ئـاگرێ شۆڕشا گـولانـێ و بیرەوەریەك
عزەت یوسف
ئەگەر هزرا من یا لاواز نەبیت، سال سالا 1977 بوو.. بێدەنگیێ و بندەستیێ هەمی كوردستان مینا تەڤنێ تەڤنەپیركێ ل سەر مێوەكا تری پێچا بوو.. هێشتا مالا مە و نێزیكی چل مالێن دی ل گۆندێ ئێمینكی بوو.. ل درەنگە ئێڤاریا رۆژا نەوروزێ، پشتی رۆژئاڤابوونێ و تاری كەتنێ، ئاگرەكێ خۆش ل سەرێ چیایێ مام سینی جهەكی دبێژنێ سەرەكەڤرێ بۆ دەمێ پتر ژ نیڤ دەمژمێرێ گەش و بلند بوو.. بۆ زانین (ئەڤ چیایە ژ چار ئالیاڤە؛ ژ ئالیەكیڤە دكەڤیتە هنداڤی كاڤلە گۆندێ مێردینكێ و گۆندێ ئێمینگێ و بابلۆ و بێسرێ و بەرێ بهار و زاویتە هەتا چیایێ پشتا بادێ.. ژ ئالیێ دوێ دكەڤیتە هنداڤی گۆندێ ئێتیتێ و تاڤەرەش و هەمی باژێرێ دهۆكێ و چیایێ زاوا و چیایێ داكا هەنبەرە.. ژ ئالیێ سیێ دەڤەرا بەرەژێر، ژ گۆندێ ئەڤریكێ و تەلوە و چەمان و هەتا بالەتە و بریفكا ئەو دەڤەر هەمی یا دیارە، ژ ئالیێ چارێ و ل رەخێ پشتێ كۆنترۆلێ ل سەر دەڤەرا رویباری ژ گۆندێ كوزۆ و مێرینا و كورەدێرێ و ئەو دەوروبەر و هەتا هەمی چیایێ گارە باش دیارە. سەرەكەڤرا مام سینی جهەكێ راست و بلندە، دەڤەرەكا بەفرینە، تژی داروبارێن سروشتینە؛ بەڕی، مازی، گهیشك، هەڤرست، كەزان، بێمك، كرۆسك… تژی گیانەوەرێن كیڤینە.. دەمێ بەرێ ل شەڤنوبا پەزی ل سەرەكەڤرێ، شڤانان روناهیا كارەبا باژێرێ میسل ددیت.)
بەلێ گۆڕیا ئاگری بلند بوو.. پاشی دەركەفت ئەو ئاگرێ پێشمەرگەی بوو، كو پێشمەرگەهێ قارەمان شەهید مەحموود ئێزدی و هەڤالین وی یێن پێشمەرگە ئەو ئاگر هلكربوو.. ئەوی ئاگری د گۆتە دوژمنی، ئەم هەر هەینە و ئەم هەبووین و دێ هەر هەبین. دگۆتە دوژمنی، نەورۆزا مە گەشە، ئاگرێ مە هەلە، شۆرشا مە ل كارە. د گۆتە دوژمنی ئەڤرۆ چریسكا ئاگرێ شۆرشا گولانێ گەشتر و بەرفرەهترە و بوویە ئاگر و دێ دوژمنان سۆژیت. بەلێ شۆرش ئاگرەك بوو ب سەر دوژمنی دا دباری، ئاگرێ رزگاریێ و ئازادیێ بوو ل كوردستانێ دباری.
بۆ سالا پاشتر، هەر بۆ نەوروزێ، سپێدە زوی ئەم ل دویڤ دەنگێ تڕۆمبێلان ژ خەو رابووین، یا مە دیتی پێنج تڕۆمبێلێن (زیل) لەشكرێ ئیراقێ كێشبوونە بەر گۆندی و راوەستیان، تڕۆمبێل د خروخالی بوون، ژبلی شۆفێری هەر زیلەكێ تنێ سەربازەك تێدا بوو.. كەسێ نەزانی سەروبەر چییە! پاشی مە دیت لەشكەرێ ئیراقێ ژ چیایێ مام سینی هاتنەخار و ل زیلێن خۆ سیار بوون و بەرب باژێرێ دهۆكێ قەشیان.. وەسا دیار بوو، ئەو لەشكر رۆژا بەرێ ب دزی و نەپەنی د پشتا گۆندێ بابلۆ ب پیادە هلباسكی چیایێ مام سینی ببوون و چووبوونە هەمان جهێ پارسال ئاگر لێهاتیە هلكرن و بیسەیا خۆ ب موكومی ل بەر پێشمەرگەی ڤەنابوو، لێ ئنیەتا چەپەلا وان بەر نەگرت و بێ هیچ ئەنجام ڤەگەڕیان.
ئەڤرۆ بلا هەمی حەز و نەحەز بزانن، خەباتا كوردان ژ بۆ مافێن رەوایێن وان پاشدا ناچیت، ئاگرێ وان ناڤەمریت، بندەستیێ و پیلانێن دوژمنان ناحەوینن، ئەو ئاخا ب خوینا شەهیدان هاتیە ئاڤدان و بەردار بووی قەت نەبوویە و نابیت تۆڤێ دوژمنان قەبیل بكەت و دوژمن لێ بچەورن و تەڤنێ وان یێ تەڤنەپیركێیە و «وإن أوهن البیوت لبیت العنكبوت».
