ڕەوشەنبیریا ئافرەتێ بنیاتێ پێشکەفتنا جڤاکی یە
راپورت، ڕێژین نهێلی:
ماموستایەکێ زانکۆیێ دیار کر کو ئافرەت وەکو پشکەکا هەرە کاریگەر دهێتە هژمارتن، چونکی ئەو پتر ژ ڕۆلەکێ دگێڕیت، ڕوژنامەڤانەکێ ژی گۆت؛ئافرەتا ڕەوشەنبیر، دشێت جڤاکەکێ پێشکەفتی ئاڤا بکەت، چالاکڤانەکێ ژی گۆت؛ هەردەمێ ئافرەت گەهشتە مافێن خۆ، دێ یەکسانی دناڤبەرا هەردو ڕەگەزان دا دروست بیت.
د. كاوه عەبدولعەزیز مامۆستایێ زانكویێ دیار کر کو ئافرەت وەکو پشکەکا ستراتیژی و هەرە کاریگەر د ناڤ هەر جڤاکەکێ دا دهێتە هژمارتن، چونکی ئەو پتر ژ ڕۆلەکێ دگێڕیت، ڕۆلێ وێ یێ هەرە مەزن ئینانا نڤشەکێ نوو، و خودانکرن و پەروەردەکرنا زارۆکانە و گۆت؛ هەروەسا ڕۆلێ بڕێڤەبرن و سەروبەرکرنا کاروبارێن مالێ و خێزانێ دکەڤیتە سەر ملێن وێ.
لدور رهوشهنبیری و رول و كاریگهریا ئافرهتێ، ههیفا دۆسكی، سهرنڤیسهرا گوڤارا سڤوره دیار کر کو ئافرەت ئێک ژ گرنگترین چینێن جڤاکییە، ئەو نەک بتنێ نیڤا جڤاکییە، بەلکو جڤاک هەموویە، چونکی خێزانێ و جڤاکی بڕێڤەدبەت و پەروەردە دکەت و گۆت؛ سەرەڕای ڤێ چەندێ ژی، ئافرەتا ڕەوشەنبیر و پێگەهشتی، دشێت جڤاکەکێ ڕەوشەنبیر و پێشکەفتی ئاڤا بکەت، ڕەوشەنبیری چەکەکێ ب هێزێ ئافرەتا سەرکەفتی یە.
وارڤین عەبدولرەحمان کچەکا چالاکڤانە دیار کر، گەلەک یا فەرە کار لسەر لادانا وان ئاستەنگ و ڕێگریان بهێتە کرن یێن کو دبنە بەربەست ل هەمبەر پێشڤەچوونا ئافرەتێ و گۆت؛ هەردەمێ ئافرەت گەهشتە مافێن خۆ، دێ هەڤسەنگی و یەکسانی دناڤبەرا هەردو ڕەگەزان دا دروست بیت.
هەیفایێ دیار کر ژی، ئەو ئافرەتا لسەر بنیاتەکێ ب هێز و ڕەوشەنبیر و ئەکادیمی ئاڤا دبیت، دشێت ڕۆلەکێ کارا د جڤاکی دا بگێڕیت و نڤشەکێ تێگەهشتی و پێگەهشتی دروست کەت و گۆت؛ ئافرەتا ڕەوشەنبیر دشێت پەیاما دروست ژلایێ نەتەوەیی، پەروەردەیی و جڤاکی ڤە بگەهینیت و ببیتە نموونەیا جڤاکێن جیهانی.
مامۆستایێ زانکۆیێ زێدەتر گۆت؛ ژلایەکێ دیڤە وەکو ڕەگەزێ بەرامبەر زەلامی، پشکداریێ د ئاڤاکرنا جڤاکی دا دکەت و هەکە یا ڕەوشەنبیر بیت و خودان باوەرنامە ژی بیت دێ رۆلەکێ گرنگتر و کاریگەرتر د جڤاکی دا گێریت.
هەیفا دۆسکی گۆتژی؛ ئەم هەموو بۆ وێ یەکێ کار دکەین دا کو بشێین جڤاکەکێ ڕێکخستی، پاقژ و سەردەمیانە ئاڤا بکەین، ئەڤە ژی بۆ شیان و ڕەوشەنبیریا ئافرەتێ ڤەدگەریت، چونکی ئافرەتا خودان باوەری و پلان، ب ژیری و ڕێیێن ساخلەم کار دکەت.
وارڤین چالاکڤانا جڤاکی د بەردەوامیا ئاخفتنێن خۆدا گۆت؛ پشکداربۆنا کارا یا ئافرەتێ د هەموو بیاڤان دا ب تایبەت د گەشەپێدان و پێشخستنا جڤاکی دا، بنیاتێ ئاڤاکرنا جڤاکییە، چونکی هەر دەمێ پشکداریا ئافرەتێ د ئاستەکێ بلند دا بیت، دێ پێشکەفتنا وەلاتی پتر لێ هێت.
د. کاوە دیار کر کو جاران ئافرهتان وەک ژن و زەلام کار دکر هەتا ڕولێ خوه د شوڕهشێن كوردی دا دیتیە، نوكه ژی ب شێوهكێ دی یا خزمهتا جڤاک و نهتهوا خۆ دكهت بتایبهت د پرسێن سیاسی و راگههاندنێ دا.
ماموستایێ زانکۆیێ د بەردەوامیا ئاخفتنێن خۆدا دیار کر کو پارتێن کوردی، بتایبەت پارتی دیموکراتی کوردستان و حکومەتا هەرێما کوردستانێ، پێخەمەت ڕاگرتنا یەکسانیا ڕەگەزی دناڤ هەموو سازیان دا پشتهڤانن دا کو ئافرەت پتر ڕۆلێ خۆ ببینیت و گۆت: ئەو ئافرەتێن شیایین ڕۆلێ خۆ یێ کارا دیار بکەن، ئەو بووینە یێن کو د بیاڤێ زانست و زانینێ و ئاڤاکرنا کەسایەتییا خۆ دا کار کری، و ب ڤی شێوەی ئافرەتا کورد شیایە ڕۆلەکێ کاریگەر د ناڤ جڤاکی دا بگێڕیت.
