دهۆك و هەولێرێ سەركەڤتنێن گرنگ ئینان و یارییا زاخۆ نەهاتەکرن
قەیس وەیس:
یاریێن حەفتییا 21ێ ژ هەڤڕكیێن خولا ستێرێن ئیراقێ یا فوتبۆلێ ب دووماهی هاتن ئەوا هەردو یانەیێن دهۆك و هەولێرێ شیاین سەركەڤتنێن گرنگ ل سەر دو یانەیێن ب هێز د خولێ دا بینن، ژلایێ خوەڤە یانەیا زاخۆ دڤێ گەڕێ دا یا چاڤەڕێ كری بوو و مفادارێ پێشچاڤ جەوییە بوو ئەوا سەرێ لیستێ پاراستی.
دو گۆلێن جوان و سێ خالێن زێرین
تیما یانەیا دهۆك د شەڤەكا ڕەمەزانی دا جەماوەرێ خوە ئاشتكر پشتی زنجیرەیا ئەنجامێن لاواز شیا سەركەڤتنەكا دراماتیكی ب دو گۆلێن جوان یێن جیهانی ل سەر مێڤانا خوە یانەیا شورتە یا بەغدایی بینیت و ئەنجام ب 2-1 ب سەركەڤتیانە ل سەر قارەمانا وەرزێ بۆری تۆماربكەت، دڤێ یاریێ دا یاریزانێن دهۆكێ ئاستەكێ جوان نیشان دا و پشتی بتنێ بۆرینا 11 خولەكا ستێرا تیمێ پیتەر گۆرگیس شیا گۆلەكا جوان ژ دەرڤەیی دەڤەرا پەنەلتیێ بینیت، ئەوا نیڤا ئێكێ ب پێشكەڤتنا دهۆكییان ب دووماهی هاتی
دنیڤا دویێ دا یانەیا شورتە بهێز هاتنە دناڤ یاریگەهێ دا و شیا د خولەكا 71ێ گۆلا وەكهەڤیێ ژلایێ پیشەكارێ خوە ئەتیبای بینن، لێ ئەلهۆیێن چیا نە ڕاوەستیان هەتا شیاین گۆلا دویێ ب مووشەكەكا دیر ژلایێ گەنجەكێ دی یێ دهۆكییان یوسف ئەلئیمام د خولەكا 86 دا بینن دەمێ ژ دەرڤەیی دەڤەرا پەنەلتیێ شیایی تەپا بهێز دانیتە گۆلا شورتە و یاریێ بەر ب سەركەڤتنەكا گرنگ و دیرۆكی ببەت.
عەبدولغەنی شەهەد: هێزا دهۆكییان دیاربوو
د كۆنگرەیێ رۆژنامەڤانی یێ پشتی یاریێ دا عەبدولغەنی شەهەد ڕاهێنەرێ تیما یانەیا دهۆكێ پیرۆزباهییا ل یاریزان، جەماوەری و كارگێرییا یانەیێ كر پشتی ڤێ سەركەڤتنێ و گۆت: د پرانییا یاریێن بۆری دا ئەم ژ هەژی سەركەڤتنان بووین و ژ هەژی خوسارەتی و وەكهەڤیان نەبووینە، لێ ئەڤە تەپاپێی دڤێت بەردەوام خوە پێشبێخین و هزر بۆ یارییا دووڤدا بكەین، دڤێ یاریێ دا مە سۆزدابوو ئەم باشتر ڤەگەرین و سەركەڤتنێ بینن، سۆپاس بۆ خودێ سۆزا مە بجهـ هات، كەسایەتییا تیما مە د یارییەكا وەكو ڤێ یا مەزن دا دیاربوو و شیان سێ خالێن ژ هەژی و گرنگ بینن كو دێ بیتە پالدەر بۆ یاریزانان بەردەوامیێ بدەنە ئاستێ باش و سەركەڤتنان.
