ژ هەموو دەڤەرێن كوردستانێ و ئیراقێ گەشتیار سەرەدانا شكەفتا بهێرێ دكەن
زنار تۆڤی
عەبدولقادر عەبدولكەریم محەمەد، خودانێ شكەفتا بهێرێ یا گەشتیاری، ل سنۆرێ ئیدارا سەربەخۆیا زاخۆ، د هەڤپەیڤینەكێ دا بۆ رۆژناما ئەڤرۆ دیار كر: ئەڤە دەمێ حەفت سالانە ئەز كارێ گەشتیاریێ ل شكەفتا بهێرێ دكەم، ئەڤ جهە ئێكە ژ جهێن گەشتیاری یێن خۆش و خەلك گەلەك قەستا جهێ مە دكەن، هەروەسا ل وەرزێ هاڤینێ، رێژەكا باش یا گەشتیاران سەرەدانا شكەفتا بهێرێ دكەن، ئەڤ دەڤەرا باكورێ زاخۆ، دەڤەرەكا گەشتیاری یا خۆشە و چەندین جهێن گەشتیاری لێ هەنە، وەكو سیلاڤا شەرانش و شكەفتا بهێرێ و دەشتە تەخ و پەرەخێ، ل ڤی وەرزی گەشتیار گەلەك سەرەدانا ڤێ دەڤەرێ دكەن.
ناڤهاتی گۆت ژی: ل سەردەمێ رژێما بەرێ یا عیراقێ ئەڤ دەڤەرە یا چۆلكری بوو، گوندێن ڤێ دەڤەرێ هەموو هاتبوونە بەردان و ژیانا لێ نەمابوو، بەلێ پشتی سەرهلدانا سالا 1991 ێ، جارەكا دی ئەڤ دەڤەرە هاتە ئاڤاكرن و خەلك زڤرینەڤە سەر گوندێن خۆ، ئەڤ دەڤەرێن مە ژی نێزیكی سنۆرێن باكورێ كوردستانێ نە و نوكە ئارامی ل ڤێ دەڤەرێ هەیە، ڤێ چەندێ وەكریە، كو رێژەكا باش یا گەشتیاران سەرەدانا جهێ مە یێ گەشتیاری ل شكەقتا بهێرێ بكەن.
عەبدولقادری ئەو ژی گۆت: ئاڤا گەلەك تەزی ژ شكەفتا بهێرێ دەردكەڤیت، هەروەسا ژ هەموو دەڤەرێن عێراقێ و كوردستانێ گەشتیارێن سەرەدانا شكەفتا بهێرێ دكەن، دیسان ژ دەرڤەیی وەلاتی ژی گەشتیار سەرەدانا شكەفتا بهێرێ و جهێن دیتر یێن گەشیتاری یێن دەڤەرا مە دكەن، ل گەل هندێ ژی ئەو گەشتیارێن دهێن پرانیا وان عەرەبن، خەلكێ ناڤەراست و ژێریا عێراقێ نە، هەروەسا پار پتر گەشتیار دهاتنە شكەفتا بهێرێ و ئەڤ سالە گەشتیار كێمتر دهێن، دبیت ئەڤان هەیڤێن بهێت پتر گەشتیار سەرەدانا جهێن مە یێن گەشتیاری بكەن، ل گەل هندێ ژی حكومەتا هەرێما كوردستانێ و ئیدارا سەربەخۆیا زاخۆ، گەلەك هاریكایا مە كریە، رێكا مە هاتیە چێكرن و كارەبا 24 دەمژێری ژی بۆ مە هاتیە دابینكرن و ڤێ چەندێ وەكریە، گەشتیار ب رەنگەكێ باش سەرەدانا جهێن مە یێن گەشتیاری بكەن.
