موستەشارەكی نەهـ هزار دینارێن هینگێ بۆ ئازادكرنا مە ژ زیندانـێ وەرگرتن و ئەم ئازاد نەكرین
دیدار: رەمەزان دەشتمری/ زاخۆ
5-5
ئەز دگەل ئەوان بۆ باژێرێ بەغدا هاتم و ئەز بۆ گەراجا شیمال گەهاندم؟ ئەوبی دگەل ترومبێلەكا تەكسی ژ گەراجا بەغدا بۆ گەراجا شیمال یا باژێرێ مووسل هاتین.
دەمێ گەهشتین گەراجا مووسل من بەرێ خۆە دایێ ترومبێلەكا تەكسی یا نیسان یا خەلكێ زاخۆ یا ل گەراجێ یە و ل هیڤا دوو نەفەران مایە. من گوتە ئەوی شوفێری هەڕە داب ۆ زاخۆ بچین ئەز دێ حەقێ جهێ ئەڤان هەردوو نەفەران دەم. ئەڤێ شوفێرێ گوت: سوپاس بۆ خودایێ مەزن مادەم تو ژ زیندانێ هاتی بەردان و ئەڤە تو مێهڤانێ منی و هەنا سیاربە دا بچین و تو چ حەقی ژی نادەیی. ب كوتەكی من حەقێ خۆە یێ نەفەری دا و ل دەمژمێر دولزدەیی شەڤێ ئەڤێ ترومبێلا تەكسی ئەز گەهاندم بەردەمێ مالێ، دەمێ ئەز ژ ترومبیلا تەكسێ هاتیم خوار و من قەستا بەردەرگەهێ مالێ كری و زەنگا دەرگەهی لێدایی كەسێ دەرگەهـ ل من ڤەنەكر و دوو یان سێ جاران من زەنگا دەرگەهێ لێدا و پاشی من دەرگەهـ قوتا ل دەمەكێ دایكا من هات هو ب ترس دەرگەهێ حەوشێ ڤەكر و ئەوێ وەسا تەخمین دكر و ئەڤە ڕەشكێن ئەمنا زاخۆنە جارەكادیتر یێن هاتین بەردەرگەهی و من بەرێ خۆە دایێ مال بەردایی و بێ خودانە و یا ژ مروڤان هاتی ڤالەكرن، دەمێ دەرگەهـ من خۆ هاڤێتە دایكا خوە و هەمبێزكر و دایكا من نەزانی ئەڤە وەلیدێ كوڕێ وێ یە یێ هاتی بەردان ئەوی وەسا تەخمینكر ئەڤە زەلامێن ئەمنێ نە یێن هاتین دێ خانی خراب كەن. ل ئەوی دەمی هەتا روناهیا حەوشێ ژی ڤەمراندبین. پشتی زانین ئەڤە ئەزم سەر ژنوی برا و خویشك و كەس و كارێن مە ل مە ڤەحەویان و مە ئێك و دوو هەمبێزكر، منژی پرسیار ئەوان ئەوان كا بوچی هوسا دامایەی و مال هەوە بەردا بوو، وەلیدی ب چاڤێن كزگریوك ڤە گوت: دایكا من گوت كوڕێ من: دائیرا ئەمنا زاخۆ ب ڕێكا موختارێ تاخی دزانی كو مالا مە ب تنێ كەسەك زیندانی یێ هەیی. ڤێجا بەری چەندەكێ مالەك وەك كرێدار بۆ ئەڤی تاخێ كاوە ل ئەوێ كولانا ل پشت مالا مە ئاكنجی بوون. ئەوان ژی ئیكە زیندانی هەبوو. دەمێ كوڕێ ئەوان ئازادبووی و بۆ مالێ هاتی و چەند گولەیێن كلاشینكوفێ هاڤێتن و دائیرا ئەمنا زاخۆ وەسا تەخمینكرن