بۆ كـوردێن رۆژهـەلات چ هەیە؟
سەرجان مەحموود
ئەمریكا و ئیرانێ پشتی شەڕێ چل رۆژان بریار دان بێهنڤەدانەكێ بدەن ب (ئاگربەستەكێ). بێهنڤەدان بۆ دو حەفتیانە، لێ دانوستاندنێن ل پاكستانێ دێ پاشەرۆژا شەڕی و درێژبوون یان ژی كورتبوونا بێهنڤەدانێ دیار كەت. ئارمانجا ئەمریكا ژ ڤێ ئێكێ بۆ چارەسەریا رێیا وزێ و پەترۆلێ یە. ژ ئەنجاما فشارێن كۆمپانیێن مەزن یێن جیهانێ.
دۆنالد ترامپ رازی بوویە ئاگربەستا 14 رۆژی قەبوول بكەت. د ڤان چاردە رۆژان دا ترامپ نەچارە یان ئەگەرەكێ بۆ درێژەدانا ب شەڕێ ئیرانێ ببینیت یان ژی ئەگەرەكێ بۆ ب دووماهیئینانا شەڕی و سەرخستنا ئەمریكایێ پەیدا بكەت.
ئەم وەرن سەر رەوشا كوردێن رۆژهەلاتێ كوردستانێ؛ پارتێن رۆژهەلاتێ كوردستانێ هەر چەندە هەڤپەیمانیەكا سیاسی راگەهاندن، لێ ب كریاری هەتا نها ژی نەبوونە خوەدانێ یەك گۆتارا سیاسی و هەڤپەیمانیا خوە ل سەر ئەردێ، د ناڤا جڤاكێ و د وارێ سەربازی و دبلۆماسیێ دا نەشیاینە ببنە ئێك و پێكڤە كار بكەن، ئەوا هەتا نها مە دیتی تنێ چەند جاران داخۆیانی ب ناڤێ هەڤپەیمانیێ هاتیە دان. ژ بەر ڤان ئەگەران دەمێ دۆنالد ترامپ كورد ب وەرگرتنا چەك و پارەیێ تۆمەتبار كر، هەڤپەیمانیا رۆژهەلاتێ كوردستانێ ماتمای ما و هەر پارتەك كەتە هەولدانا پاراستنا خوە. د راستی دا ئەمریكا چ پارەیەك نەدایە پارتێن كورد ل رۆژهەلات و چ چەك ژی بۆ كوردێن ئیرانێ نەشاندیە، لێ هەم ل واشنتۆنێ و هەم ژی ل كوردستانێ بەحسێ چیرۆكەك وەسا دهێتە كرن كو ژ راستیێ دوورە. ژ خوە پشتی كو (رۆسیا) و پنتاگۆنێ ل گەل كۆچكا سپی ئاخڤین ترامپ پەیاما خوە گوهۆڕی و دەست ژ تۆمەتباركرنا كوردان بەردا.
هەكە بێهنڤەدانا 14 رۆژی یا د ناڤبەرا ئەمریكا و ئیرانێ دا ب دووماهی بهێت و قووناغا دویەم یا شەری دەستپێ بكەت دێ ئەگەرێ كو دۆنالد ترامپ پارتێن كوردی تۆمەتبار كر ژی زەلال بیت. د رەوشا نها دا كو ئاگربەستەكا 14 رۆژی هەیە دڤێت پارتێن كوردی ئانكۆ هەڤپەیمانیا رۆژهەلات، داخوازەكا یەكگرتی، سیاسەتەكا یەكگرتی، نەخشەیەكا گونجای و بزاڤەكا بەرفرەه یا دبلۆماسیێ بۆ بدەستخستنا مافێن كوردان بمەشینیت. بەری هەر تشتی لیژنەیێن دبلۆماسیێ، سیاسەتێ، ئابووریێ، سەربازی و جڤاكی دروست بكەن دا كو د قووناغا دویەم دا د ئامادەباشیەكا تەمام دا بن و بشێن ب رەنگەكێ راست و دروست پێشوازیێ ل پێشهاتان بكەن.
هەكە قووناغا دویەم یا شەڕێ د ناڤبەرا ئیرانێ و ئەمریكایێ ڤەگەریا دانوستاندنان ژی دڤێت پارتێن رۆژهەلات ل سەرانسەرێ جیهانێ بزاڤێن خوە یێن دبلۆماسیێ و یا ل سەر ئەردێ بەرفرەهتر بكەن. ئانكو دڤێت كوردێن رۆژهەلات بۆ هەردو سیناریۆیێن شەڕ و دانوستاندنان بەرهەڤ بن، هەكە نە رۆژێن دژوار دێ چاڤەرێی كوردان ل رۆژهەلاتێ كوردستانێ و ئیرانێ بن، چونكی هەكە ئیران بهێز كەڤیت یان ژی بشێت ب زیانەكا بچووك خوە قورتال بكەت دێ فشارێن ل سەر كوردان زێدەتر لێ هێن، دڤێت كورد ل رۆژهەلاتێ كوردستانێ بشێن ب سیاسەتەكا راست و دروست پشتەڤانیەكا باش د ئاستێ جیهانی دا بدەستڤە بینن، ژ بۆ ڤێ ئێكێ ژی گرنگە هێزێن كوردی مفایێ ژ رەوشا نها یا سیاسی وەربگرن و هەروەسا دڤێت وانەیان ل پێشهاتێن سیاسی یێن ل پارچەیێن دی یێن كوردستانێ ژی وەربگرن و ل گۆر راستیا نها یا سیاسی ل جیهانێ دا سیاسەتەكا راست بۆ بەرژەوەندیێن كوردان برێڤە ببەن، هەكە كورد ل رۆژهەلات تشتەك وەسا بكەن بێگومان دێ شێن سەركەفتی بن و دێ گەلەك وەلات ژی پشتەڤانیێ ل كوردان كەن.
