شێوهكارهكێ كورد دبیته هونهرمهندهكێ دلخواز ل دهف خهلكێ ئهلمانیا
ئەڤرۆ، زنار تۆڤی:
شێوهكار رهنج حهیدهر، د ژییێ 32 سالیێ دایه، ل سلێمانیێ ژ دایكبوویه و ژ سالا 1996 وهره دگهل خێزانا خوە چوویه ئهلمانیا و ل وێرێ مهزن بوویه، ل ئهلمانیا دیزاینا پهیوهندیان خواندیه و بسپۆری د وارێ ڤیدیۆگرافی و فۆتۆگرافیدا وهرگرتیه، پشتی تمامكرنا زانكۆیێ، ههستپێكریه كو پتر حهز ل سهر كارێ دهستی و كێشانا كهڤالان د ستۆدیۆیا خوە دا ههیه، نهك كاركرن ل سهر كۆمپیوتهری، دهستپێكرنا وی ب كێشانا كهڤالێ ئێكێ وهلێكریه كو مهژیێ وی ئارام ببیت، چونكی بهری هنگێ د بن فشارێن خیزانا خوە دا بوو داكو كارهكی وهكو ئهندازیاری یان نۆشداری ههلبژێریت، بهلێ وی دڤیا رێیا خوە ببینیت.
ناڤهاتی گۆت: كوردان گهلهك هونهرمهندێن خودان بههره ههنه، بهلێ وهكو پێدڤی رێز ل كارێن وان ناهێته گرتن، ههروهسا بهری دوو سالان، من سهرهدانا سلیمانیێ كریه و ستۆدیۆیهك ل كارگهها كلتوور (كارگهها جگارێن جاران) گرتیه ب نیهتا دهستپێكرنا پرۆژهكێ هونهری، بهلێ ژبهر نهخۆشیێ نهچار بوویمە بزڤرمە ئهلمانیا، ل گهل هندێ ژی، هێشتا من پلان ههیه بزڤرمه سلیمانیێ و بۆ دهمهكی ل وێرێ كار بكهم، ب هیڤییا وێ چهندێ كو نێزیكی وهلاتێ خوە و سروشتێ وی بم، كو ئهڤ چهنده كاریگهریێ ل سهر ستایلێ من یێ هونهری بكهت.
رهنج حهیدهر دبێژیت ژی: خێزانا وان خێزانهكا هونهریه، ئهو و ههڤژینا خوە، میلیسا، دهمێ شهش سالانه پێكڤهنه و خودان دو زارۆكێن كورن، ههروهسا ههموو ئهندامێن خێزانا وی حهز ژ وێنهكیشانێ دكهن و گهلهك جاران زارۆكێن خۆ ژی دبهته ستۆدیۆیێ داكو پێكڤه وێنهیان بكێشن، رهنجێ شێوهكار بهحسێ ستایلێ خۆ یێ هونهری دكهت كو تێكهلیهكه ژ رهنگكرنا نه رێك و پاشی دیاركرنا سیمایان د ناڤ رهنگان دا.
دهربارهیی ناڤێ ستۆدیۆیا وی ل باژێرێ بۆخوم ل ئهلمانیا ب ناڤێ «رهنگ» دیار كر: دهمێ ئهز هاتیمه ئهلمانیا، دایك و بابێن من ب شاشیڤه ناڤێ من ب «رهنگ» تۆمار كربوو، بهلێ نوكه ئهو ناڤه بوویه پشكهكا ڤهنهقهتیایی ژ ژیان و كارێ من یێ هونهری، ههروهسا ستۆدیۆیا من ل جههكێ كهڤنه كو بهری هنگێ وهكو كۆگهها شهمهندهفهران دهاته بكارئینان، ههروهسا ستۆدیۆیا من ب تنێ جههك نینه بۆ نیشاندان و فرۆتنا كهڤالان، بهلكو جههكه بۆ فێركرنا خهلكی، ههموو رۆژێن ئهینی و شهمبییان وۆركشۆپان سازدكهت كو تێدا پشكداربوویی د ماوێ سێ دهمژمێران دا دشێن كهڤالهكی چێكهن و دگهل خۆ ببهنه مال.
رهنج حهیدهری ئاشكراكر ژی: پرۆسا چێكرنا كهڤالان پێدڤی ب پلانهكا پێشوهخت نینه، بهلكو خۆشیا وی د هندێ دایه كو ب شێوهكی عهفهوی دهست ب كاری بكهت، ب تنێ ب ههلبژارتنا رهنگ و ئامرازێن گونجایی، ههروهسا بهحسێ بنهمایێن تێكههلكرنا رهنگان دكهت، بۆ نموونه چهوا رهنگێ شین و زهر پێكڤه رهنگێ كهسك چێدكهن، ههر چهنده پیدڤی ناكهت، ههموو رهنگ ب تمامی بهێنه تێكههلكرن، بهلكو دشێن ب تنێ ل تهنشت ئێك بهێنه دانان بۆ چێكرنا كاریگهریێن جودا.
