سەهیم عومەر خەلیفە: فلمێن من زێدەتری 100 خەلاتێن نێڤدەولەتی ب دەستخوەڤە ئیناینە
زاخۆ، دلۆڤان هالۆ:
دەرهێنەرێ کورد یێ ئیدارەیا سەربخوە یا زاخۆ سەهیم عومەر خەلیفە د دیدارەکێ دا بۆ ڕۆژناما ئەڤرۆ دیارکر کو ل سالا 1980 ل باژێڕێ زاخۆ ژ دایك بوویمە، و ل سالا 2001 بەرەڤ وەلاتێ بەلچیکا چوویمە، من باوەرناما ماستەرێ د بیاڤێ بەرهەمئینانا فلمان دا هەیە، و ب ڕێکا فلمێن خوە یێن درێژ یێن سینەمایی و چەندین کورتە فلم و بەلگە فلمان من شیایە زێدەتری 100 خەلاتێن ڤیستەڤالێن نێڤدەولەتی یێن فلمان ب دەستخوەڤە بینم.
ناڤهاتی ئاماژە ب وێ چەندێ ژی کر کو ئێکەم فلمێ من یێ درێژ بناڤێ زاگرۆس خەلاتێ باشترین فلم ل ٤٤ـەمین خۆلا ڤیستەڤالا نێڤدەولەتی یا گێنت ل وەلاتێ بەلچیکا ب دەستخوەڤە ئینایە، ئەڤ فلمە بەحس ل چیرۆکا شڤانەکێ کورد بناڤێ زاگرۆس دکەت کو گەلەك حەز ژ هەڤژینا خوە دکەت و ل دووڤ خێزانا خوە دچیتە وەلاتێ بەلچیکا».
گۆت ژی:»فلمێ من یێ بناڤێ مێسی بەغدا شیایە سێ خەلاتێن سەرەکی وەکو باشترین فلم و باشترین دەرهێنەر و باشترین سیناریۆ ل بیست و شەشەمین ڤیستەڤالا نێڤدەولەتی یا فلمێن ئارپا هۆلیود ل ئەمریکا بدەستخوەڤە بینیت، و خەلاتێ باشترین ئەکتەرێ سەرەکی یێ بناڤێ ئەحمەد محەمەد ل 10 هەمین ڤیستەڤالا نێڤدەولەتی یا دهۆك بدەستخوەڤە بینیت، زێدەباری ب دەستڤەئینانا خەلاتێ ڤیستەڤالا شلینگێل یا نێڤدەولەتی یا فلمان ل وەلاتێ ئەلمانیا، و بابەتێ ڤی فلمی ل دوور یاریا تەپاپێ یە ل دەمێ شەری».
زێدەتر ژی گۆت:»بەلگە فلمێ من یێ کوردی یێ بناڤێ جوانیا ڤەشارتی یا ئیراقێ ل دەهەمین ڤیستەڤالا نێڤدەولەتی یا دهۆك یا فلمان خەلاتێ باشترین بەلگە فلم ب دەستخوەڤە ئینا و ل سینەمایێن وەلاتێ بەریتانیا دهێتە نیشاندان، کو ئەڤ بەلگە فلمە بەحس ل چیرۆکا وێنەگرێ ئیراقی لەتیف عانی دکەت، هەر دیسان فلمێن من یێن دی ژی وەکو نێچیرڤانێ خراب و وەلاتێ قەهرەمانان و نان ژی چەندین خەلاتێن ڤیستەڤالێن نێڤدەولەتی یێن فلمان ب دەستخوەڤە ئیناینە».
