میعراجا خۆلەمێشێ
ریجوان خالد
د وێ خلوەتا تاری و رۆن دا، من دەستێ وی گرت و بەرەڤ سینگێ خۆ ڤە ئینا. وی ب توندی ئەز ل باوەشا خۆ گرتم، هەتا کو هەناسەیێن مە ل سەر لێڤان گەرم بوون، ب هەموو هێزا خۆ مە دیوارێن ژوورێ هەژاندن و خۆ د ناڤا ئێکودو دا ڤەشارت. جەستەیێن مە وەك دو کیشوەرێن دابڕای بوون، کو ب بیڤەلەرزەکا بێدەنگ ل هەڤ ئالۆزیابوون.
دەستێن وی وەك دو نێچیرڤانێن ماندی ل سەر لەشێ من، ل شوونپێ یێن تشتەکێ بەرزەبووی دگەڕیان. لێڤێن مە، بوونە دەرگەهێ هەناسەیەکا ئێکگرتی، کو تێدا پەیڤ دمرن دا کو هەست باخڤن. گەردەنا من، وەك بەفرەکا سپی د بەرامبەر گەرماتییا وی دا دحەلییا. سینگێ من، چ هەستێن دی نەدزانین، ب تنێ گەرماتییا وی نەبیت. هەر لڤینەك، پەیڤەك بوو کو چو زمان نەشێن دەربڕینێ ژێ بکەن. ل وێ خۆلەکێ، بێدەنگی نە ب تنێ نەبوونا دەنگی بوو، بەلکو بوو زمانەکێ هەستیار کو ب تنێ پیست تێدگەهشت.
عەشق ل ڤێرێ نە پەیڤ بوون، بەلکو ململانێیەکا ئەبەدی بوو ل سەر مان و نەمانێ. من هەست ب سۆتنەکا پیرۆز دکر، وەك بێژی مە هەردوکان بڕیار دابیت پێکڤە د ناڤا وێ هەناسەیا کورت دا ببینە خۆلەمێش و ل بای بهێینە بەلاڤکرن. وی ب هەموو قەوارەیێ خۆ ڤە، ئەز بەرەف قەولێ هەبوونا خۆ ڤە کێشام، وەك بێژی دڤێت هەردو ڕوح ببنە ئێك پارچە ئاخ. دەمێ کو هەناسە کورت دبیت و لێدانێن دلی دبنە ئێك ئاواز، ئەڤە وەك “میعراجەکا” زەمەنییە. وێ گاڤێ، نە دەمژمێر دمینن و نە ژی دیوارێن ژۆرێ. ب تنێ بێهنا دلێ سۆتی و گەرماتییا خوینێ یە کو دبیتە ناسنامە. مرۆڤ هەست دکەت ئەڤە مرنەکە، مرنەکا وەسا جوان کو مرۆڤی دڤێت هەتا ئەبەد تێدا بمینیت. “ئەز” د ناڤ “وی” دا دمرم؛ دا “ئەم”ەکا نوی بئافرینین.
لەش، ب تنێ پرەکە دا کو دو غەریب ل جیهانەکا تاری، ئێکودو ناس بکەن و پەنایێ ببەنە بەر نیشتمانەکێ ڕاستەقینە.