دهۆكێ جهێ خوە پاراست و زاخۆ ڕێزەكێ بۆ پێشڤە چوو
قەیس وەیس:
هەردو یانەیێن بەهدینان یاریێن خوە ب وەكهەڤی و سەركەڤتن بەرانبەر یانەیێن ناڤەڕاست و باشۆرێ ئیراقێ ب دووماهی ئینان، ئەوا ژ چوارچووڤەیێ هەڤڕكیێن گەڕا 32ێ ژ خولا ستێرێن ئیراقێ یا فوتبۆلێ هاتینە كرن.
ئەلهۆیێن چیا دو خال ژ دەستدان
تیما یانەیا دهۆك ب شاشیێن ڤارێ دو خالێن گرنگ بەرانبەر یانەیا زەورا ژ دەستدان، ئەوا ل ئەینییا بۆری یاریگەها زەورا ب پایتەختێ ئیراقێ بەغدا هاتیە كرن، د ڤێ یاریێ دا تیما دهۆكێ ئاستەكێ گەلەك باش نیشان دا و یا دەستپێشخەربوو ب تۆماركرنا گۆلێ ئەوا گۆلا ئێكێ د خولەكا نەهێ دا ژلایێ یاریزانێ وێ مونز ئەلعلێوی هاتیە تۆماركرن، لێ ب بۆرینا دو خولەكا ئاكام هاشم گۆلا وەكهەڤیێ بۆ زەورا ئینا، د نیڤا دویێ دا ئەلهۆیێن چیا ڤەگەڕیانە پێشكەڤتنێ د خولەكا 72ێ ژلایێ ئەندرێ سەعید سناتی، لێ گۆلا وەكهەڤیێ یا زەورا و یا گۆمان لێكری د خولەكا 88 ێ دا هاتبوو تۆماركرن و یاری ب دو گۆلان وەكهەڤی ب دووماهی هات.
گۆلا دویێ ئۆفساید بوو
شرۆڤەكارێ كەنالێ ئیراقییە سپۆرت دیاركر كو گۆلا دویێ یا یانەیا زەورا ل سەر یانەیا دهۆك د خولەكێن دووماهیێ دا ئۆفساید بوو، ژبەركو دیاربوو یاریزانەكێ زەورا مللێ وێ و هندەك ژ سەرێ وی دناڤا ئۆفسایدێ دابوو، یا سەیرە ژوورا ڤارێ ئەڤ پارچە لڤینا یاریزانی نە دیت بیت ژبەركو ئۆفساید یا پێشچاڤە بێ گۆمان.
موهنەد ژ ئاستێ یاریزانان ڕازییە
د پرێس كۆنفرانسێ پشتی یاریێ دا موهەنەد زێدان هاریكارێ ڕاهێنەرێ یانەیا دهۆك گۆت: مە ئاستەكێ گەلەك باش و بلند نیشان دا بەرانبەر یانەیا زەورا خودان ئەرد و جەماوەر، یاریزانێن مە باشتر بوون تایبەت د نیڤا ئێكێ دا و شیان گۆلا پێشكەڤتنێ ژی بینن، هندەك شاشی و فۆكسا یاریزانی ل سەر یارێ نەما بوو لەوما بوو ئەگەر ئەم خالان ژ دەست بدەین ئەڤە ژی خالەكا لەزێ بوو ژبۆ تۆماركرنا سەركەڤتنێ، ئەم باشتر بووین و ژ هەژی سەركەڤتنێ بووین، گۆلا دویێ یا زەورا دروست نەبوو ، ژبەركو یاریزان دیاربوو د ئۆفسایدێ دابوو دڤیابا ڤار ب یاسا و هووربینێ دۆڤچوون كربا، ئەم سۆزێ ددەینە جەماوەرێ خوە بۆ یارییا بهێت باشتر بین.
كوڕێن خابووری جەماوەرێ خوە ئاشتكر
تیما یانەیا زاخۆ شیا سەركەڤتنەكا باش ل سەر مێڤانا خوە یانەیا نەفت میسان بینیت ب سێ گۆلان بەرانبەر گۆلەكێ، د یارییا واندا ئەوا ل ئەینیا بۆری ل یاریگەها یانەیا زاخۆ هاتیە كرن، هەرچەندە تیما مێڤان یا پێشكەڤتی د خولەكا حەفتێ دا هەتا خولەكا 41ێ محەمەد سۆلایی شیا گۆلا وەكهەڤیێ بۆ زاخۆ بینیت، د نیڤا دویێ ئاستێ زاخۆ باشتر لێهات و شیان دو گۆلان بینن ژلایێ مەهدی كامل خولەكا 51 و ئەمجەد عەتۆان خولەكا 59ێ دا و یاری ب سەركەڤتنا خوە ب دووماهی بینین.
