بزاڤێن حوكمەتا نوو ل ئیراقێ بۆ هەلوەشاندنا میلیشیایێن چەكدار دێ د سنۆردار بن
ڤەكۆلەرەكێ سیاسی ل نەینەوا راگەهاند، بزاڤێن حوكمەتا نوو یا ئیراقێ بۆ هەلوەشاندنا ملیشیایێن چەكدار دێ د سنووردار بن، كێشەیا مەزن ژی تنێ چەك نینە، بەلكو سیستەمێ دارایی یێ وان ملیشیایانە كو ب زەحمەت دهێتە كۆنترۆلكرن.
مەناف حەسەن، ڤەكۆلەرێ سیاسی ل نەینەوا گۆت ژی: «گڤاشتنێن ئەمریكا بۆ وەرگرتنەڤەیا چەكی ژ دەستێ گرۆپ و ملیشیایان ل ئیراقێ د بەردەوامن، بەلێ ئەز ڤێ چەندێ ب زەحمەت دبینم. بزاڤێن حوكمەتا نوو ژی دێ د سنۆردار بن و نەشێت ملیشیایان هەلوەشینیت و چەكی ژ وان وەربگریت، چونكی نوكە ئەو گرۆپ و ملیشیایە چوونە د ناڤ حوكمەتێ دا، لەوما ب دیتنا من ئەو گرۆپ دێ رەوشا ئیراقێ بەرەف خرابیێ ڤە بەن».
هەروەسا ئاشكرا كر «بەری چەند مەهان گرۆپێن چەكدار ل نەینەوا ژبەر هێرشێن ئەمریكا خۆ ڤەشارتبوو، بەلێ نوكە دوبارە دەست ب كار و چالاكییێن خۆ كرینە. لەوما هەكە ب ڤی رەنگی بیت، ب زەحمەتە حوكمەتا نوو بشێت چەكی ژ وان ملیشیایان وەربگریت، و دوور نینە ئەمریكا دەست ب ژناڤبرنا وان ملیشیایان ل ئیراقێ بكەت، ئەڤە ژی تشتەكە ب دیتنا من دێ هەر رویدەت».
