ل گەل گوهۆڕینێن نوو و پێشبینییا سۆپرایزان جیهان هەموو چاڤەڕێ یە
بڕیارە ئەڤرۆ دەست ب هەڤڕكیێن چاپا 23 یا قارەمانییا كۆپا جیهانێ یا فوتبۆلێ مۆندیالا 2026ێ بهێتە كرن و ئەڤە دێ بەردەوامبیت هەتا 19 مەها بهێت كو دهێتە هژمارتن بۆ جارا ئێكێ د دیرۆكا قارەمانیێ دا سێ وەلات دێ مێڤانداریێ كەن ئەو ژی هەر ئێك ژ ئەمریكا، كەنەدا و مەكسیك و چاپا ئێكێ یە كو زوورترین هەلبژارتی پشكدارن ئەوژی دگەهنە 48 هەلبژارتیان، دیسان دگەل دانانا چەند بڕیارێن نوو و گوهۆڕینێن نوو پێشبینییا سۆپرایزان ژی دهێتە كرن.
سیستەمێ قارەمانیێ
مۆندیالا ئەڤ سالە دێ گوهۆڕینێن مەزن و بەرچاڤ بخوەڤە بینن ئەوا هەر 48 هەلبژارتی هاتینە بەلاڤكرن ل سەر 12 كۆمان و هەر كۆمەك چار هەلبژارتینە، خودانێن ڕێزێن ئێكێ و دویێ ئێكسەر دێ دەربازبنە قووناغا 32ێ د بەرانبەردا هەشت باشترین هەلبژارتیێن ڕێزێن سێیێ دهێن، سەرجەمێ گشتی هەتا فینالێ دگەهنە 104 یاری.
تۆمارا قارەمانا
د 22 چاپێن بۆری یێن مۆندیالێ دا هەشت هەلبژارتیێن جیهانی شیاینە ناسناڤی ب دەستخوە ڤەبینن، هەلبژارتیێ بەرازیل پترترین تیمە ناسناڤ دەستڤە ئینایە و دووماهی هەلبژارتی ئەرجەنتین بوویە قارەمان، ل دووڤ خشتەیێ خوارێ قارەمانێن مۆندیالێ بڤی شێوەیی نە.
– بەرازیل پێنج ناسناڤ، 1985- 1962- 1970- 1994- 2002.
– ئەلمانیا چار ناسناڤ، 1954- 1974- 1990-2014.
– ئیتالیا چار ناسناڤ، 1934- 1938- 1982- 2006.
– ئەرجەنتین سێ ناسناڤ، 1978- 1986- 2002.
– فرەنسا دو ناسناڤ، 1998- 2018.
– ئۆرۆگۆایی دو ناسناڤ، 1930- 1950.
– ئنگلتەرا ئێك ناسناڤ، 1966.
– ئیسپانیا ئێك ناسناڤ، 2010.
نووترین یاسایێن فیفایێ بۆ مۆندیالێ
دەست لسەر دەڤی قەدەغەیە
ب هیچ شێوەیەكێ نابیت یاریزان دەمێ ئاخڤتنێ دگەل یاریزانێ تیما هەڤڕك یان دادڤانان دەستێ خوە بدانیتە ل سەر دەڤێ خوە، ئەڤچەندە ژی بەر وێ یەكێ یە دا سنۆرەك بۆ ئاخڤتنێن كرێت و ڕەكەزپەرستیێ بهێتە دانان، ژبەركو نە كامیرە و نە شارەزایێن لڤینا دەڤی نەشێن شرۆڤەبكەن، دادڤان مافێ هەیی كارتا سۆر ئێكسەر بدەتە یاریزانی.
نەڕازیبوونا ب كۆم یا یاریزانان
فیفایێ ماف دایە دادڤانێ یاریێ كارتا زەر بۆ ئەوان یاریزانان بدەت ئەوێن دەمێ هەر فاولكەكێ یان شاشیەكێ ب كۆم نەڕأزیبوونا خوە دژی بڕیارا دادڤانی دیاردكەن، بتنێ كاپتنێ تیمێ مافێ هەیی گەنگەشێ دگەل دادڤانی بكەت.
