ئەوێن پتر ژ زمانەکی دئاخڤن مەژیێ وان درەنگتر پیر دبیت
لدووڤ ڤەکۆلینەکێ کو ل کۆربەندێ کۆمەلا کۆمەلگەهێن ئەورۆپی بۆ زانستێن دەماران، کو د ئەڤ سالە دا هاتیە پێشکێشکرن، ئەو کەسێن پتر ژ زمانەکێ دئاخڤن، مەژیێ وان گەنجتر دیار دبیت.
ل سەنتەرێ باسک ل ئیسپانیا بۆ ژیری و مەژی و زمانان، ڤەکۆلینەک ل سەر نێزیکی دوسەد کەسان هاتیە کرن و تێدا دەرکەفتیە، ئەو کەسێن ب دو زمانان دئاخڤن، مەژیێ وان نێزیکی شەش سالان گەنجتر بوو ژ وان کەسێن ب تنێ ب ئێک زمان دئاخڤن، هەروەسا ئەو کەسێن ب سێ زمانان دئاخڤن، مەژیێ وان نێزیکی حەفت سالان گەنجتر بوویە ژ یێن دیتر، ئەو کەسێن ب چار زمانان د ئاخڤن، مەژیێ وان نێزیکی سێزدە سالان گەنجتر بوویە، ژ مەژیێ کەسێن دیتر.
هەروەسا مرۆڤ چەند زمانێن زێدەتر بزانیت، مەژیێ مرۆڤی گەنجتر دیار دبیت، لەوما فێربوونا زمانەکێ دی د ژییەکێ بچووکتردا و شارەزا بوون د وی زمانی دا، هاریکارە بۆ هندی کو مەژیێ مرۆڤی هێدیتر پیر ببیت.
ل گەل هندێ ژی، مەژیێ مرۆڤی ژ ملیار خانەیێن دەماری پێکدهێت کو پێدڤیە پەیوەندی پێکڤە هەبیت، ل گەل چوونا ژییێ مرۆڤی دا، پەیوەندیێن دناڤ مەژی دا لاواز دبن و د ئەنجام دا بیردانک و لەزاتیا هزرکرنێ ژی کێم دبن.