كو دەنگێ ئەوان گولەیان یێ ژ مالا مە دهێت، ئەو بوو هەر دئەوێ شەڤێ دا مەفرەزا ئەمنێ و دگەل شەڤەرێ و ب ڕێكا موختارێ تاخێ بۆ سەر مالا مەدا هاتن و گوتنە مە: هەوە گولە یێن هاڤێتین. ل ئەوێ شەڤێ ئەم گەلەك یێن ترساندین و دەڤێ شەفەرێ یێ ئێخستی دوارێ حەوشێ و دیوار یێ دەرزاندی. دایكا من گوت: من دەستدا قورئانێ ئەز چووم بەراهیكا بەرپرسێ مەفرەزا ئەمنێ و گوتێ: ب ئەڤێ قورئانی دەنگێ گولەیان ژ مالا مە نەهاتیە و هێشتا كوڕێ مەژی نەهاتیە بەردان. ئەوی بەرپرسێ مەفرەزا ئەمنێ پالەك ل دایكا من ڕادا و هاڤێت و ئەو قورئان ژی ژناڤ دەستێن مندا هاڤێت خوار و هیچ ڕێز ل من و قورئانێ نەگرت. ئەوبی هەما خودایێ مەزن وەسا چێكربی برایێ من حەجی عەمەری كەسەكی لەشكرێ ئیراقێ دوستێ ئەوی بی و ل ئەوێ شەڤێ مێهڤانێ مالا حەجی عەمەری بی ئەو ب جل و بەرگێن لەشكری چوو دگەل بەرپرسێ ئەمنێ ئاخفت و گوتێ: ئەڤێ مالێ هیچ گولە نەهاڤێتنە و ئەز دیدەڤانم و ناسنامە خۆە ژی یا لەشكری نیشا ئەوان دا هەتا كو شیاین و باوەریێ بۆ ئەوێ مەفرەزا ئەمنا زاخۆ چێكەن و هەتا خانێ مە خراب نەكرین.
زیندانیێ سیاسی وەلید ڕەشید گوت: پشتی دوو ڕۆژان ژ ئازادكرنا من ژ زیندانێ ئەمنا زاخۆ جابا من ب ڕیكا موختارێ تاخێ هنارت كو ئەز سەرەدانا ئەمنا زاخۆ بكەم. دەمێ ئەز بۆ دائیرا ئەمنا زاخۆ چویم ل ئەوی دەمی میلازم دحام نوبەداربی و گوتە من: دڤێن هەر حەفتی ڕۆژەكێ تو بۆ دائیرا ئەمنێ بێ و ل سەر ئەڤێ تۆمارێ ئیمزا بكەیی. ئەز ژی نەچاربووم كو حەفتیانە داب و دائیرا ئەمنا زاخۆ ب دل ب ترس دا چم و ل سەر ئەوێ تومارێ ئیمزا بكەم و جارەكادیتر بۆ مالێ ڤەگەرم، ئەوبی هەتا سەرهلدانا بهارا سالا 1991ی مللەت ئازادبی و خەلك ژ بن زولم و زورداریا حكومەتا ئیراقێ یا ئەوی سەردەمی هاتی ڕزگاركرن و حكومەتا هەرێما كوردستانێ هات دامەزراندن و دام و دەهێن حكومی هاتن ڤەكرن، ئەو بوو كومەلا زیندانیێن سیاسی دگەل وەزارەتا شەهیدان هاتڤەكرن و خزمەتا زیندانیێ سیاسی هاتكرن، ئەز بیم ئەندامێ لیژنا زاخۆ یا زیندانێن سیاسێ و هەتا نوكە ل سەر كار خزمەتا زیندانێن سیاسی ل سنورێ ئیدارا سەربخویا زاخۆ بەردەوام د ئەركێ داینە و هەر وەسا وەك خانەنشینێ زیندانێ سیاسی هاتیمە وەرگرتن.
