سترانا من یا نوو دێ شێت دانوستاندنێ دگەل گوهداران دروست كەت
رەمەزان زەكەریا
سترانبێژ (ئالان جەمال) پشتی دەمەكی ژ بێدەنگیێ، بەرهەمەكێ نوو ب شێوازێ دوقۆلی دگەل سترانبێژ(سەركار پەمۆ) ب ناڤێ (هۆشم نەما) ب شێوازێ ڤیدیۆ كلیپ بەلاڤكر و بگۆتنا وی هندەك سترانێن نوو دڕێ دا هەنە.
ئالانی، د دیدارەكێ دا بۆ رۆژنامەیا ئەڤرۆ گۆت: نوكە یێ دڵخۆشم كو پشتی (5) سالان من سترانەكا نوو بەلاڤكری، هەروەسا ئەڤ سترانە بۆ من بتنێ سترانەك نینە، بەلكو ئەزموونەكا هەست و هزركرنێ یە كو دەمەكە د ناڤ من دا هاتییە پەروەردەكرن و سترانا من یا نوو یێ كو ب شێوازێ دو قۆلی دگەل سترانبێژ (سەركار پەمۆ) من بەلاڤكری پەیڤێن وێ ژلایێ من ب خۆ ڤە هاتینە نڤیسین، هەروەسا دابەشكرن و رێكخستنا مۆزیكا وێ ژلایێ (سوهراب جول) ڤە هاتییە ئەنجامدان ب شێوازەكی كو ڕحا سترانێ پاراستییە و ڕەنگەكێ تایبەت پێ دایە دگەل هندێ ژی دا ڤیدیۆ كلیپێ (محەمەد ئیدریس) كارێ دەرهێنانێ بۆ كرییە.
