ئەڤرۆ د خولا ستێرێن ئیراقێ دا دهۆك و نەورۆز دێ نەفتا میسان و شورتە مێڤان كەن
قەیس وەیس:
چاڤەرێ دهێتە كرن ئەڤرۆ دەست ب هەڤڕكیێن گەڕا 33ێ ژ خولا ستێرێن ئیراقێ یا فوتبۆلێ ب ئەنجامدانا چار یارییان، دهۆك دێ مێڤاندارییا نەفت میسان كەت و یارییا تەلەبە و زەورا د گۆپیتكا هەڤڕكیێن ڤێ حەفتیێ دانە.
ئەلهۆیێن چیا سەركەڤتن دڤێت
بڕیارە ئەڤرۆ ل دەمژمێر 5:30 ئێڤاری تیما یانەیا دهۆك ل یاریگەها خوە و دناڤ جەماوەرێ خوە دا مێڤاندارییا یانەیا نەفت میسان بكەت، ئەلهۆیێن چیا ئەوا د یارییا بۆری دا ب خالەكێ بەرانبەر زەورا ڤەگەڕیایی دێ بزاڤێ كەت د ڤێ دا یاریێ سەركەڤتنێ بینیت ژبۆ باشتركرنا ڕێزبەندییا خوە ئەوا نوكە ب 42 خالان ڕێزا 11ێ دهێت ژ11 سەركەڤتن، نەهـ وەكهەڤی و 12 خوسارەتیان، د بەرانبەر دا یانەیا نەفت میسان ئەوا د یارییا بۆری دا بەرانبەر زاخۆ 3-1 تووشی خوسارەتیێ بووی دێ بزاڤێ كەت خوە ژ زوونا داكەڤتنێ پارێزیت ئەوا د نوكە دا 30 خال هەنە ل ڕێزا 17ێ دهێت.
ژلایەكێ دووڤە یاریزانێن دهۆكێ ڕێژەیەكا باش یا گۆلكرنێ هەنە كو 35 گۆل تۆماركرینە ژ وانا 14 گۆل یێن ستێرا وێ پیتەر گۆرگیس، نێزكترین گۆلكەر هەڤالێ وی كەریم دەرویش پێنچ گۆل هەنە.
ڕاهێنەرێ دهۆك گەشبینە
د پرێس كۆنفرانس دا ئەحمەد خەلەف ڕاهێنەرێ تیما یانەیا دهۆك گۆت: پێنەڤێت دەمێ یاریێن خولێ بەر ب نێزكبوونا دووماهیێ دچن هەڤڕكی گەرمتر لێدهێت ل هندەك جهان، لەوما ژی بۆ مە هەر یارییەكا گرنگە وەكو فینالێ یە، ب هیڤی نە جەماوەرێ وەرزشی یێ یانەیێ بەرهەڤبیت و پشتەڤانییا تیما خوە بكەن، تیما بەرانبەر خودان پێكهاتیەكێ باشن، لەوما ژی ب دەستڤە ئینانا سێ خالا ب سانەهی نابیت، لێ ئەم ڕژدین بۆ ئەنجامێن باش و سەركەڤتنان ژبۆ دلخوەشكرنا جەماوەرێ خوە و باشتركرنا ڕێزبەندییا تیمێ.
نەورۆز د ئەركەكێ ب زەحمەت دایە
ژلایێ خوەڤە تیما یانەیا نەورۆز دناڤ ئەرد و جەماوەرێ خوە دا دێ یانەیا شورتە یا بەغدایی د ئەركەكێ ب زەحمەت دا ل دەمژمێر 5:30 ئێڤاری مێڤان كەت، كوڕێن باژێرێ سلێمانیێ ئاست و ئەنجامێن باش هەنە وشیایە هەتا نوكە ل ڕێزا نەهێ بهێت ب كۆمكرنا 47 خالان، ژ 14 سەركەڤتنان، پێنج وەكهەڤی و 13 خوسارەتیان، د بەرانبەر دا یانەیا شورتە ئەوا بزاڤێ دكەت بگەهیتە سەرێ لیستێ ژبۆ پاراستنا ناسناڤێ خوە یێ سالا بۆری د نوكە دا ل ڕێزا دویێ دهێت ب كۆمكرنا 67 خالان، ئەڤ یارییە بۆ نەورۆزێ تاقیكرنەكا ب هێزە.
ژ یاریێن دی یێن ئەڤرۆ
تیما یانەیا نەفت دێ ل یاریگەها كەرخێ یانەیا ئەلگەرمە ل دەمژمێر هەشتی شەڤ، مێڤان كەت، ژلایێ خوەڤە یانەیا تەلەبە دێ ل یاریگەها ئەلمدینە یانەیا زەورا ل پایتەختێ ئیراقێ بەغدا دەمژمێر هەشتی شەڤ مێڤان كەت كو دبیتە گۆپیتكا یاریێن ڤێ حەفتیێ.
یاریێن سوبەهی چارشەمبی
هەولێر- كارەبا، دەمژمێر 5:30 ئێڤاری یاریگەها هەولێر.
ئەلقاسم- مینا، دەمژمێر 5:30 ئێڤاری، یاریگەها نەجەف.
ئەلغراف- دیالا، دەمژمێر 5:30 ئێڤاری، یاریگەها ناسریە.
كەرخ- زاخۆ، دەمژمێر هەشتی شەڤ، یاریگەها كەرخ.
جەوییە- مووسل، دەمژمێر هەشتی شەڤ، یاریگەها ئەلمەدینە.
پێنجشەمبییا بهێت یانەیا نەجەف دێ ل یاریگەها خوە دەمژمێر شەشی بەری مەغرەب یانەیا ئەمانەت بەغدا مێڤان كەت.
