ب هەلكەفتا ٨٠ سالیا دامەزراندنا پارتی ئەڤرۆ ٩٠٠ بـووك و زاڤا دێ شەهیانا خـۆ گێڕن
دهۆك، دلۆڤان ئاكرەیی:
د. شیرین حسنی، بەرپرسا پشكا ڕێكخستنێ ل مەكتەبا ڕێكخستنا پارتی ل دهۆكێ بۆ رۆژنامەیا ئەڤرۆ دیار كر، ب هەلكەفتا بوونا سەرۆك مەسعود بارزانی و 80 سالیا دامەزراندنا پارتی، ئەڤرۆ رۆژا ئێكشەمبی 16/8/2026 پێنج شەهیانێن ب كۆم بۆ 900 بووك و زاڤایان ل سنۆرێ لقێن سەنتەرێ دهۆكێ، ئیدارەیا سەربخۆ یا زاخۆ، دەڤەرداریا ئاكرێ، ئامێدیێ و شێخان، دێ هێنە سازكرن.
ناڤهاتیێ گۆت: «دەمێ سێ سالانە، بێ راوەستیان شاهیانێن ب كۆم ل سنۆرێ پارێزگەها دهۆكێ دهێنە ئەنجام دان، د ڤی دەمێ بۆری دا زێدەتر ژ سێ هزار كوڕ و كچان، ژ ڤی پڕۆژەی مفادار بووینە و پرۆسێسا هەڤژینیێ پێكئینایە، مەرەما سەرەكی یا پارتی ژ ڤی پڕۆژەی، ب تنێ هاریكاریكرنا گەنجانە بۆ وێ چەندێ ب سەناهی هەڤژینیێ پێك بینن، پڕۆژە ژی هەمی پێكهاتەیێن پارێزگەها دهۆكێ و ئیدارەیا سەربخۆ یا زاخۆ بێ جوداهی ڤەگرتینە».
