ئەڤرۆ سێمێل د 45 خولەكان دا دێ یارییەكا دیرۆكی ئەنجامدەت
قەیس وەیس:
چاڤەڕێ دهێتە كرن ئەڤرۆ ل دەمژمێر سێیێ ئێڤاری تیما یانەیا سێمێل دێ ل یاریگەها پیشەسازی ل هەولێرا پایتەخت ب تنێ بۆ ماوەیێ 45 خولەكان یارییەكا چارەنڤیس و دیرۆكی بەرانبەر یانەیا خاك بكەت.
پەروەر حسێن ئەندامێ كارگێرییا یانەیا سێمێلێ و سەرپەرشتێ تیمێ بۆ رۆژنامەیا ئەڤرۆ گۆت: ژبەركو ئەڤ یارییە ئەوا ژ گەڕا 14ێ ب دووماهی نە هاتبوو ب تنێ ئێك نیڤ هاتبوو كرن، ئەم شیابووین نیڤا ئێكێ ب گۆلەكێ پێشكەڤتن ب دووماهی بینین، د بهێنڤەدانا هەردو نیڤان دا ڕاهێنەرێ خاك هێرش كرە ل سەر دادڤانێ یاریێ بوو ئەگەر دادڤان یاریێ ب دووماهی بینت و نیڤا دویێ تمام نەكەت، د دەمەكی دا ئەم چاڤەڕێ بووین تیما خاك ژبەر ئەوێ توندوتیژیێ ب خوسارەت بهێتە هژمارتن لێ ب مخابنی ڤە فدراسیۆنا فوتبۆلێ بڕیار دا ب تمامكرنا یاریێ.
هەروەسان ناڤهاتی گۆت: ل دووڤ بڕیارا فدراسیۆنا فوتبۆلا كوردستانێ ئەم دێ ئەڤرۆ یارییا خوە بتنێ نیڤا دویێ كەین و ئەنجامێ ئێك ب چنە دێ بەردەوامبیت دگەل ئەوان یاریزانێن دلیستێ دا ناچێبت گوهۆڕینێ تێدا بكەن، هەرچەوابیت مە باوەری ب تیما خوە هەیە دێ ئەنجامێ خوە پارێزیت و پتر گۆلەكێ ژی كەین، ئەڤ یارییە بۆ مە دیرۆكی یە و گرنگە سەركەڤتن ئانكو دێ دەربازبوونا مە بۆ پلا نایابا كوردستانێ مسۆگەر كەت، لەوما ژی گرنگییەكا تایبەت مە دایە ڤێ یاریێ.
بۆ زانین تیما یانەیا سێمێل ل رێزا چارێ دهێت ب كۆمكرنا 24 خالان ژ شەش سەركەڤتن، شەش وەكهەڤی و دو خوسارەتیان، هەردو یانەیێن شەقلاوە ب34 خالان، بابان ب31 خالان رێزێن ئێكێ و دویێ هاتینە و ب فەرمی دەربازبووینە پلا نایابا كوردستانێ، هەر ئێك ژ یانەێن دهۆك 24 خالان رێزا سێیێ، زانكۆیا جیهان 23 خالان و بەردەرەش تا رادەیەكی ب 21 خالان دگەل یانەیا سێمێل هەڤڕكن بۆ دو پلێتێن مایی یێن دجەربازبوونێ.
