سوهەیب عەلی: یارییا ئەڤرۆ كلیلكا دەربازبوونێ یە بۆ پلا دویێ یا ئیراقێ
رەمەزان زەكەریا:
د داخۆیانیەكێ دا پەیڤدارێ یانەیا ئاكرێ ئاشكرا كر تیما وان یا فوتبۆلێ د قووناغەكا ئێكلاكەر و هەستیار دایە ژبۆ دەربازبوون بەر ب خولا پلا ئێك، ئەوا بڕیارە ئەڤرۆ ل دەمژمێر چارێ ئێڤاری یانەیا ئارارات مێڤان كەت ژ چارچووڤەیێ كۆما ئێكێ یا گەڕا شەشێ یا خولا پلا دو یا ئیراقێ.
زێدەتر سوهەیب عەلی بۆ رۆژناما ئەڤرۆ گۆت: یارییا ئەڤرۆ بۆ مە گەلەك گرنگە و سەركەڤتن دێ بیتە كلیلكا دەربازبوونێ بەر ب پلا دو یا ئیراقێ، هەموو یاریزان د بەرهەڤن و ڕژدن بۆ سەركەڤتنێ و چاڤەڕێ هاتنا جەماوەرێ خوەینە ژبۆ پشتەڤانیێ، ژبەر گرنگییا یاریێ و دەستڤە ئینانا خالێن وێ هەروەكو یارییا فینالێ یە بۆ مە، هەموو یاریزان بەرهەڤن بێ هنگاڤتن و دووركەڤتن و ڕاهێنەر ژی كار ل سەر ڤێ یاریێ كرییە بۆ دانانا پلانێن سەركەڤتنێ.
ناڤهاتی گۆت: كارگێریا یانەیێ ب ژڤانە پشتی ب دووماهی هاتنا خولا پلا سێ یا ئیراقێ هەموو دەستەیا ڕاهێنەران و كادر و یاریزانان خەلات بكەت وەكۆ ڕێزگرتنەك بۆ ماندووبوونا وان هەرچەندە هەتا نوكە نزانن كا خەلاتێن فەرمی یێن فدراسیۆنا فوتبۆلا ئیراقێ چ بن.
بۆ زانین تیما یانەیا ئاكرێ ل سەرێ لیستێ دهێت ب كۆمكرنا 15 خالان، ژ پێنچ سەركەڤتنان و هیچ وەكهەڤی و خوسارەتی نینن، یانەیا شەهرەبان ل ڕێزا دویێ دهێت ب نەهـ خالان، یانەیا ئارارات ئەوا ئەڤرۆ مێڤانا ئاكرێ یە ب سێ خالان ڕێزا حەفتێ دهێت، ل دووڤ سیستەمێ هاتییە دانان 18 یانە پشكدارن د خولا پلا سێ دا، هاتینە بەلاڤكرن ل سەر دو كۆمان، هەر كۆمەكێ نەهـ یانە پشكدارن، سەركەڤتیێن ئێكێ ئێكسەر دێ دەربازبنە پلا دو، سەركەڤتیێن دویێ یێن هەر كۆمەكێ دێ یارییەكا ڤەبر كەن بۆ پلێتا سێیێ یا دەربازبوونێ و دبیت هەردو یانە ژی دەربازبن.
