سیبەرا تاریاتیێ
خانم حسێن
هەر مرۆڤەك د ڤی ژیانێ دا دگەهیتە سەركەفتنەكێ، ل پشت وێ رۆناهیا گەش دا، سیبەرەكا تاری یا هەی و مە هەموویان دڤێت بتنێ رۆناهیا خۆ پێشكێشی دەوروبەران بكەین، مە دڤێت هەموو كەس بتنێ وان دەستكەفتێن مە ببینن یێن مە ب دەستڤە ئیناین. لێ ئەو برین و وەستیان و ئەو شەڤێن بێ خەو، یێن تە د دلێ خۆ دا ڤەشارتین، ئەو سیبەرە، ئەو ترسە یا د كەڤنەپەڕێن مەژیتە دا دمینیت و تۆ نەوێری بەحس بكەی.
مەهەموویان دڤێت د چاڤێن خەلكی دا مرۆڤێن بێ كێماسی» بین، لێ راستی ئەوە كو سەركەفتنا مە بێی وێ سیبەرێ چ رامان نینە.
سەركەفتنا راستەقینە، نە ئەو ناڤ و دەنگە یا تۆ دگەهیێ، بەلكو ئەو هێزە یا تۆ ژ وێ تاریاتیێ دئینی، هەر دەمێ تۆ ژ وێ تاریاتیێ دا دەركەڤی، هەر دەمێ تۆ هەست ب هێزێ كەی، تۆ یێ خوە ئامادە دكەی بۆ رۆناهییەكا مەزنتر.
ئەو تاریاتی نە دوژمنێ تە یە، بەلكو ئاوێنەكا ناخێ تە یە، ئەو تە هشیار دكەت كو تۆ ژی مرۆڤی، تە هەست هەنە، تە نەخۆشی دیتینە و تۆ ب ماندیبوونەكا مەزن گەهشتییە وێ رۆناهیێ.
هەموو كەس دخوازن بتنێ ل سەر گۆپیتكێ بن، بێ كو یێ د دلێ وان دا چ هەی بهێتە زانین، لێ تو وەك مرۆڤەكێ خودان هزر بلا سەركەفتنا تە نەبیتە وێ دیوارێ كو تو ناخێ خۆ ژ خۆ ڤەبڕی. قەبوول بكە كو د ناخێ تە دا بەشەكێ تاری یێ هەی، چونكی ئەو تاریاتی، ئەو ترس و ئەو ماندیبوون ئەون یێن رێكا تە بۆ رۆناهیێ ڤەكری.
نەترسە ژ سیبەرا خۆ، هەر دەمێ تۆ هەست ب سەركەفتنێ بكەی، ل سیبەرا خۆ ژی بنێرە، دا كو بزانی تۆ ژ كیڤە هاتی و تۆ كی؟ سەركەفتنا تە د رۆناهیێ دا یا گەشە، لێ مرۆڤاتییا تە یا ل تاریاتیێ دهێتە دیاركرن، بلا دلێ تە ئارام بیت، چونكی ئەو سیبەرە نیشانە ل سەر وێ چەندێ كو تۆ یێ هەبووی، تە یێ كاركری، و تۆ یێ ژیانەكا پڕ ژ ئەزموون دژی، سەركەفتن ب سیبەرێن خۆ ڤە جوانە، چونكی بێ سیبەر، رۆناهی بێ تامە.
