چین مەزنترین کەشتییا بارهەلگر یا کارەبایی ل جیهانێ ڕادگەهینیت
بهرههڤكرن: نیوار باشووری
د پێنگاڤەکا دیرۆکی دا بۆ کەرتێ ڤەگوهستنا دەریایی، وەلاتێ چینێ مەزنترین کەشتییا ڤەگوهستنا کانتینەران ل جیهانێ ئێخستە کار کو ب تەمامی ب وزەیا کارەبێ کار دکەت. ئەڤ کەشتییە کو ب ناڤێ «نینگیوان دیانکون» (Ningyuan Diankun) دهێتە نیاسین، بێی بکارئینانا چ دلوپێن سوتەمەنیێ، ئێکەم گەشتنا خۆ یا تاقیکاری ب سەرکەفتی ئەنجام دا.
تایبەتمەندیێن تەکنیکی:
کەشتی ب ڕەهەندێن گەلەک مەزن هاتییە چێکرن، درێژیا وێ ١٢٨ مەترن و پانیا وێ ٢٢ مەترن. شیانێن هەلگرتنا ٧٤٢ کانتینەرێن بارهەلگر هەنە د ئێک دەم دا. یا کو ئەڤێ کەشتیێ ژ کەشتیێن ئاسایی جودا دکەت، پشتبەستنا وێیە ب ١٠ کانتینەرێن پاتریێن زەبەلاح کو شیانێن ٢٠ هزار کیلۆوات/دهمژمێر هەنە، ئەڤە ژی ب قەدەر هێزا پاتریا ٣٠٠ ترومبێلێن کارەبایییە.
پاراستنا ژینگەهێ و کارایی:
ئەڤ داهێنانە دێ کاریگەرییەکا مەزن ل سەر ژینگەیێ هەبیت؛ دهێتە چاڤەرێکرن سالانە ٥٨٠ تەنێن سوتەمەنیێ پاشکەفت بکەت و ڕێگریێ ل بەلاڤبوونا زێدەتر ژ ١٤٠٠ تەنێن گازێن زیانبەخش (وەکی کاربۆن) بگریت.
تەکنەلۆژیایا زیرهك:
سەرباری وێ یەکێ کەشتی دۆستا ژینگەیێیە، سیستەمەکێ ڕێدۆزیێ (Navigation) یێ پێشکەفتی هەیە کو ب زیرەکیا چێكری کار دکەت. ئەڤ سیستەمە دشێت دەوروبەرێن خۆ ب تەمامی ببینیت، پلانێ بۆ ڕێڕەوێ گەشتێ ب شێوەیەکێ ئۆتۆماتیکی دابنێت و ڕێگریێ ل پێکدادانان بگریت بەری چێببن. هەروەسا کەشتی دشێت لێخۆرینا خۆ بگەوهۆریت د ناڤبەرا یا مرۆڤی و یا خودکار (ئۆتۆماتیکی) دا.
ئاستەنگ و پاشەرۆژ:
سەرباری ڤان پێشکەفتنان، هێشتا ئاریشەیا مەودایێ پاتریان وەک ئاستەنگەکێ مایە، چونکی بۆ گەشتێن گەلەک دوور نەیا گونجایییە. بەلێ چینێ پلانێن هوور هەنە و دڤێت هەتا سالا ٢٠٢٧ێ زێدەتر ژ ١٠٠ کەشتیێن ب ڤی ڕەنگی ئێخیتە د خزمەتێ دا.
ئەڤ پێنگاڤا چینێ پرسەکا گرنگ پەیدا دکەت: ئەرێ ئەڤە دەستپێکا دووماهی هاتنا سەردەمێ کەشتیێن کلاسیکییە یێن ب سوتەمەنیێ کار دکەن؟
