چیڕۆکا من
ئەلند مزووری
ئەز ڕەگەزەکم
د ناڤبەرا دوهی و ئەڤرۆ دا
نە رابردوویەکێ گەشدار
نە داهاتیەکێ ب هیڤی و سۆزدار
ڕۆژێن من
دناڤ پێلێن هەبوونێدا
پرت و بەلاڤە بووینە…
نە گڕنژینەکێ دبینم
ل سەر لێڤێن زارۆکەکی
سەمایێ دکەت،
نە ژی بەلاتینكەكێ دبیم
ل هنداڤ گولان
عەشقێ ئالوگۆر بکەت،
ئەز ل کیڤە مە… ئەز نزانم
د ناڤ کەلەخێن بێ ئۆمێدیان دا
لبەر مرارێن خەون و خۆزیاندا
ل هەمبەر
هەرەفتەیێن چەرخ و دەماندا
ئەز یێ ل خۆ دگەڕم!
نە ئاسمانەکێ سامال
نە ستێرکا گەش
ل ئاسمانێ پاشەرۆژێ دبینم
دوکێلا ئاگرێ وندابوونێ
هەمی بیاڤ یێن کرینە تەنی،
یێ ژ هەمیان کێمتر دڤێت
تۆ بێژیێ ئەزبەنی
لێ ئەو ژی
دێ ب عاقلێ تە کەت کەنی…
ل دەنگەکی دگەڕم من بەرەف
هەبوونێ ڤە ببەت،
من ژئاشۆپ و خەونێن درندە
ڕزگار بکەت
لێ پێل و سیپەلێن ژیانێ
یێن من
د ناڤ خۆ دا نقۆ دکەت
بەرزە دکەت…
چ ناهێتە گوهێن من
ژبلی دەنگڤەدانەکێ،
کو ژ ژانێن بیرهاتن و غەریبیا و
ڕابۆرییەکێ بریندار
دگوهێن مندا دژەنیت…
سەراب
هێشتا ل ڕێکا من و تە
یا ئارماجێن ئاشۆپەیی دنخێڤیت
ئەز هەر مام وەک خۆ
د ناڤ دەستێن دەمی دا…
بەختێ مە
هەرێ هەوار دکەت
دیمەنێن ژیانا مە
هەر مان پرت و بەلاڤە
ئەڤە ئەزم و
ئەڤەیە ژی چیڕۆکا من.
