رەنگێ چاڤان و نهێنیێن کەساتیا مرۆڤی
ل دووڤ ڤەکۆلینەکا تیمەکێ زانایێن سوید، دشیاندایە ب رەنگێ چاڤی هندەک ژ تایبەتمەندیان ل سەر رەفتار و کەسایەتییا مرۆڤان بهێنە زانین.
زانایێن زانکۆیا ئۆریبرۆی یا سویدی ڤەکۆلینەک دەربارەی رەنگێ چاڤێن مرۆڤان و گرێدانا وان ب نیشاندەرێن رەفتار و کەسایەتیێ ئەنجامدا، بۆ وێ مەرەمێ 428 کەس ئینان و رەنگێ چاڤێن وان ب سەر پێنج گرۆپاندا دابەشکرن.
ئەنجامێ ڤەکۆلینێ ل گۆڤارا “فرۆیدن”یا ئەڵمانیدا بەلافکرن و تێدا هاتیە:
چاڤێن قەهوائی کو بەربەلافترین رەنگێ چاڤی یە، نیشانا کەسایەتیەکا ب هێزە، ئەو کەسێن رەنگێ چاڤێن وان قەهوایینە ب شێوەیەکێ گشتی ب سەرکردە دهێنە نیاسین، دڵسۆزن و د سەرەدەریکرنێ دا دباشن.
سەبارەت ب رەنگێ شین، ڤەکۆلینێ ئاماژە کریە؛ ئەو کەسێن رەنگێ چاڤێن وان د شینن د ناخێ خۆ دا خودان هێزەکا مەزنن، ئێک ل ئەنجامێن ئەڤێ ڤەکۆلینێ ئەوە، کو ئەو ژنێن رەنگی چاڤێن وان د شین ل دەمێ زارۆکبوونێ دا زێدەتر هەست ب ئێشانێ دکەن.
دەربارەی رەنگێ کەسک، ڤەکۆلین گەهشتیە وی ئەنجامی، کو ئەو ژنێن رەنگێ چاڤێن وان کەسک گەلەک جارا وەک کەسەکا سەرنجڕاکێش و داهێنەر دهێنە دیتن، هەروەسا ژ ڕوویێ کەسایەتیێ ڤە بێهن فرەهن و ل ژێر فشارێ دشێن کارێن خۆ ب رێڤەببەن.
چاڤێن گەور دەگمەنترین رەنگێن چاڤینە، ئەو کەسێن ب ڤی ڕەنگی، کەسانێن زیرەکن و وورەیا وان گەلەکە و ل رەوشێن جۆدا دا زوی هەڤسۆزیێ؟بۆ کەسێن دی دەردبڕن.
هەر ل دووڤ ئەنجامێن ڤەکۆلینا زانکۆیا سویدی، ئەو کەسێن رەنگێ چاڤێن وان هنگڤینی، باوەری ب خۆ هەیە و زێدەتر حەزا سەربەخۆیێ دکەن ل ژیانێ و ب رێڤەبرنا کارێن خۆ دا.
