سەرەدانا سەرۆکێ هەرێمێ گرنگیەکا مەزن بۆ رۆژئاڤایێ کوردستانێ هەیە
ب، سهرجان مەحمود:
چاڤدێرێن سیاسی دیار دکەن سەرەدانا سەرۆکێ هەرێما کوردستانێ د ڤێ رەوشا هەستیار دا بۆ رۆژئاڤایێ کوردستانێ گەلەک گرنگە، چونکی هەرێما کوردستانێ رۆلەک مەزن بۆ رێککەفتنا هەسەدێ و شامێ گێرایە و هەرێما کوردستانێ هەردەم پشتەڤانێ رۆژئاڤایێ کوردستانێ یە.
زەکەریا عەفرینێ چاڤدێرێ سیاسی یێ خەلکێ رۆژئاڤایێ کوردستانێ دیار کر، دەمێ مەترسی ل سەر رۆژئاڤایێ کوردستانێ هەبوون، هەرێما کوردستانێ ب تایبەتی ژی سەرۆک بارزانی و سەرۆکێ هەرێما کوردستانێ بەرێز نێچیرڤان بارزانی بەردەوام ل گەل شامێ د پەیوەندیێ دا بوون و داخواز ژ شامێ کربوون کو رێیا چارەسەریێ بگریتە بەر و ژ ئەنجاما بزاڤێن بەردەوام یێن هەرێما کوردستانێ ژی رێککەفتنا شامێ و هەسەدێ هاتە کرن و گۆت: (راستە گەلەک کەس دبێژن رێککەفتن ب دلێ کوردان نینە، لێ هەر چاوا بیت پێنگاڤەک گەلەک گرنگ بوو بۆ مافێن کوردان و ئەڤرۆکە ژی سەرەدانا سەرۆکێ هەرێما کوردستانێ پشتەڤانیەکا گەلەک باشە بۆ مافێن کوردان و ئەز وەسا دبینم دێ سەرۆکێ هەرێما کوردستانێ جارەکا دی داخواز ژ شامێ کەت کو رێزێ ل ماف و داخوازیێن گەلێ کورد ل سووریێ بگریت).
ناڤهاتی ئەو یەک ژی دیار کر، پشتەڤانیا بەردەوام یا هەرێما کوردستانێ بۆ رۆژئاڤایێ کوردستانێ وەسا کریە شام هندەک ژ مافێن کوردان قەبوول کریە، نها بابەتێ زمانێ کوردی تا رادەیەکێ ئێکلا بوویە و هەروەسا دبیت د بابەتێن دی دا ژی رێککەفتنەکا باش بهێتە کرن و کورد دشێن ل سووریێ بگەهنە گەلەک مافێن خوە.
نەشەت محەمەد چاڤدێرێ سیاسی یێ خەلکێ رۆژئاڤایێ کوردستانێ ژی دیار کر، هەرێما کوردستانێ پەیوەندیێن گەلەک باش ل گەل وەلاتێن جیهانێ هەنە، دەمێ مەترسی ل سەر رۆژئاڤایێ کوردستانێ هەبوون مە دیت کا چاوا سەرکردایەتیا هەرێما کوردستانێ ب هەموو شیانێن خوە پشتەڤانی ل رۆژئاڤایێ کوردستانێ کر و هاریکاریێن گەلەک باش ژی پێشکێشی خەلکێ رۆژئاڤایێ کوردستانێ هاتنە کرن، ژ بەر پشتەڤانیا بەردەوام یا هەرێما کوردستانێ ژی بێگومان گەلەک گوهۆڕین د هەلوەستێ تورکیا و سووریێ دا روو دان و د ئەنجاما وێ پشتەڤانیێ دا ژی شام نەچار ما رێککەفتنێ بکەت.
