ئەو تابلۆیێ تابلۆ دکێشائەو تابلۆیێ تابلۆ دکێشا
مەتین وەرمێلی
نزانم چ دەستێ من گرت و ئەز کێشامە دەڤ وێ، ئەو ئێکەم جار بوو ئەز ل بەرامبەر بڕاوەستم. ئەو ل ژۆرا نیگارکێشیێ ل بەر ڕوناهییەکا کێم بوو، بەژنا وێ یا زراڤ و دێمێ وێ یێ ئەسمەر وەک مۆمەکێ چار رەخێن خۆ ڕوهن کربوون. ب وان چاڤێن ڕەش یێن کو د ناڤ دا جیهان هەمی بێدەنگ بووی. ل قوماشێ تابلویێ دنێڕی، ب تبلێن خۆ یێن نازک فرچە راکر دا وێنەیەکی بکێشیت، دگەل دیتنا وێ ئەز د جهێ خۆدا هشك بووم؛ من هەستکر ئەز ب خۆ بوویمە تابلۆیەک و ئەو یا هەستێن من دکێشیت.
یا ڕاست ئەو ب خۆ ژی تابلۆیەکا زندی بوو کو خودێ کێشای، و وێ ژی تابلۆ دئافراندن. من ژی وەکی سەوداسەرەکی ل دێمێ وێ دنێڕی، هەر جارا وێ فرچە د ڕەنگێ سۆری وەرددا، من هەست دکر یا خوینێ ژ دلێ من دکێشیت. من دزانی نە بتنێ یا وێنەیەکی دکێشیت، بەلکو یا پارچەکێ ژ ڕوحا من… ژ ناخێ من دکێشیت و تێکەلی ڕەنگێن تابلۆیا خۆ دکەت. هەر هێلەکا وێ دکێشا، دەنگێ هەوارێن عەشقێ ژ بن فرچەیی گوهێن من تژی دکرن، و هەر وەک بێژی ئەو نە ڕەنگن، بەلکو ئەو «هەناسەیا» منە یا دکەفتە بەر فرچەیێن وێ.
ئەو چاڤێن ڕەش، وەک دو زەریایێن بێ بن بوون. هەر جارا چاڤێن وێ ل تابلۆیی دکەفتن، من هەست دکر پارچەک ژ خەمێن من یا دکەڤیت. نە دەنگ ژ من دهات و نە من دزانی ئەز ل کیرێ مە. بتنێ من دزانی کو ڕوحا من ئێدی نە یا منە، یا بوویە ڕەنگەک و د ناڤ تابلۆیێ دا یا دهێتە نەخشاندن. وێ ڕەنگ تێکەل دکرن، بەلێ تێکەلکرنا ڕەنگان نەبوو، بەلکو تێکەلکرنا ژیانا من بوو د ناڤ دەستان دا.
دەما وێ تابلۆ تەمام کری و بەرەف من ڤە زڤڕی، ب وان لێڤێن هنگڤین بۆ من گڕنژی؛ ل وێ گاڤێ من هەست کر ئێدی ئەز ب خۆ بوویمە ئەو پارچە قوماشێ د ناڤ دەستێن وێ دا. ژیانا من، ڕەنگ و فرچە، هەمی بوونە هیڤییا دەستێن وێ؛ چونکی من دزانی هەر تشتێ ئەو ڕەنگ بکەت، دێ بیتە جوانترین تابلۆیا ژیانا من، ژبەرکو یا تژی بوو ژ جوانییا هەستێن وێ، ئەو جوانییا وێ ب ناخێ خۆ ڕەنگکری و ڕوح تێکری.
