ئیران لاواز بوویە و کاریگەریا وێ ل سەر دەڤەرێ کێم بوویە
چاڤدێرێن سیاسی دیار دکەن پشتی شەڕێ ئیرانێ ل گەل ئەمریکا و ئسرائیلێ نها پێگەهێ سەربازی و سیاسی یێ ئیرانێ لاواز بوویە و هەکە ئیران داخوازیێن ئەمریکا قەبوول نەکەت دێ رەوشا وێ یا ئابووری گەلەک خرابتر لێ هێت.
کامیران قازی چاڤدێرێ سیاسی ل وەلاتێ سوید دیار کر، ژ بەر شەڕێ ٤٠ رۆژان یێ ئەمریکا و ئسرائیلێ ل گەل ئیرانێ نها ئیران گەلەک لاواز بوویە، دۆرپێچا دەریایی یا ل سەر ئیرانێ ژی وەسا کریە کو رەوشا ئابووری یا ئیرانێ رۆژ ب رۆژێ خرابتر دبیت و گۆت: (د راستی دا نها سێ رێ ل پێشیا ئیرانێ دانە، یان دڤێت داخوازیێن ئەمریکا قەبوول بکەت و ڤەگەریتە سەر مێزا دانوستاندنان یان ژی دڤێت خوە بۆ قووناغەکا گەلەک دژوارتر ئامادە بکەت و خالا سیێ ژی هەکە سزایێن ئابووری ل سەر ئیرانێ بەردەوام بن دێ خوەنیشادانێن جەماوەری ل دژی دەستهەلاتێ دەستپێکەن و دێ وەسا دەستهەلاتا نها یا ئیرانێ ژناڤ چیت).
ناڤهاتی ئەو یەک ژی دیار کر، هەر گوهۆڕینەک ل ئیرانێ روو بدەت د بەرژەوەندیا کوردان و نەتەوەیێن دی یێن ئیرانێ دایە، لێ گرنگە هەموو هێزێن دژبەری دەستهەلاتێ ل ئیرانێ خوە بەرهەڤ بکەن و بۆ هەر گوهۆڕینەکێ ژی د ئامادەباشیێ دا بن، ب تایبەتی ژی هێزێن سیاسی یێن رۆژهەلاتێ کوردستانێ، چونکی لاوازبوون و نەمانا دەستهەلاتا ناڤەندی یا نها ل ئیرانێ ب تەمامی د بەرژەوەندیا گەلێ کوردە ل رۆژهەلاتێ کوردستانێ.
عیرفان رەهنموون شرۆڤەکارێ سیاسی ژی دیار کر، ئیران ب چو رەنگەکێ نەشێت وەکو بەری سالا ٢٠٢٤ حوکمی ل چەندین پایتەختێن رۆژهەلاتا ناڤین بکەت، ئەو یەک ب دووماهی هات و نها سەردەمێ لاوازبوونا ئیرانێ دەستپێکریە، بێگومان هەکە ئیران نەچار بیت داخوازیێن ئەمریکا قەبوول بکەت وی دەمی دێ نەچار بیت دەست ژ پشتەڤانیا گرۆپێن چەکدار ژی بەردەت و ئەو یەک ژ بۆ ئارامیا رۆژهەلاتا ناڤین ژی گەلەک یا گرنگە، چونکی دووماهیێ هەر دێ خەلکێ ئیرانێ بریارێ ل دۆر پاشەرۆژا خوە دەن و لاوازبوون و ژناڤچوونا دەستهەلاتا نها یا ئیرانێ رێ بۆ ئازادیا کوردان و نەتەوەیێن دی ل ئیرانێ ڤەدکەت و گۆت: (هەر چاوا بیت نها مرۆڤ دشێت بێژیت سەردەمەک نوو دەستپێکریە، ئەو ژی سەردەمێ لاوازبوونا دەستهەلاتا نها یا ئیرانێ یە و ئەو یەک بۆ کوردان دەلیڤەیەکا دیرۆکی یە).
هژمارەک زێدە ژ چاڤدێرێن سیاسی ژی دیار دکەن، گرنگە هەموو هێزێن سیاسی یێن رۆژهەلاتێ کوردستانێ د ئامادەباشیێ دا بن، چونکی دێ ل ئیرانێ گوهۆڕین روو دەن، هەر گوهۆڕینەک ژی روو بدەت بۆ کوردان یا گرنگە و دڤێت کورد ببنە مفادارێن سەرەکی یێن گوهۆڕینێن ل ئیرانێ.