ناڤهاتی ئەو یەک ژی دیار کر، راستە رێککەفتنا هاتیە کرن گەلەک ب دلێ مە کوردێن رۆژئاڤایێ کوردستانێ نینە، چونکی وەکو کوردێن رۆژئاڤایێ کوردستانێ مە ژی دخواست هەرێمەکا کوردی یا وەکو هەرێما کوردستانێ ل سووریێ هەبیت، لێ دیارە مەرجێن سیاسی و رەوشا دەڤەرێ گونجای نەبوون، لێ نها ژی هەبوونا کوردان ب فەرمی ل سووریێ هاتیە قەبوول کرن و شامێ گەلەک داخوازیێن کوردان ژی قەبوول کریە، ئەو یەک ژی گەلەک باشە و گۆت: (هیڤیدارم هەموو هێزێن سیاسی یێن رۆژئاڤایێ کوردستانێ پێکڤە کار بکەن و هەماهەنگ بن، چونکی دهێتە چاڤەرێکرن کو گوهۆڕینێن گەلەک مەزن ل دەڤەرێ روو بدەن و بێگومان ئەو یەک دێ کاریگەریا خوە ل سەر رەوشا کوردان ل سووریێ ژی هەبیت و گرنگە کورد ل سووریێ خوە بۆ هەر گوهۆرینەکێ بەرهەڤ بکەن).
ل ئالیێ دی گەلەک ژ چاڤدێرێن سیاسی، چالاکڤانێن کورد یێن هەر چار پارچەیێن کوردستانێ، مامۆستا و رەوشەنبیرێن کورد ژی ب رێیا تۆرێن جڤاکی دیار کرن کو سەرەدانا سەرۆکێ هەرێما کوردستانێ بۆ شامێ گەلەک گرنگ و دیرۆکی بوو، چونکی نها رەوشەکا تایبەت ل دەڤەرێ هەیە و چاڤەرێی گوهۆڕینێن مەزن ژی دهێتە کرن و گرنگە کورد بۆ هەر گوهۆڕینەکێ بەرهەڤ بن، گەلەک گرنگە کو هەرێما کوردستانێ د رەوشا نها یا هەستیار دا پەیوەندیێن باش ل گەل شامێ هەبن، چونکی نها ل سووریێ رەوشەکا نوو هاتیە پێش و هەرێما کوردستانێ رۆلەک سەرەکی بۆ رێککەفتنا د ناڤبەرا هەسەدێ و شامێ دا گێرا و ب ڤێ سەرەدانێ ژی هەرێما کوردستانێ دشێت جارەکا دی داخواز ژ شامێ بکەت کو رێز ل مافێن گەلێ کورد بهێتە گرتن.
چاڤدێرێن سیاسی دیار ژی دکەن کو هەبوونا هەرێما کوردستانێ د ڤێ رەوشا هەستیار دا بۆ رۆژئاڤایێ کوردستانێ گەلەک یا گرنگە، رۆل و پێگەهێ هەرێما کوردستانێ دێ وەسا کەت کو شام نەچار بیت هندەک ژ داخوازیێن سەرەکی یێن گەلێ کورد ل سووریێ بجه بینیت و هەکە کورد ژی ل سووریێ ئێکگرتی بن و پێکڤە کار بکەن دێ شێن گەهنە گەلەک مافێن خوە، چونکی هژمارەک زێدە ژ وەلاتێن جیهانێ پشتەڤانیێ ل مافێن کوردان دکەن، راستە کوردێن رۆژئاڤایێ کوردستانێ ل چاڤ وان قوربانیێن مەزن کو دان نەگەهشتنە گەلەک ژ داخوازیێن خوە، لێ یا نها بۆ کوردان ل سووریێ هاتیە پێش ژی تشتەک کێم نینە و کورد دشێن ب خەباتا سیاسی بگەهنە گەلەک مافێن خوە، گرنگە هەموو هێزێن کوردی ل رۆژئاڤایێ کوردستانێ پێکڤە کار بکەن و هەرێما کوردستانێ ژی هەتا نها رۆلەک گەلەک گرنگ بۆ مسوگەرکرنا مافێن گەلێ کورد ل سووریێ گێرایە و سەرەدانا سەرۆکێ هەرێما کوردستانێ ژی دشێت ببیتە دەستپێکا قووناغەکا نوو بۆ کوردان ل سووریێ.
