شیرەتكارێ ئاسایشا نیشتمانییا ئیراقێ: گەنجێن ئیراقێ ل رووسیا و ئۆكرانیا دژی ئێكودو شەڕی دكەن
هزاران گەنجێن ئیراقی ژ بەر بێكاریێ و ژ پێخەمەت دەستڤەئینانا پارەی، چووینە د ناڤ رێزێن لەشكەرێن رووسیا و ئۆكرانیا دا. هەتا نها سەدان ژ وان هاتینە كوشتن و دەهان كەس ژی ب دیل كەفتینە. دامودەزگەهێن ئێمناهیێ یێن ئیراقێ ژی دەست ب دائێخستنا وان نڤیسینگەهان كریە یێن گەنج ڤەگوهاستینە دەرڤەی وەلاتی.
قاسم عەبوودی، شیرەتكارێ ئاسایشا نیشتمانییا ئیراقێ، د دیدارەكێ دا ئاشكەرا كر كو وان پرسەكا مەترسیدار یا هەواڵگری دیتییە، كو د وێ دا هزاران گەنجێن ئیراقی ژ بۆ پارەی چووینە د ناڤ رێزێن هەردو لەشكەرێن رووسیا و ئۆكرانیا دا و نها دژی ئێكودو شەڕی دكەن.
ناڤهاتی ئاشكەرا كر، دامودەزگەهێن هەواڵگری یێن ئیراقێ دیار كریە كو هندەك تۆڕ ب رێیا ئینتەرنێتی و ڤەكرنا نڤیسینگەهان ل پارێزگەهێن باشوورێ ئیراقێ، گەنج بۆ شەڕێ رووسیا و ئۆكرانیا راكێشاینە. ل گۆر خەملاندنان، هەژمارا وان ئیراقیێن د وی شەڕی دا، د ناڤبەرا سێ بۆ پێنج هزار كەسان دایە.
شیرەتكارێ ئاسایشا نیشتمانییا ئیراقێ رۆهن كر، هاندەرێ سەرەكیێ وان گەنجان باوەری نینە، بەلكو ژ بەر بێكاری و هەژاریێ بوویە، دیسان سۆزا هندەك پارەیێ زۆر و پێشكێشكرنا رەگەزنامەیێ ل وان هاتییە دان پشتی سالەكێ ژ پشكدارییا وان د شەڕی دا.
قاسم عەبوودی گۆت: «گەنجێن ئیراقی ل هەردوو بەرەیێن لەشكەرێن رووسیا و ئۆكرانیا شەڕی دكەن، ب مخابنی ڤە هەتا نها هەژمارەكا زۆر ژ وان هاتینە كوشتن و نها تەرمێن نێزیكی 200 ئیراقییان ل رووسیایێ نە».
هەروەسا باس ل وێ چەندێ كر كو هەژمارەكا گەنجێن ئیراقی ب دیل كەفتینە و گۆت: «نوونەرێ ئیراقێ ل مۆسكۆ سەرەدانا كەمپەكا دیلان كریە و ل وێرێ چاڤ ب هندەك دیلێن ئیراقی كەفتینە».
عەبوودی دوپاتكر، هێزێن هەواڵگری یێن ئیراقێ دەست ب هەوەكا بەرفرهـ كرینە ل سەر وان نڤیسینگەهان و داینە دائێخستن، هەروەسا چەند كەس ژی ل سەر وێ پرسێ هاتینە دەستەسەركرن.
هەروەسا دیار كر، د هەمان دەم دا حوكمەتا ئیراقێ ب رێیا پەیوەندیێن ناڤنەتەوەیی د دانوستاندناندایە ل گەل هەردوو وەلاتان، ب ئارمانجا ڤەگەڕاندنا وان وەلاتیێن ئیراقی یێن ب دیل كەفتین.
د دەمێ بۆری دا، بەلاڤبوونا چەندین گرتەیێن ڤیدیۆیی ل تۆڕێن جڤاكی، پشكدارییا گەنجێن ئیراقی د بەرەیێن شەڕێ رووسیا و ئۆكرانیا دا سەلماند. ئەڤ دیاردەیە بوو ئەگەرێ كارڤەدانێن توند ل ناڤخۆ.
محەمەد شیاع سوودانی، سەرۆك وەزیرێن ئیراقێ یێ بەرێ د دەمێ خۆدا، لژنەیەكا بلند ب سەرۆكاتییا قاسم ئەعرەجی، شیرەتكارێ ئاسایشا نیشتمانییا ئیراقێ یێ بەرێ، پێكئینابوو بۆ ڤەكۆلینێ ل سەر ڤێ پرسێ.
د هەمان دەم دا، فایق زێدان، سەرۆكێ جڤاتا بلند یا دادوەری یا ئیراقێ، رێنما دابوون بۆ وەرگرتنا پێرابوونێن یاسایی یێن توند ل دژی وان كەس و تۆڕێن گەنجان دخاپینن.
ل گۆر یاسایێن ئیراقێ، پشكداری د شەڕێ وەلاتێن دی دا و بكارئینانا گەنجان بۆ وان ئارمانجان، بنپێكرنا دەستوورییە و دچیتە د چارچۆڤەیێ یاسایا بەرهنگاربوونا تیرۆرێ دا.
