هیڤیدارم هەموو ئالیێن سیاسی هەڤكار بن بۆ دەربازكرنا ئاستەنگان و پاراستنا كوردستانێ
سەرۆك بارزانی ب هەلكەفتا 50 سالییا دامەزراندنا پارتا سۆسیال دیموكراتا كوردستانێ پیرۆزباهییا محەمەد حاجی مەحموود سەرۆكێ وێ پارتێ و سەركردایەتی و تەڤایا ئەندام و لایەنگرێن پارتا سۆسیال دیموكراتا كوردستانێ كر.
بارەگەهێ بارزانی پەیاما سەرۆك بارزانی بەلاڤكریە كو تێدا سەرەرای پیرۆزباهییا 50 سالییا دامەزراندنێ، سەرۆك بارزانی هیڤیدارە تەڤایا ئالیێن سیاسی یێن كوردستانێ هەڤكار و تەبا بن بۆ دەربازكرنا ئاستەنگ و كێشەیان داكو كوردستان و خەلكێ وێ بەردەوام پارێستی بن.
دەقێ پەیاما سەرۆك بارزانی:
ب هەلكەفتا 50 سالییا دامەزراندنا پارتا سۆسیال دیموكراتا كوردستانێ، گەرمترین پیرۆزباهییان ئاراستەی برایێ بەرێز كاك محەمەد حاجی مەحموود سەرۆكێ پارتا سۆسیال دیموكراتا كوردستانێ و مەكتەبا سیاسی و سەركردایەتی و تەڤایا ئەندام و لایەنگرێن پارتا سۆسیال دیموكراتا كوردستانێ دكەم و ب وێ هەلكەفتی پێزانینێن من بۆ خەبات و قوربانیدانا پارتا سۆسیال دیموكراتا كوردستانێ د دیرۆكا خەباتا گەلێ مە دا هەنە و هیڤییا سەركەفتن و بەردەوامیێ بۆ وان دخوازم.
سەرۆك بارزانی گۆت ژی: هیڤیدارم ئالیێن سیاسی یێن كوردستانێ و هەموو ئالییەك هەڤكار و تەبا بن بۆ دەربازكرنا ئاستەنگ و كێشەیان داكو كوردستان و گەلێ مە بەردەوام پاراستی بن.
