ل ئیراقێ و وەلاتێن دەورۆبەر هاتینە راوەستاندن كو ئەڤچەندە بوویە ڕێگر شاندێ هەلبژارتیێ ئیراقێ بهێتە دوورپێچكرن و نەشێت ددەمێ گۆنجایی دا گەشتا وەلاتێ مەكسیك بكەت كو بڕیار بوو دڤێ حەفتیێ دا بچیتە وەلاتێ مەكسیك بۆ دانانا كەمپەكی و بەرهەڤی بۆ یارییا ڤەبر، ژلایەكێ دووڤە پێشهاتەیێن وەلاتێ مەكسیك و سەرهلدانا كۆمێن شەركر وەكو مافیا ل وی وەلاتی زێدەبووینە.
كلیلكا هەوارهاتنێ د دەستێ فیفایێ دایە
ئێك ژ بەندێن یاسایی ئەوا پێشتر فدراسیۆنا فوتبۆلا جیهانێ فیفا هەیی بەندێ هەوارهاتنا نەچاری كو د ڕێنمایێن هەڤڕكیێن مۆندیالا 2026ێ دا هاتنە زێدەكرن ئەوژی سەرپەرشتێن بڕێڤەبرنا مۆندیالێ مافێ هەیی بڕیارێن نەچاری ل سەر كاودانەكێ تایبەت بدەن ئەوا د بەندێ شەشێ دا هاتییە، فیفایێ مافێ هەیی گوهۆڕینێ د جهـ و دەمێ یاریێ دا بكەت یان هەتا هەلوەشاندنا یاریێ بدەت هەكە هەست پێ هاتە كرن كو مەترسیا ئێمناهیێ، یان یا تەندروستی، یان لایەنەكی ژبەر ئەگەرەكێ لوجستی لێبۆرینێ بكەت.
ئیراق یا د مەترسیێ دا
ل دووڤ نڤێسارا فدراسیۆنا فوتبۆلا ئیراقێ بۆ فیفایێ هاتیە ژبەر نەبوونا گەشتێن فرۆكەڤانی و مانا ڕاهێنەرێ تیمێ گێرهام ئارنۆلد ل وەلاتێ ئیماراتێ هاتیە ڕاگرتی ژبەر هەمان ئەگەر كو نەشێت بەرهەڤیا بۆ تیما خوە بكەت، ژلایەكێ دووڤە ئیراقێ ترسا هەبوونا شەرێ نافخۆ ل مەكسیك هەیە، هەروەسان شاندێن دبلۆماسی و گرتنا بایلۆزخانەیێن وەلاتان ل ئیراقێ بوویە ئەگەر ڤیزا مەكسیك دەست ب شاندێ هەلبژارتیێ ئیراقێ نەكەڤیت و د مەترسیا نە پشكداریێ د پاشكۆ دا هەبیت، ژلایەكێ دووڤە پێشبینی دهێتە كرن ئەڤ شەڕی بۆ ماوەیێ چار هەتا پێنچ حەفتیان ڤەكێشیت.
ئینفانتینۆی ئیراقێ پشت راست دكەت
ژلایێ خوەڤە جیانی ئینفانتینۆ سەرۆكێ فدراسیۆنا فوتبۆلا جیهانێ شاندنێ هەلبژارتیێ ئیراقێ پشت راست دكەت كو دێ یاریێ ددەمێ خوە دا هێتە كرن ل 31ێ ئادارا، هەكە شەڕ ڤەكێشا دێ زووترین دەم بڕیارەكا دی هەبیت بۆ گەرەنییا ئەنجامدانا یاریێ و دۆپاتی ژ حوكمەتا مەكسیك وەرگرتییە كو ئەو بەرهەڤن بۆ یاریێ.
عەدنان درجال ڕژدە
ژلایێ خوەڤە عەدنان درجال سەرۆكێ فدراسیۆنا فوتبۆلا ئیراقێ دیاركر پەیوەندیێن وان دگەل فدراسیۆنێن ئاسیا و فیفا د بەردەوامن ژبۆ گەهشتن ب ئەنجامەكێ كو مافێ هەلبژارتیێ ئیراقێ ژی دناڤا پاشكۆیا مۆندیالێ دا بمینیت و گۆت: دو ئاستەنگێن مەزن د ڕێكا مەدانە و مە فیفا ئاگەهداركرییە، شەڕی نوكە یێ دەڤەرێ و ئالۆزی و شەڕێ نافخۆ یێ مەكسیك،فیفایێ گەشبینی دایەمە بۆ ئەنجامدانا یاریێ و ئەم ڕژدین بۆ كرنا یاریێ، لێ پاشەرۆژ دیار نینە و كاودان د خرابن لێ چاڤەرێ نە و دێ بەرهەڤبین
ئیراق و مۆندیال
هەكەر هەلبژارتیێ ئیراقێ د یارییا خوە یا ئێكلاكەر دا ب سەركەڤت ل سەر ئێك ژ هەلبژارتیێن دەربازبوویی بۆ پاشكۆیێ هەلبژارتیێن بۆلیڤیا یان سۆرینام ئەوا بڕیارە یارییا ئیراقێ ل 31ێ ڤێ مەهێ ل یاریگەها مۆنێری ل مەكسیك بهێتە كرن دێ بیتە جارا دویێ د دیرۆكا خوە هەلبژارتیێ ئیراقێ پشكداریێ د مۆندیالا جیهانی دا بكەت پشتی مۆندیالا 1986ێ، د وی دەمی دا ژ كۆما خوە سێ یاری كربوون و هەرسێ یارییان تووشی خوسارەتیێ بوو بەرانبەر هەلبژارتیێن باراگۆایی ب گۆلەكێ بەرانبەر بەلجیكا 2-1 و بەرانبەر مەكسیك ب گۆلەكێ ب سەرپەرشتییا ڕاهێنەرێ بەرازیلی ئیڤاریستۆ.
