ئەمریكا سزایێن نوو ب سەر جێگرێ وەزیرێ پەترۆلا ئیراقێ و چەند سەركردەیێن میلیشیایان دا سەپاندن
د چارچۆڤەیا چڕكرنا گڤاشتنێن خۆ ل سەر تەهرانێ، وەزارەتا گەنجینەیا ئەمریكا پاكێجەكا نوو یا سزایان ب سەر تۆڕەكا ئالۆزا قاچاغچیەتا پەترۆلێ و پشتەڤانیكرنا تیرۆرێ ل ئیراقێ دا سەپاند. سزا هەر ئێك ژ (عەلی مەعاریج بەهادلی)، جێگرێ وەزیرێ پەترۆلا ئیراقێ و سێ سەركردەیێن بلند یێن میلیشیایێن (عەسائیب ئەهلولحەق) و (كەتائیب سەیدولشوهەدا) دگریتەڤە، كو بكارئینانا پۆست و هەژموونا خۆ، سامانی پەترۆلا ئیراقێ بۆ خزمەتا بەرژەوەندیێن ئیرانێ بكارئیناینە.
نڤیسینگەها كۆنترۆلكرنا سەروەت و سامانێ وەلاتێن بیانی یا وەزارەتا گەنجینەیا ئەمریكا، پاكێجەكا نوو یا سزایێن ئابووری ب سەر هەژمارەكا بەرپرسێن حكومی یێن ئیراقی و سەركردەیێن میلیشیایێن چەكدار دا سەپاند، ب تۆمەتا خراب بكارئینانا كەرتێ پەترۆلا ئیراقێ و تێكدانا ئارامییا وەلاتی.
د بەیاننامەیا وەزارەتا گەنجینەیا ئەمریكا دا هاتیە، ژ دیارترین وان كەسایەتیێن كو سزا دگرنەڤە، (عەلی مەعاریج بەهادلی) جێگرێ وەزیرێ پەترۆلا ئیراقێ یە، كو پێگەهێ خۆ یێ حكومی بكار ئینایە بۆ ئاسانكاریكرنێ د قاچاغبرنا پەترۆلا ئیراقێ دا، ب مەرەما دابینكرنا داهاتی بۆ ئیرانێ و میلیشیایێن وێ د ئیراقێ دا.
وەزارەت دبێژیت: هەروەسا سزا سێ سەركردەیێن بلند یێن هەردوو گرووپێن چەكدار (عەسائیب ئەهلولحەق) و (كەتائیب سەیدولشوهەدا) دگریتەڤە.
ژ ئالیێ خۆ ڤە سكۆت بێسێنت، وەزیرێ گەنجینەیا ئەمریكا راگەهاند: «ئیران وان سامانان تالان دكەت یێن كو مافێ رەوا یێ گەلێ ئیراقێ نە». هەروەسا هۆشداری ژی دا كو»وەزارەتا گەنجینە بێدەنگ نابیت د وێ گاڤێ دا كو لەشكرێ ئیرانێ كەرتێ پەترۆلا ئیراقێ بكاردئینیت بۆ پشتەڤانییا دارایی یا تیرۆرێ دژی ئەمریكا و هەڤپەیمانێن مە».
ل دووڤ پێزانینێن وەزارەتا ناڤبری»عەلی مەعاریج بەهادلی، جێگرێ وەزیرێ پەترۆلا ئیراقێ، ژ سالا 2018 ێ وەرە د چەندین پۆستێن هەستیار دا (وەك سەرۆكێ لیژنەیا پەترول وغازێ ل جڤاتا نوونەران، سەرۆكێ فەرمانگەها مۆلەتپێدانێ و هەتاكو وەزیرێ پەترۆلێ ب وەكالەت) كار كریە بۆ بەرژەوەندییا (سەلیم ئەحمەد سەعید)، كو قاچاغچییەكێ ناڤدارێ پەترۆلێ یە و سەر ب ئیرانێ ڤەیە».
وەزارەتێ دوپاتی ل سەر وێ چەندێ كر، كو (مەعاریج) تۆمەتبارە ب دەركرنا بەلگەنامەیێن سەختە و پێدانا مۆهلەتێن هناردەكرنێ ب كۆمپانیایێن سەعیدی، ژ وان ژی كۆمپانییا (VS Oil)، كو رۆژانە ب بهایێ چەندین ملیۆن دۆلاران پەترۆل ژ زەڤییا گەیارە یا پەترۆلی بۆ خۆر زوبێر ڤەدگوهاست. ل وێرێ ژی پەترۆلا ئیرانی ب ناڤێ پەترۆلا ئیراقی دهاتە فرۆشتن بۆ بازاڕێن جیهانێ، ئەڤە ژی ل هەمبەر پێدانا بەرتیلان و پشتەڤانییا سیاسی.
وەزارەتا گەنجینەیا ئەمریكا ئاشكرا كر، كو سزا هەروەسا (مستەفا هاشم لازم بەهادلی) یێ ناڤدار ب (سەید عەون) گرتینەڤە، كو بەرپرسەكێ بلندێ دارایی یێ (عەسائیب ئەهلولحەق)ە. ناڤبری پشتی سالا 2011ێ سیستەمەكێ ئالۆز بۆ قاچاغچییەتا پەترۆلێ و كۆنترۆلكرنا پیشەسازییا كانزایان ل باشوورێ ئیراقێ ئاڤا كریە، ب رێیا چار كۆمپانیایێن پەردەپۆشكری.
گەنجینەیا ئەمریكا دیار كر، كو (سەید عەون)ی گرێبەستێن حكومی بۆ پەیداكرنا داهاتی بۆ میلیشیایان بكار ئیناینە، ل گەل هەبوونا پەیوەندییا راستەوخۆ ب فەیلەقا قودس یا لەشكرێ پاسدارێن ئیرانێ ڤە. ژ بەر وێ ئەگەرێ، هەر چار كۆمپانییا چوونە ناڤ لیستا سزایان دا.
د پشكەكا دی یا بەیاننامەیا وەزارەتا گەنجینەیا ئەمریكا دا، سزا ب سەر (ئەحمەد خوزەیر مەقسووس) و (محەمەد عیسا كازم شویلی – ئەبو مەریەم) دا سەپاندینە، كو دوو سەركردەیێن بلندێن (كەتائیب سەیدولشوهەدا)ن.
ل دووڤ پێزانینان شویلی تۆمەتبارە كو ژ سالا 2025ێ وەرە ب شێوەیەكێ راستەوخۆ هەماهەنگی ل گەل تۆڕێن دارایی یێن حزبوللایا لوبنانی كریە و، ملیۆنان دۆلار بۆ كڕین و ڤەگوهاستنا چەكی بۆ ناڤ ئاخا ئیراقێ تەرخان كرینە.
ئەڤە ژی د دەمەكێ دا یە كو گرۆپێ (عەسائیب ئەهلولحەق) ل سالا 2020ێ و (كەتائیب سەیدولشوهەدا) د ناڤبەرا سالێن 2023 بۆ 2025ێ دا، ژ ئالیێ ئەمریكا ڤە چبوونە د ناڤ لیستا رێكخراوێن تیرۆرستی یێن جیهانی دا.
