دەم پارتی دێ پشتەڤانیێ ل ئەردۆغانی کەت
ب، سهرجان مەحمود:
ئەندامەکێ بەرێ یێ پەرلەمانێ تورکیا دیار دکەت هەکە قووناغا ئاشتیێ یا سەرکەفتی بیت و هەلبژارتنێن پێشوەخت ل تورکیا بهێنە کرن دێ دەم پارتی پشتەڤانیێ ل ئەردۆغانی کەت و دەنگدەرێن دەم پارتی ئێدی پشتەڤانیێ ل پارتا کۆماری ناکەن.
ئالتان تان ئەندامێ بەرێ یێ پەرلەمانێ تورکیا سەر ب فراکسیۆنا هەدەپێ دیار کر، ژ بۆ ئەردۆغانی سەرکەفتنا د هەلبژارتنان دا گەلەک گرنگە، ترسەکا مەزن ژی ل دەف ئاکپارتیێ هەیە ژ بەر قووناغا ئاشتیێ دبیت دەنگێن وان ل هندەک دەڤەران کێم بن، لێ هەکە قووناغا ئاشتیێ سەر بگریت دێ دەم پارتی ژ بۆ هەلبژارتنێن سەرۆک کۆماریێ جارەکا دی پشتەڤانیێ ل ئەردۆغانی کەت و گۆت: (دبیت ب رەنگەکێ ئاشکرا پشتەڤانیێ ل ئەردۆغانی نەکەن، لێ دێ دەنگدەرێن دەم پارتی دەنگێن خوە دەنە ئەردۆغانی، ئانکۆ ئێدی وەکو هەلبژارتنێن بۆری پشتەڤانیێ ل پارتا کۆماری ناکەن و بێگومان ئەو یەک ب تەمامی د بەرژەوەندیا ئاکپارتیێ و ئەردۆغانی دایە و دبیت ببیتە فاکتەرەک گرنگ دا ئاکپارتی ژ بۆ سەرکەفتنا قووناغا ئاشتیێ ب کریاری هندەک تشتان بکەت).
پەرلەمانتارێ بەرێ یێ پەرلەمانێ تورکیا کو ب ئەسلێ خوە کوردە ئەو یەک ژی نەڤەشارت کو د ناڤ جڤاکێ تورکیا دا ب گشتی پشتەڤانیەکا باش بۆ قووناغا ئاشتیێ هەیە، لێ ژ بەر هندەک بەرژەوەندیێن سیاسی هەتا نها ئاکپارتیێ چو تشتەک وەسا بەرچاڤ نەکریە کو ببیتە جهێ دلخوەشیا کوردان، هەکە ب کریاری هندەک تشت بهێنە کرن دێ ئەو یەک بیتە جهێ دلخوەشیا کوردان و بێگومان وی دەمی دەنگدەرێن دەم پارتی دێ د باژێرێن مەزن یێن تورکیا دا دەنگێ خوە دەنە ئاکپارتیێ و ئەردۆغانی و هەکە رێژەیەک ژ دەنگدەرێن دەم پارتی دەنگێ خوە نەدەنە ئەردۆغانی نادەنە پارتا کۆماری ژی ئانکۆ رەوش وی دەمی ب تەمامی د بەرژەوەندیا ئاکپارتیێ و ئەردۆغانی دایە.
سەبارەت ب ئاڤاکرنا بەرەیەکێ نوو ل تورکیا کو دەم پارتی ژی ل گەل ئاکپارتیێ پێکڤە کار بکەن ژی ناڤهاتی دیار کر، جارێ گەلەک زوویە بەحسێ تشتەک وەسا بهێتە کرن، لێ سەرکەفتنا قووناغا ئاشتیێ دێ بیتە ئەگەرێ گوهۆڕینێن گەلەک مەزن ل تورکیا و بێگومان وی دەمی دبیت گەلەک تشتێن نەچاڤەرێکری روو بدەن.
ئەو یەک د دەمەکێ دایە کو هندەک ژ دەزگەهێن راگەهاندنا تورکیا دیار دکەن، سەلاحەدین دەمیرتاش و گەلەک ژ سەرکردە و ئەندامێن دەم پارتی ل دژی ڤێ یەکێ نە کو جارەکا دی ئەردۆغان ببیتە سەرۆک کۆمارێ تورکیا، چونکی ماوەیێ قانوونی یێ ئەردۆغانی ب دووماهی هاتیە و نابیت دەم پارتی پشتەڤانیێ ل کارەکێ وەسا بکەت و ژ بەر ڤێ یەکێ ژی نها ناکۆکی د ناڤ ئەندامێن دەم پارتیێ دا هەنە و ئەو یەک دێ کاریگەریا خوە ل دەنگدەرێن دەم پارتیێ ژی کەت.
