گوستیرا بابۆیە
سەدیق حامد
د جانێ كەنەیەكا تەر دا
یا بێ دەستی..
یا زارۆكی
تێشتەگەه بوو
دلێن كوچكۆك
گەهشتن ئێك
ل رەخ مالان
ل بەر سینگێ
ئەوی گوندی
ب سەر هات و..
ب سەربۆری
دگەلەك جارا دا..
كو؛ وێران بووی
یاریێن جاران
ب بیرهاتن
بۆ خۆ دكرن
ب هەستەكێ زارۆكیێ
خانیێن نوی ئاڤاكەن
ئاخا پیرۆز..
ئەوا تێكهەل
ل گەل خۆلیێ..
و بەرێ سۆتنی
دهلكۆلان
ژ نشكەكێ ڤە..
لێك خربوون
قولیزێنەك كەتە ناڤدا
پاشی پێكڤە
ل سیریا دان
كرن قێری
گۆتن (تبلن)!
كرۆ!.. تبلێن مرۆڤانن!
نێ هێژتا..
گوستیرەك یا تێ
پاشی زارۆكەكی
دەنگێ خۆ راهێلا
گۆتی: گوستیرا بابۆیە!
ولا گوستیرا بابۆیە!
ولاهی تبلا بابۆیە!
ئەوی بازدا..
یاری هێلا
هەواركی چوو
هەمیان یاری بەتال كرن
ل دویڤ را چوون
دا گوستیرێ
دیاری بكەن
بۆ دەیكا ژار.
