سێ پڕۆژەیێن وەبەرهێنانێ دێ پتر ژ600 دەلیڤەیێن كاری بۆ گەنجان پەیدا كەن
زاخۆ، دلۆڤان هالۆ:
بجهئینانا سێ پڕۆژەیێن نوو یێن وەبەرهێنانێ ل ئیدارەیا سەربخوە یا زاخۆ، دێ پتری 600 دەلیڤەیێن كاری ژ بۆ گەنجێن كۆر و كچ یێن زاخۆ پەیدا كەت، زێدەباری ڤەژەنا ئابووری ل دەڤەرێ.
جگەرخوین تاهر، ڕێڤەبەرێ گشتی یێ وەبەرهێنانێ ل ئیدارەیا سەربخوە یا زاخۆ بۆ ڕۆژناما ئەڤرۆ دیاركر، بجهئینانا سێ پڕۆژەیێن نوو یێن وەبەرهێنانێ ل ئیدارەیا سەربخوە یا زاخۆ، دێ پتری600 دەلیڤەیێن كاری ژ بۆ گەنجێن كۆر و كچ یێن زاخۆ پەیدا كەت، ئێك ژ وان پڕۆژەیان یێن كو دەلیڤەیێن كاری بۆ گەنجان پەیدا كری كارگەها مالباتە كو د نوكە دا 219 كەس ل ڤێ كارگەهێ كار دكەن، ئەڤ كارگەهە ل سەر ڕووبەرێ 50 هزار مەترێن دووجا و ب گۆژمێ 20 ملیار دیناران ل ناحیا باتێلێ هاتیە دروستكرن، ئەڤ كارگەهە یا تایبەتە ب دیزاین و چاپكرنا كارتۆنان، و ڕۆژانە شیانێن بەرهەمئینانا 330 تەنێن كارتۆنان هەیە.
ناڤهاتی ئاماژە ب وێ چەندێ ژی كر، ئێكە دی ژ وان پڕۆژەیێن گرنگ یێن بیاڤێ ساخلەمیێ كو دێ 393 دەلیڤەیێن كاری ژ بۆ كۆر ۆ كچێن دەڤەرێ پەیدا كەت ئەو ژی دروستكرنا كارگەها داسن یا دروستكرنا دەرمانانە، ئەڤ كارگەهە ل سەر ڕووبەرێ 18 دۆنەمێن ئەردی و ب گۆژمێ 22 ملیۆن دیناران ل ناحیا باتێلێ دێ ژ لایێ كۆمپانیا شەمالك میدیكال ڤە هێتە دروستكرن.
گۆت ژی:»پڕۆژەیێ سییێ یێ وەبەرهێنانێ پڕۆژەیێ گەشتیاری یێ جان ستی یە كو ل قوناغا ئێكێ دێ 62 دەلیڤەیێن كاری بۆ خەلكێ دەڤەرێ پەیدا كەت، ئەڤ پڕۆژە ل سەر رووبەرێ 128 دۆنەمێن ئەردی و ب گۆژمێ 10 ملیۆن و 500 هزار دولاران ل گۆندێ چەمسیرمۆ دهێتە دروستكرن، پڕۆژە پێك دهێت ژ ئەكوا پاركەكا پێشكەفتی و پێشبركییا ئۆتۆمبێل و هەسپان و چەندین بەشێن دی».