یاریزانێ زاخۆ كەیفخوەشیا خوە دیاركر
د كۆنگرەیێ رۆژنامەڤانی دا مەهدی كامل یاریزانێ یانەیا زاخۆ پێخوەشحالبوو ب سەركەڤتنەكا گرنگ و گۆت: پشتی د یارییا بۆری دا ئەم نەشیاین ب سەركەڤین و چەندین ئاریشە پەیدابووین، بۆ ڤێ یاریێ مە سۆزدا بوو ئەم ڤەگەڕینە ئاست و سەركەڤتنان، لەوما ژی ب مۆرالەكا بلند هاتینە د ناڤ یاریگەهێ دا و ب سەركەڤتن مە سۆزا خوە بجهـ ئینا، ئەڤ سەركەڤتنە گەلەك گرنگ بوو ژلایێ مەعنەوی و دەرۆنی ڤە، ب هیڤییا وێ یەكێ دێ ئەنجامێن مە بۆ سەركەڤتنان بەردەوامبن.
شەڕێ ڕێزبەندیێ بەردەوامە
تیما یانەیا دهۆك جهێ خوە د ڕێزا 11ێ دا پاراست ب كۆمكرنا 42 خالان ژ 11 سەركەڤتن، نەهـ وەكهەڤی و 12 خوسارەتی هەنە، یاریزانێن وێ 35 گۆل تۆماركرینە ژ وانا 14 گۆل یێن ستێرا وێ پیتەر گۆرگیس، نێزكترین گۆلكەر هەڤالێ وی كەریم دەرویش پێنچ گۆل هەنە.
زاخۆ پێشڤە هات
تیما یانەیا زاخۆ ژ ڕێزا حەفتێ پێشڤە هاتە ڕێزا شەشێ ب كۆمكرنا 54 خالان ژ 15 سەركەڤتن، نەهـ وەكهەڤی و حەفت خوسارەتیان، یاریزانێن وێ 42 گۆل تۆماركرینە، بەرانبەر دا 28 گۆل ل سەر هاتیە تۆماركرن، گۆلكەرێ تیمێ ئەمجەد عەتۆانە خودانێ نەهـ گۆلایە، ئاسۆ رۆستەم نێزكترین هەڤڕكێ وی یە د تیمێ دا خودان هەشت گۆلە.
ژیار بەهرەمەندێ پاشەرۆژێ
پشتی ئەوێ ئاستێ بلند یێ گەنجێ پارێزگەهێ ژیار ئیبراهیم یاریزانێ تیما فوتبۆلا یانەیا دهۆك د یارییا بۆری ژ گەڕا 31ێ یا خولێ بەرانبەر یانەیا نەجەف و شیایی گۆلا سەركەڤتنێ د خولەكێن دووماهیێ دا بینیت، لژنەیا ژێگرتنا باشترینان ژیار دگەل سێ یاریزانێن دی ب شێوەیێ دەنگدان دەستنیشانكرن ژبۆ دیاركرنا ئێك ژ یاریزانان ببیتە باشترینێ وێ گەڕێ، پشتی دەنگدان ب دووماهی هاتی شیا پترییا دەنگان ب دەستڤە بینیت و ببیتە باشترین یاریزانێ گەڕا 31ێ.
یاریێن گەڕا 32ێ بڤی شێوەیی
دهێنە كرن
سێشەمبییا بهێت 5-5-2026
دهۆك- نەفت میسان، دەمژمێر 5:30 ئێڤاری، یاریگەها دهۆكێ.
نەورۆز- شورتە، دەمژمێر 5:30 ئێڤاری، یاریگەها نەورۆز.
نەفت- ئەلگەرمە، دەمژمێر هەشتی شەڤ، یاریگەها كەرخ.
تەلەبە- زەورا، دەمژمێر هەشتی شەڤ، یاریگەها ئەلمەدینە.
یاریێن رۆژا چارشەمبی 6-5-2026ێ.
هەولێر- كارەبا، دەمژمێر 5:30 ئێڤاری یاریگەها هەولێر.
ئەلقاسم- مینا، دەمژمێر 5:30 ئێڤاری، یاریگەها نەجەف.
ئەلغراف- دیالا، دەمژمێر 5:30 ئێڤاری، یاریگەها ناسریە.
كەرخ- زاخۆ، دەمژمێر هەشتی شەڤ، یاریگەها كەرخ.
جەوییە- مووسل، دەمژمێر هەشتی شەڤ، یاریگەها ئەلمەدینە.
پێنجشەمبییا بهێت یانەیا نەجەف دێ ل یاریگەها خوە دەمژمێر شەشی بەری مەغرەب یانەیا ئەمانەت بەغدا مێڤان كەت.
