ئەڤرۆ ئاكرێ د یارییەكا چارەنڤیساز دایە
رەمەزان زەكەریا:
چاڤەڕێ دهێتە كرن ئەڤرۆ ل دەمژمێر چارێ ئێڤاری جەماوەر یانەیا ئاكرێ ل یاریگەهێ بەرهەڤبن ژبۆ پشتەڤانییا تیما خوە یا فوتبۆلێ ئەوا دێ یارییەكا چارەنڤیس و ئێكلاكەر بۆ دەربازبوون بەر ب خولا پلا دو یا ئیراقێ كەت، دەمێ یارییا خوە یا گەڕا نەهێ و دووماهیێ ژ كۆما ئێكێ یا خولا پلا سێیێ مێڤاندارییا یانەیا ئەلزەعفرانیە دكەت.
یانەیا ئاكرێ سەرێ لیستا كۆما خوە د هێت ب كۆمكرنا 13 خالان، د بەرانبەر دا مێڤانا وێ هەڤڕكا وێ یە و 10 خال كۆمكرینە، یارییا ئەڤرۆ چارەنڤیسە بۆ پایتەختێ نەورۆزێ، وەكهەڤی و سەركەڤتن دێ دەربازبوونێ مسۆگەر كەن، ئەوا 15 یانە پشكدارن و هاتینە بەلاڤكرن ل سەر دو كۆمان، هەر كۆمەكێ یانەیەك دێ ئێكسەر دەربازبتە خولا پلا دویێ یا ئیراقێ و تیمێن ڕیزێن دویێ یێن هەردو كۆما دێ یارییەكا ڤەبر كەن ژبۆ دەستڤە ئینانا پلێتا سێیێ.
د دیدارەكێ دا سوهەیب عەلی ئەندامێ یانەیا ئاكرێ بۆ ئەڤرۆ گۆت: ئەڤ یارییە گەلەك گرنگە و دناڤا ئەردێ مە دایە ب هیڤی نە ڕێژەیەكا زوور یا جەماوەرێ مە بهێنە یاریگەهێ و پشتەڤانییا تیمێ بكەن، هەموو یاریزان د بەرهەڤن ب مۆرالەكا بلند و بێ هنگاڤتی،تیما ئەلزعفەرانیە ژی هەڤڕكە لێ گەشبینن ب ئاستێ یاریزانێن خوە دێ ئەنجامەكێ باش ب دەستڤە ئینن و دڤێت دەربازبوونێ ئێكلا بكەین.
ناڤهاتی گۆتژی: ئارمانجا سەرەكی یا یانەیێ بگەهیتە خولا پلا دویێ یا ئیراقێ و زێدەتر گەشبینن د یارییا ئەڤرۆ دا ڕێكخۆشكەر بیت كو پلان بۆ ب دەستڤە ئینانا ناسناڤێ خولا پلا سێ ژی بیت و دلێ جەماوەرێ مە پتر كەیفخوەش بكەین.
