پەندا ناسنامەیێ
سولین محسن
ل چەیخانەکێ یێ روینشتی بووم، و وەکی هەمی ڕۆژان من ل دیوانا کەسێن ب تەمەن یێن تاخێ مە دەمێ خۆ د بۆراند، من ئاوازا تێکڤەدانا چایێ ژی تێکەلی سوحبەتێن وان یێن خۆش دکر، مامێ ئاڤدەل فڕەک ل چایا خۆ یا ڕەش تاری دا و گۆت: وووهــ، تەعلاتییا ڤێ چایێ وەکی دەستبسەرداگرتنا مللەتیە، خالد مامۆ کا شەکرێ بینە…
من ژی ئەو دەلیڤە ب پارییەکێ گەرم خوار و گۆتێ: مامێ ئاڤدەل، بۆ من بەحسێ وەلاتی بکە. ئەوی چاڤێن خۆ داخستنە ئەردی؛ خۆ دێ بێژی وی دیمەنەک لسەر ئەردی ددیت… پشتی بێهنەکا کورت ئاخینکەکا ب ئێش ڕاهێلا و کەرەمکر و گۆت: ئەز دترسم ڕۆژا جیهانێ ژ ڕۆژئاڤای ب هەلێت و هێشتا ڕۆژا ئازادییا نشتیمانێ من قەیدێن خۆ نە ڤەکربن.
وەلاتێ تە زارۆکەکە کو د ناڤ ترسێدا مەزن بووی، بەلێ چاڤێن وی هێشتا بۆ ئاشتییێ د ڤەکرینە، ئەو دزانیت دوژمن د زۆرن و باش دزانیت یێ بتنێ یە، بەلێ هێشتا گەلەک ب خەمخۆری تۆڤێ هیڤیا ل ئەردێ خۆ د رەشینیت و دبێژیت ئاخا من پێدڤی ب بارانا نینە بۆ شینبوونێ، هیڤیێن مە ب خوینێ شین دبن…
د وەلاتێ تەدا پەروەردەیەک یا هەی کو دڤێت لبەری هەر تشتی خەلکی (مرۆڤبوون) هەبیت؛ چونکی بێی ئەو خەلک نەشێت ڤێ گرانییێ لسەر دلێ خۆ هەلگریت، لەورا ب رێکا مروڤبوونا خۆ ڤی باری دکەنە د ناڤ ژۆرێن دلێن خۆدا.
مام ئاڤدەلی ئەڤ گۆتنێن گران ب شێوەیەکێ ئێکسەر ئاراستەی من دکرن، هەروەکی وی دڤیا خوینا من ب گوتنێن خۆ ب کەلینیت. فڕەکا درێژ ل چایا خۆ دا و ئەز یێ چاڤەرێی لێڤێن وی کو بلڤن و دیسان بۆ من ب پەیڤن، پاشی گۆت: نەبێژە دێ وەلات چ پێشکێشی من کەت؟ بێژە من؛ کا تو دشێی چ بدەیە وەلاتی…؟ چونکی وەلات نە کاسەکە و دێ بلند کەی، ئەو ئاگرەکە بۆ پاراستنێ و هەردەمێ تو بێچارە بووی تو بخۆ دێ بەرەف وی ئاگریڤە چی بۆ مرنێ!
چایا من ساڕ ببوو، لێ هێشتا پەیڤێن مام ئاڤدەلی گەلەک دگەرمن، هەروەکی چ جارا ساڕبوون بسەردا نەهاتی..
دیسان پەیڤی و گۆت: کوڕێ من، ئەگەر ئاخ ژ تە هاتە وەرگرتن، بزانە هزرا تە هێشتا یا دگەل تە، ئەگەر ناڤێ گوندێ تە گوهۆڕین، تو دشێی لناڤ دلێ خۆ بنڤیسی؛ چونکی دل ئەو پەرتووکە یا کو چ زۆردار نەشێن بسۆژن، ئەگەر دەنگێ دهۆلێن شادییێ هاتنە گوهۆڕین بۆ ئاوازێن بیانی بزانە هێشتا تە ناسنامە یا هەی و ئەگەر دسەر ڤێ هەمییێ دا هێشتا ل دەمێ هاتنا شەڤێ تو خەونا ب ئێکگرتنێ و سەرکەفتنێ ڤە ببینی.. بزانە ب هیچ رەنگەکی چ هێز د سەرکەفتی نەبووینە.
دەستێ خۆ دانا سەر ملێ من و ب رژدییەکا جودا ڤە گۆت:
چ جاران ناسنامەیا خۆ نە گوهۆڕە… مامۆ، چونکی ئەوێ ناسنامەیا خۆ دگوهۆڕیت، بەری ئەو وەلاتی ژدەست بدەت ئەو دێ خۆ ژدەست دەت!
