حەز ژ وان هەموو كاران دكەم یێن من پشكداری تێدا كری
سندس سالح سلێڤانەیی
ئەكتەرێ گەنج (كیڤی سالح) د دیدارەكێ دا بۆ رۆژنامەیا ئەڤرۆ گۆت: ژبەركو من گەلەك حەزژ شانۆیێ دكر، ل سالا (2004) ئەز چوومە پەیمانگەها هونەرێن جوان/ پشكا شانۆیێ من ب دووماهی ئینا، دەمێ ئەز چوویم من دڤیا بچمە سینەمایێ بخوینم، لێ ژبەركو ئەو پشك نەبوو ئەز چوومە شانۆیێ و هەتا نوكە من پشكداری د هژمارەكا فلم و كورتە فلم و درامایان دا كریە و دووماهی پشكداری د كورتە فلمێ (سپی) دبوو، كو ژ دەرهێنانا (نەڤرۆز شەعبان) بوو، كو هەتا نوكە پشكداری د هژمارەكا فەستیڤالان دا كریە و چەند خەلات ژی وەرگرتینە.
هەروەسا گۆت: ئەز حەزژ وان هەموو كاران دكەم یێن من پشكداری تێداكری، ب تایبەت ژی فلمێ (قارەمانێ چەرخی) كو ل دوور قارەمانیا پێشمەرگەی بوو ل سالا (2015) ل سكرێ موسل هاتبوو وێنەكرن، هەروەسا من گەلەك حەزژ درامایا (خەلۆ و جەلۆ) ی كر، كو ل سالا (2021) ل كەنالێ وار دهاتە نیشادان، پشتی وێ مە دو درامایێن دی ژی بۆ هەمان كەنال چێكرن و هەتا نوكە یێ بەردەوامم و هیڤیا من ئەوە ل دووف شیانێن خۆ بشێم خزمەتا هونەرێ كوردی بكەم.