سیستەمێ ڕاكرنا كارتێن زەر
ژبەر زێدەبوونا هەلبژارتیێن پشكدار بڕیار هاتیە دان ئەو كارتێن زەر یێن د قووناغا كۆمان دا دهێنە دان، بۆ قووناغێن دووماهیێ یێن چارێك دووماهیێ هەتا فینالێ بهێنە ڕاكرن، پێخەمەت یاریزان بۆ یاریێن ئێكلاكەر بەرهەڤبیت.
دەستهەلاتێن ڤارێ هاتە زێدەكرن
دەستهەلات بۆ دادڤانێن ڤارێ VAR هەیە دۆڤچوونا هندەك حالەتێن دی بكەت وەكو كۆرنەرێ، یان دۆڤچوونا كارتا زەر هاتیە وەرگرتن، هەكە دادڤان یێ شاش بیت دێ هێتە ڕاستڤەكرن.
بەرهنگارییا كۆشتنا دەمی
یاسایەكا گرنگە د مۆندیالێ دا، هەكە دادڤانی دیت یاریزان بێ ئەگەر یێ یاریێ گیروودكەت و دەمی دكۆژیت، تایبەت دەمێ یاریزان هاڤێتنا تەپێ ل سەر هێلا یاریگەهێ بۆ ناڤ یاریگەهێ دا گیروو دكەت، یان تەپا گۆلپارێزی، دێ پێنچ چركە بۆ هێنە دان هەكەر بۆری دێ تەپا بۆ تیما هەڤڕك هێتە دان، هەروەسان دەمێ گوهۆڕینا یاریزانەكی بتنێ دەهـ چركە هاتینە تەرخانكرن بۆ گوهۆڕینێ، هەكە ژ ڤێ دەمی بۆری دادڤان دێ یاریێ بڕێڤەبەت و ناهێلیت پێگهۆڕ بهێتە دناڤ یاریگەهێ دا هەتا تەپە د ڕاوەستیێت.
باشترین هەشت تیمێن ڕێزا سێیێ
لدووڤ ڕێنمایێن قارەمانیێ ئەو هەر12 هەلبژارتیێن ڕێزێن سێیێ دكۆمێن خوە دا دهێن دێ هەشت ژ وان لدووڤ یاسایا پترترین خودان خال دەربازبنە قووناغا 32ێ، ئانكو دێ ڕێزبەندییا هەر 12 هەلبژارتییان لدووڤ خالێن وان هێتە كرن ئەوێن دكۆما خوە دا بدەستڤەئینایین، هەكە خالێن دو هەلبژارتییان هندی ئێكبن دێ دۆڤچوونا جوداهییا گۆلێن هەین هێتەكرن، هەكە ئەوژی وەكو ئێكبن دێ دۆڤچوونا یارییا پاقژ هێتەكرن ئانكو خودان كێمترین كارتێن زەر و سۆر كو لدووڤ سیستەمێ كارتا زەر ئێك خال هێتە كێمكرن، كارتا سۆر پشتی دو كارتێن زەر سێ خال كێمكرن، كارتا سۆر چار خال كێمكرن، كارتا زەر و دووڤدا یا سۆر پێنچ خال هێنە كێمكرن ژ سەرجەمێ یێن دكۆما خوە دا هەی، هەكە ئەڤ هەڤكێشە یا بەردەوامبیت دێ فیفا نەچاربیت لدووڤ ڕێزبەندییا پێشتری مۆندیالێ یا هەلبژارتییان بچی تكا كیش هەلبژارتی باشترە د ڕێزبەندیێ دا، ئەڤ بڕیارە پێگوهۆڕێ بڕیارا مۆندیالێن پێشتربوو ئەوا ب شیوەیی پشككێشان دهاتە كرن.
