بەرهەمێ پتاتێن كوردستانێ دگەهیتە بازاڕێن جیهانی
رەمەزان زەكەریا
بەرهەمێ پتاتێن ئەڤسالە یێ هەرێما كوردستانێ كوالیتیەكا گەلەك بلند هەیە و نوكە داخوازیەكا زۆر ل سەر بەرهەمی ل وەلاتێن كەنداڤی و چەندین وەلاتێن دی یێن جیهانێ هەیە. پتاتێن كوردستانێ نە ب تنێ بۆ خارنا ناڤمالێ بۆ چێكرنا جپس و فینگەران ژی دهێتە بكارئینان و كۆمپانیێن مەزن یێن جیهانی وەك ماكدۆنالدز و كەی ئێف سی داخوازا پتاتێن كوردستانێ دكەن.
حكومەتا هەرێما كوردستانێ ب ڕێكا كابینا نەهێ گرنگیەكا زۆر دایە كەرتێ چاندنێ و بزاڤێن بازاڕێن دەرەكی بۆ بەرهەمێن ناڤخۆیی پەیدا بكەت، زێدەباری پتاتێ بەرهەمێن وەك هنار و سێڤێن بەرواری ژی دهێنە هەناردەكرن بۆ دەرڤەی وەلاتی، كو ئەڤێ چەندێ وەكریە داهاتەكێ باش بۆ جوتیاران بهێتە دابینكرن و بها ژی ل بازاڕی دا گونجایی ببن.
شێخ مستەفا شێخ عەبدولڕەحمان، سەرۆكێ ئێكەتیا هاوردە و هناردنكاران گۆت: بەرهەمێن چاندنێ بەر ب زێدەبوونێ ڤە دچن و كوالیتییا وان گەلەك بلندە ل سالێن بووری دا ب ڤی شێوەی گرنگی ب هەناردەكرنێ نەدهاتە دان، بەلێ نوكە بەرهەمێ ناڤخۆیی بوویە جهێ باوەریا بازاڕێن جیهانی.
ژ لایەكێ دی ڤە پەیداكرنا بازاڕێن دەرەكی ئێك ژ پێنگاڤێن ستراتیجی یێن حكومەتا هەرێما كوردستانێ یە بۆ پشتەڤانیكرنا جوتیاران و ب هێزكرنا ژێرخانا ئابووری یا هەرێمێ.
سالا بووری پشكەكا زۆر یا پتاتێن هەرێما كوردستانێ بۆ ڕۆژئاڤایێ كوردستانێ و سوریا هاتە ڤرێكرن، بەلێ ژ لایەكێ دی ڤە ئاریشەیێن سیاسی و ڕێگریێن بازگەهان ل هنارتنا بەرهەمێ ناڤخۆیی بۆ پارێزگەهێن ناڤەڕاست و باشوورێ ئیراقێ ئاریشەیێن مەزن بۆ جووتیاران دروستكرینە.
ل پێنج سالێن بووری دا ب گشتی بۆ هەر سالەكێ پتر ژ 800 هزار تەنێن پتاتان ل هەرێما كوردستانێ هاتینە بەرهەمئینان. زۆرترین پتات ل دەشتا ناڤكوڕی ل بەردەڕەش بوویە ل سنورێ پارێزگەها دهۆكێ كو بەرهەمئینان پتر ژ 300 هزار تەنان بوویە، بەلێ دهێتە پێشبینیكرن ئەڤسالە ئەڤ ڕێژەیە بگەهیتە 150 هزار تەنان.
ل هەرێما كوردستانێ نزیكی 30 جۆرێن پتاتێ دهێنە بەرهەمئینان. كوالیتییا پتاتێن جوتیارێن هەرێمێ ل سەر ئاستێ ڕۆژهەلاتا ناڤەڕاست باشترینە، ئەڤێ چەندێ ژی وەكریە ل وەلاتێن كەنداڤی داخازیەكا زۆر ل سەر هەبیت.
ل سالێن بووری پتاتێن هەرێما كوردستانێ بۆ وەلاتێن كەنداڤی ڕۆژئاڤایێ كوردستانێ و سوریا، ئەفریقا باشوور، بەریتانیا و چەندین وەلاتێن دی هاتبوو فرێكرن.