ئەلهۆیێن چیا دو ڕێزان پێشڤە هات
بڤێ سەركەڤتنا گرنگ ئەلهۆیێن چیا شیان خالێن خوە یێن ڕێزبەندیێ ب گەهینە 30 خالان و دو ڕێزا پێشڤەبهێن ژ ڕێزا 11ێ پێشڤەهاتە ڕێزا نەهێ ژ ڤەڕێژا هەشت سەركەڤتن، پێنچ وەكهەڤی و هەشت خوسارەتییان، یاریزانێن ێ 25 گۆل تۆماركرینە و 21 گۆل ل سەر تیمێ هاتینە تۆماركرن
زاخۆییان یاری ئەنجام نەدابوو
هەرچەندە ل دووڤ لیستەیا گەڕا 21ی ژ خولێ بڕیاربوو تیما فوتبۆلا یانەیا زاخۆ یارییا خوە یا ڤێ حەفتیێ ل یاریگەها دهۆكێ بەرانبەر یانەیا مووسل بكەت، لێ ژبەر گیرۆبوونا وێ ددەمێ ڤەگەڕیانێ دا ژ وەلاتێ سعۆدیێ ب ئەگەرێ نەبوونا گەشتێن ئاسمانی كوپ ێشتری حەفتیەكێ چبوو سعۆدیێ ژبۆ ئەنجامدانا یارییا خوە ژ كۆپا كەنداڤی بەرانبەر یانەیا ئەلشەباب یا سعۆدیێ د قووناغا چارێ دووماهیێ دا، لێ فدراسیۆنا كەنداڤی بڕیاردا بهێتە پاشئێخستن ژبەر كاودانێن دەڤەرا رۆژهەلات یێن شەڕێ نوكە ئەمریكا-ئیسرائیل و ئیرانێ و سعۆدیێ گەشتێن ئاسمانی ڕاوەستاندن بوو ئەگەر كارتیكرنێ ل سەردەمێ ڤەگەڕیانا شاندێ یانەیا زاخۆ كرن و فدراسیۆنا فوتبۆلا ئیراقێ نەچاربوو یاریا وێ دگەل مووسل بهێتە پاشئێخستن.
كوڕێن خابووری ل رێزا حەفتێ دهێن
سەرباری پاشئێخستنا یارییا وێ یا ڤێ حەفتیێ تیما زاخۆ پاشڤەچوو ڕێزا حەفتێ ب كۆمكرنا 36 خالان ژ ڤەڕێژا 10 سەركەڤتنان، شەش وەكهەڤیی و چار خوسارەتی هەنە، یاریزانێن وێ 28 گۆل تۆماركرینە د بەرانبەر دا 15 گۆل ل سەر تیما وان هاتینە تۆماركرن
هەولێر ڤەگەڕیا سەركەڤتنان
ژلایەكێ دووڤە یانەیا پایتەختێ كوردستانێ تیما فوتبۆلا یانەیا هەولێر ژ باژێرێ ڕومادی ب سێ خالێن گرنگ ڤەگەریا پشتی شیایی سەركەڤتنەكا گرنگ ل سەر خودانێن ئەردی یانەیا ئەلگەرمە بینن ب 3-2 گۆلان، هەرسێ گۆلێن كەلهە ومنارە ژلایێ هەر ئێك ژ پێشەكارێن وێ شیرۆزد تیمیرۆف د خولەكا 35 و كریستۆڤەر جۆن خولەكا 51 و عەلی شاخەوان دخولەكا 83 دا تۆماركرن، هەردو گۆلێن ئەلگەرمە ژلایێ یاریزانێ وێ ئەیمەن حسێنی د خولەكێن 17 و69 ئینان.
زەورایێ سەركەڤتنێن نەورۆزێ ڕاوەستاندن
پشتی دو سەركەڤتنێن ل دووڤ ئێك د خولێ دا بەرانبەر نەجەف و دهۆكێ، یانەیا نەورۆز تووشی خوسارەتیێ بوو بەرانبەر یانەیا زەورا دناڤ ئەرد و جەماوەرێ خوە دا، ئەڤی ئەنجامی كارتیكرن ل سەر ڕێزبەندیا نەورۆزێ نە كر ئەوا مانا خوە ل ڕێزا 12ێ پاراستی ب 25 خالان ژ هەشت سەركەڤتن، ئێك وەكهەڤی و 12 خوسارەتی هەنە، یاریزانێن وێ 24 گۆل تۆماركرینە لێ ڕێژەیا هەرە مەزن یا گۆلان ل سەر هاتیە تۆماركرن كو 29 گۆلن.
