هەر كەڤالەكی چیرۆكەكا سەرنجڕاكێش و ڕامانەك ل پشت هەیە
بێوار حەمدی
شێوەكارێ گەنج (محەمەد نەورۆز) د دیدارەكێ دا بۆ رۆژنامەیا ئەڤرۆ گۆت: دژیەكێ بچووك دا من حەزژ كارێ هونەری ب تایبەت چێكرنا كەڤالان دكر و ل دەستپێكێ ب رێكا ڤیدیۆیێن یوتیۆبی من خۆ فێركر و ژبەركو حەزا من بۆ شێوەكاری گەلەك بوو من بەردەوامی دایێ و هێدی هێدی خۆ پێگەهاند، بۆ زانین من هونەر ب شێوەیەكێ ئەكادیمی نەخواندیە، بەس بتنێ پشكداری خۆلەكا سێكج و ڕەنگان بوویمە.
هەروەسا گۆت: پتریا كەڤالێن ئەز چێدكەم وێنەیێن سروشتێ جوانێ كوردستانێ نە، هندەك جاران دەستڕەنگینی و خۆشنڤیسی یە، چنكو خەلك حەزژ كەڤالێن سرەشتی و خۆشنڤیسا ئاینی دكەن و كەڤالێن هەموو شێوەكاران بۆ من سەرنجڕاكێشن، چنكو هەر كەڤالەكی چیرۆكەكا سەرنجڕاكێش و ڕامانەك ل پشت هەیە و هەتا نوكە بتنێ من سێ كەڤالێن خۆ قرۆتینە، كو بهایێ وان دناڤبەرا (40) هەتا (60) هزار دیناران دا بووینە و هەردەم ئەز دبێژم هەر كارەكێ مرۆڤ بكەت و ژدل حەزژێ بكەت بێگۆمان دێ سەركەفتنێ ب دەستڤە ئینیت، لەورا گرنگە مرۆڤ یێ بەردەوام بیت و ل گەل پێشڤەچوونێ خۆ بگونجینیت.
