تۆڕێن جڤاکـی کـاریگـەریەکـا خـراب ل سـەر دەروونێ مـرۆڤی هـەیە
سوبحان سەید
ڕاوێژکارەکێ دەروونی د دیدارەکێ دا بۆ ڕۆژنامەیا ئەڤرۆ دیار کر کو تۆڕێن جڤاکی کاریگەریەکا خراب ل سەر دەروونێ مرۆڤی هەیە بێی کو مرۆڤ هەست پێ بکەت و گۆت؛ پێدڤیە ئەم ڕۆژانە ب کێمی دەمژمێرەکێ مۆبایلێ ژ خۆ دوور بکەین و بکارنەئینین.
ڕاوێژکارێ دەروونی سوبحان سەید، د دیدارەکێ دا بۆ ڕۆژنامەیا ئەڤرۆ دیار کر کو تۆڕێن جڤاکی کاریگەریەکا خراب ل سەر دەروونێ مرۆڤی هەیە بێی کو مرۆڤ هەست پێ بکەت و گۆت؛ چونکی توڕێن جڤاکی دبنە ئەگەرێ وێ چەندێ کو ئەم نەخۆشترین ڕۆژێن ژیانا خۆ ب خۆشترین و جوانترین دەمێن خەلکی هەڤبەر بکەین، ئەڤ چەندە ژی دبیتە ئەگەرێ وێ چەندێ کو ئەم هەست ب نە ئارامیێ بکەین و دەروونێ مە تێك بچیت و هەست ب کێماسیێ بکەین.
سوبحان گۆتژی؛ گەلەك جاران ئەم ل تۆڕێن جڤاکی ب تایبەت ل ئینستگرام و فێسبۆکی هندەك کەسان دبینین دبنە جهێ دل ئێشانا مە، چونکی ئەم وان کەسان ژ خۆ کەیفخۆش تر و بەختەوەرتر دبینین، ژبەر هندێ ئەم گازندان دکەین و پرسیارێ ژ خۆ دکەین و دبێژین بۆچی ژیانا من ژی نە وەکو یا ڤان کەسانە.
ڕاوێژکارێ دەروونی زێدەتر گۆت؛ پێدڤیە ئەم بزانین کو ئەوا ئەم ڕۆژانە د تۆڕێن جڤاکی دا دبینین بتنێ ب ڕێژا 1٪ێ ڕاستیە، ئەوا دی هەموو دیمەنێن سەرڤەنە، دیارکرنا جوانی و خۆشیانە، چونکی خەلك بتنێ وێنەیێن خۆشی و سەرکەفتنێن خۆ ل تۆڕێن جڤاکی بەلاڤ دکەن، و نەخۆشی و شکەستنێن خۆ د ڤەشێرن و بەلاڤ ناکەن.
سوبحان سەید زێدەتر گۆت؛ داکو تۆڕێن جڤاکی کاریگەریەکا خراب ل سەر دەروونێ مە نەکەن، پێدڤیە ئەم ڕۆژانە ب کێمی بۆ دەمێ دەمژمێرەکێ مۆبایلێ ژ خۆ دوور بکەین و بکارنەئینین و ل جهێ وێ ئەم دەمی لگەل خۆ و خێزانا خۆ ببورینین، دا ئەم تام بکەینە خۆشیا درست یا ژیانێ.
ڕاوێژکارێ دەروونی د بەردەوامیا ئاخفتنێن خۆدا گۆت؛ پێدڤیە ل تۆڕێن جڤاکی ئەم دووڤچوویا کەسێن ئەرێنی بکەین، نەکو وان کەسێن نەرێنی یێن کو کاریگەریێ ل سەر دەروونێ مە دکەن کو ئەم هەست ب بێزاریێ و کێماسیێ بکەین.
