بەغدا و هەولێر ل سەر ئێكخستنا رێكارێن گومرگی رێككەفتن
جێگرێ سەرۆكوەزیرێن ئیراقێ و شاندەكێ بلندێ حوكمەتا هەرێما كوردستانێ ل سەر ئێكخستنا سیاسەتا گومرگی و بجهئینانا سیستەمێ ئەلكترۆنی ل دەروازەیێن سنۆری رێككەفتن، هەڤدەم بڕیار دان رێڤەبرنا گومرگێن هەرێما كوردستانێ ب شێوەیەكێ هەڤپشك بیت.
رۆژا دوشەمبی، 6/4/2026 فوئاد حوسێن، جێگرێ سەرۆكوەزیران و وەزیرێ دەرڤە یێ ئیراقێ، سەرپەرشتییا كۆمبوونا 13 یا جڤاتا وەزاری یا ئابووری یێ وەلاتی كر. د ڤێ كۆمبوونێ دا شاندەكێ بلندێ حوكمەتا هەرێما كوردستانێ ئامادە بوون.
ب گۆرەی راگەهاندنا كۆمبوونێ، مێهڤانكرنا شاندێ هەرێما كوردستانێ بۆ گەنگەشەكرنێ بوو ل سەر ئێكخستنا رێكارێن گومرگی ل دەروازەیێن سنۆری.
شاندێ هەرێما كوردستانێ پێكهاتبوو ژ سكرتێرێ جڤاتا وەزیران، سەرۆكێ دیوانا جڤاتا وەزیران، سەرۆكێ نوونەرایەتییا حوكمەتا هەرێما كوردستانێ ل بەغدا، شیرەتكارێ وەزارەتا دارایی، رێڤەبەرێ گشتی یێ گومرگی، رێڤەبەرێ گشتی یێ دووڤچوون و هەماهەنگیێ، ل گەل سەرۆكێن ژوورێن بازرگانی یێن هەولێر، سلێمانی، دهۆك و هەلەبجە.
جڤاتێ ئاماژە ب هندێ كر كو ل سەر ئێكخستنا سیاسەتا گومرگی د ناڤبەرا ئیراقێ و هەرێما كوردستانێ دا رێككەفتینە، ب تایبەتی د بوارێ پێناسەیا گومرگی و پاراستنا بەرهەمێ ناڤخۆیی دا. هەروەسا بڕیار هاتە دان سیستەمێ «ئەسیكوودا» ل دەروازەیێن هەرێما كوردستانێ بهێتە بجهئینان، ب مەرجەكی داڕشتنا سیاسەتا گومرگی ئەركێ حوكمەتا فیدرالی بیت و رێڤەبرنا گومركان ژی ب شێوەیەكێ هەڤپشك بیت ل گەل حوكمەتا هەرێما كوردستانێ.
بۆ ڤێ مەبەسێ بڕیار هاتە دان شاندەكێ تەكنیكی یێ رێڤەبەرییا گشتی یا گومرگی ل هەرێما كوردستانێ ل گەل تیمەكا نیشتمانی یا وەزارەتا دارایی یا ئیراقێ كۆمببن بۆ گەنگەشەكرنێ ل سەر میكانیزمێن ئێكخستنا رێكاران ب بەرچاڤوەرگرتنا تایبەتمەندی و یاسایێن كارپێكری ل هەرێما كوردستانێ. بڕیارە د چەند رۆژێن كێم دا هەردوو تیم راپۆرتەكێ بدەنە جڤاتا ئابووری بۆ دەركرنا بڕیارا پێدڤی.
فوئاد حوسێن، جێگرێ سەرۆكوەزیرێن ئیراقێ، د كۆمبوونێ دا راگەهاند كو ئیراق ژ بەر بارودۆخێ شەڕی ل دەڤەرێ روو ب روویێ تەنگاڤییێن ئەمنی و ئابووری بوویە، لەوما ئێكخستنا بزاڤان گەلەك یا پێدڤییە.د
د هەمبەر دا، سكرتێرێ جڤاتا وەزیران یێ هەرێما كوردستانێ ئاماژە ب هندێ كر كو حوكمەتا هەرێما كوردستانێ پشتەڤانییا هەر بزاڤەكا حوكمەتا فیدرالی دكەت بۆ ئەلكترۆنیكردنا رێكارێن گومرگی، ئەڤ چەندە دێ زەلالیێ پتر لێ كەت و داهاتێ گشتی بلند كەت.
د دووماهییا بەیاننامەیێ دا هاتییە كو جڤاتا ئابووری بڕیار دا دەروازەیێ سنۆری یێ ترێبیل وەك دەروازەیەكێ فەرمی بۆ هاوردەكرنا زێری بهێتە دیاركرن، هەتا كو قەدەغەیا ئاسمانی ژ بەر ئۆپەراسیۆنێن سەربازی ل سەر وەلاتی دهێتە هەلگرتن.
