كـافێیا قـەهـوەیـا كـوردی

نەوزاد ئامێدی

ئەز ژحەزژێكەرێن قەهوەیە و بتایبەت پشتی چوونا دەرڤەی وەلاتی و ب حوكمێ كولتوورێ قەهوە ـ ڤەخوران یێ زالە ل سەر چایێ، چ ل دەرڤە یان ل سەر كاری یان دەمێ مێهڤانداریان. لەوما پێدڤیە ڕۆژانە ب کێمی قەهوەكێ ڤەخۆم و مەبەست ل ڤێرە قەهوەیە نەك نسكافێ.
و زۆر جاران دەمێ دچمە كافێیەكێ، یان مالەكێ ل كوردستانێ و پرسیارا من دكەن دێ چ ڤەخۆی؟ ئەز دبێژمێ كافێ یان قەهوەیا كوردی، دێ پرسیاركەن ببۆرە مەبەستا تە یا عەرەبی یان توركی؟ دێ بێژمێ نە، یا كوردی. هەردەم ئەڤ ئاریشە پەیدا دبیت د ناڤبەرا من و نۆت و نەهـ ژ سەدێ ژخەلكی و فرۆشكارێن قەهوێ.
ل ڤێرە من دڤێت بێژمە هەڤال و ناسیار و حەزژێكەرێن قەهوەیێ، هەر ملەتەكی ل ڤێ دەڤەرێ قەهوە بناڤێ وەلاتێ خۆ و نەتەوا خۆ بناڤكریە، بۆچی ئەم كورد جورعەت ناكەین بێژینێ قەهوەیا كوردی؟ دێ كی مە سزادەت یان بیتە ئاستەنگ؟
دەمێ ئەز چوویمە جهەكێ ناڤدار یێ دهۆكێ و من داخوازا قەهوەیێ ژێ كری و ئەم تووشی ڤێ دانوستاندنا هەر جار بووین، من ب ڤی رەنگی گۆتێ:
قەهوەیا تە یا ئەسیۆبییە یان بەرازیلیە یان كۆلۆمبی یە یان فلیپینی یە و هتد. و تو یێ ل ڤێرە ل كوردستانێ دقەلینی و دهێری و تامان ل سەر زێدەدكەی و ب ئاگرێ كوردی و ب دەستێن كوردان چێ دكەی و ل سەقایێ كوردستانێ حازردكەی و دفرۆشی و ڤەدخۆی، ئێ بۆچی دێ بێژیێ قەهوەیا عەرەبی یان توركی؟ بۆ نابێژی یا كوردی؟
لەوما هیڤیدارم ژهەر كوردەكی و هەر قەهوە ڤەخۆرەكی و هەر دوكانەك و فرۆشگەهەكێ قەهوێ، ئەڤرۆ پاشڤە بێژنە قەهواەیا خۆ ئەوا ب دەستێن خۆ چێدكەن و دهێرن یان حازردكەن، بێژنێ قەهوا كوردی و ل سەر بنڤیسن قەهوەیا كوردی.
عەرەب و توركان قەهوە چێنەكریە و ئەوان ژی یا ژ مللەتێن دی وەرگرتی، لێ نوكە ب هزرا هەمی دونیایێ قەهەوە د بنەكۆك دا یا عەرەبی و توركی یە و ئەڤێ چەندێ ژی چو راستی بۆ نینە. هیڤیدارم ڤێ جارێ بهێمە كوردستانێ و قەهوەیا كوردی ڤەخۆم..

کۆمێنتا تە