ژ ئەنجامێن یاریێن دی یێن ڤێ گەڕێ
نەجەف چنە-1 مینا
نەفت میسان 2-1 ئەمانەت بەغدا
تەلەبە 2-چنە ئەلقاسم
ئەلغراف 1-2 جەوییە.
نەفت چنە- 1 كەرخ.
دیالا چنە-2 كارەبا.
هەلوەستێ گشتی یێ پشتی یاریێن گەڕا 21ێ بڤی شێوەیی نە
1- جەوییە 49 خال.
2- شورتە 44 خال كێمترییا یارییەكێ
3- تەلەبە 40 خال.
4- هەولێر 40 خال كێمترییا یارییەكێ.
5- ئەلگەرمە 38 خال.
6- كەرخ 37 خال.
7- زاخۆ 36 خال كێمترییا یارییەكێ.
8- زەورا 35 خال كێمترییا یارییەكێ.
9- دهۆك 30 خال.
10- ئەلغراف 29 خال.
11- دیالا 28 خال كێمترییا یارییەكێ.
12- نەورۆز 25 خال.
13- نەفت 24 خال كێمترییا یارییەكێ.
14- مینا 24 خال.
15- مووسل 23 خال كێمترییا یارییەكێ
16- كارەبا 21 خال.
17- ئەمانەت بەغدا 20 خال كێمترییا یارییەكێ.
18- نەفت میسان 19 خال.
19- نەجەف هەشت خال.
20- ئەلقاسم دو خال.
یاریێن گەڕا 22ێ دێ بڤی شێوەیی بن.
ل دووڤ خشتەیێ هاتیە بەلاڤكرن كو بڕیارە یاریێن گەڕا 22ێ یێن خولا ستێرێن ئیراقێ بڤی شێوەیی بن.
پێنچ شەمبی 12-3- 2026
ئەمانەت بەغدا- نەورۆز ل دەمژمێر نەهی شەڤ.
كارەبا- تەلەبە، دەمژمێر نەهی شەڤ.
ئەلگەرمە- ئەلغراف، دەمژمێر 11:15 شەڤ.
مووسل- شورتە، ل دەمژمێر 11:15 شەڤ.
رۆژا ئەینی 13-3- 2026
دیالا- جەوییە، ل دەمژمێر نەهی شەڤ.
نەفت- نەجەف، ل دەمژمێر نەهی شەڤ.
هەولێر- مینا، ل دەمژمێر 11:15 شەڤ.
زەورا- نەفت میسان، دەمژمێر 11:15 شەڤ.
رۆژا شەمبی 14-3-2026
كەرخ- دهۆك، ل دەمژمێر 9:30 شەڤ.
ئەلقاسم- زاخۆ، ل دەمژمێر 9:30 شەڤ.
سوبەهی
یانەیێن پشكدار دێ كۆمبن
ل دووڤ ژێدەرێن رۆژنامەڤانی بڕیارە سوبەهی ب شێوەیی ئۆنلاین هەر 20 یانەیێن پشكدار د خولا ستێرێن ئیراقێ دا دگەل لژنەیا بەریكانەیان ل فدراسیۆنا فوتبۆلا ئیراقێ كۆمبوونەكێ بكەن ل دووڤ دووماهی پێشهاتەیێن كاودانێن د نوكە دا ل سەر دەرڤەرێ داهاتین و كارتیكرنا وێ ل سەر ئەنجامدانا یاریێن خولێ، دێ بۆچوونێن جودا هێنە وەرگرتن ژبۆ بەردەوامییا خولێ یان ڕاوەستیان یان دانانا میكالیزمەكی بۆ شێوازێ بڕێڤەبرنا خولێ، دبیت هەر سوبەهی بڕیار بهێتە دان یان ژی د كۆمبوونەكا دی دا یا تایبەت یا فدراسیۆنێ دگەل لایەنێن بەرپرسێن ئیراقی بڕیارەكا ئێكلا كەر بدەن.
