تاجا سپی
هەرهین محەمەد
دناڤبەرا سپیبوونا پرچێ و مەزناهیا ئەزموونێ دا و ژیان، رێپیڤانەكا درێژە و قوناغا پیریێ ژی نەبتنێ كێمبوونا هێزێ یە، بەلكو كومبۆنا وان هەموو سەربورایە و رۆژێن دژوار و خۆش و نەخۆش یێن كو مرۆڤی پێگەهاندین و دەمێ دبێژن(پیری و عەیبی) ئەڤە نیشانەكا كومەلایەتی یە بۆ وان گوهۆڕینێن فیزیكی و دەرونی یێن دگەل تەمەنی دهێن، بەلێ د راستی دا هەر چركەك ل سەر سەروچاڤان و چیرۆكەكا سەرفەرازیێ و بهێن فرەهیێ دناڤ خۆ دا دگریت.
پیری و جوانیا گەهشتنی: راستە تەمەن بارەكی َگان دئێخیتە سەرملێن مرۆڤی، بەلێ بەرانبەری ئەڤێ چەندێ عەقلی ددەتە مرۆڤی، بەلێ ئەگەر پیری ب عەیب بهێتە بناڤكرن، ئەڤە بتنێ ژبەر هندێ یە كو جیهان ب چاڤەكێ بتنێ مادی سەیری ژیانێ دكەت، بەلێ دناخێ هەر پیرەكی دا، گەنجاتیەكا نەمرو دلەكێ پر ژ زانیاریان هەیە كو چو گەنج نەشێن ب بێ ماندی بوون ب دەستخۆڤە بینن.
رێزگرتن و وەفاداری: پیری نە شەرم و نەكێماسی یە، بەلكو تاجەكا سپیە ل سەر سەرێ ئەوان كەسێن كو ب كەرامەت ژیانێ دەربازدكەن و بلا شەش هزار عەیب ژی هەبن، بەلێ بلا دلەكێ سافی و وژدانەكا ئارام دگەل دابیت و پیری رێزگرتنە ل رابردووی و بهێن فرەهیەكە ل سەر داهاتی و هەر تەمەنەكی جوانیا خوە یا تایبەت هەیە و یا پیران ژی جوانیا دلێن پر ژ ئەڤینی یە. پیراتی قوتابخانەیا بێدەنگ یا ژیانێ یە و تێدا مرۆڤ فێری هندێ دبیت كو بهایی َتەمەنی نە ب ژمارەیا سالانە، بەلكو ب ئەوێ باندورا ئەرێنی یە ئەوا لدوڤ خوە دهێلیت دەمێ ئەم سەحدكەینە كەسەكێ ب تەمەن ئەم تەمەنێ لاوازیێ دبینین، بەلكو ئەم گەنجینەیا زانیاریان دبینین كو وەكو رێبەرەكێ راستەقینەیە بۆ نڤشێ نوو ئەڤ قوناغەیە كو تێدا كو مرۆڤ ژجیهانا غلولێ و لێدورینێ دەردكەڤیت و بەرەڤ جیهانا دانایی و ئارامیێ دچیت و ژبەرهندێ پاراستنا كەرامەتا وان ئەركەكێ ئەخلاقی و نەتەوەیی یە ل سەر ملێن مە هەموویان و ل ڤێرە پێدڤیە ئەم بزانین پیربوون نەبتنێ سپیبوونا تالێن پرچێ یە، بەلكو ئاڤابوونا كەسایەتیێ یە كو دناڤ گەریانێن سەخت یێن ژیانێ داهاتیە تاقیكرن و ئەو قورمچینا سەر دەست و چاڤێن وان نە نیشانا كێمبوونا جوانیێ یە، بەلكو نەخشەیێ رێكا وان هەموو سەركەفتن و شكەستنانە یێن كو ئەڤرۆ مفای ژێ وەردگرین و هەر ئاخفتنەكا وان وانەیەكا بێ بەرانبەرە و هەر بێدەنگیا وان پری حكومەت و تێر ڕامانە.
