تووڕەبوون چ ئاریشەیان چارەسەر ناکەت
بێوار حەمدی:
ڕاهێنەرەکا گەشەپێدانا کەسایەتیێ د دیدارەکێ دا بۆ ڕۆژنامەیا ئەڤرۆ دیار کر کو د ژیانا ڕۆژانەدا خەم و توڕەبوون وەکی کارڤەدانەکا ئاسایی یا مەژیی بەرامبەر کێشەیان دروست دبن و گۆت؛ بەلێ ئەڤ هەستە کارتێکرنەکا خراب لسەر دەروونێ مرۆڤی دکەن.
د. ئاواز حەجی جەعفەر راهێنەرا گەشەپێدانا کەسایەتیێ دیار کر خەم و توڕەبۆن بێگۆمان ژ ئەگەرێ کێشەیەکێ دروست دبن و جاران مرۆڤی بێ هیڤی دکەن و ئەڤە کارڤەدانەکا ئاسایی یا مەژییە
و گۆت؛ گەلەک جاران خەم و تورەییا مرۆڤی دبیتە ئەگەرێ خەمۆکیێ و مرۆڤی ڕادەستی بێ هیڤیبونێ دکەن .
د. ئاوازێ د بەردەوامیا ئاخفتنێن خۆ دا دیار کر کو چارەسەریا خەم و توڕەییێ ئەو نینە ئەم بێژینە کەسەکی: ڕابەڤە و بکە کەنی، بەلکو ل شوینا ڤێ چەندێ، دڤێت ئەو کەسە بچیتە دەف ڕاوێژکارەکێ دەروونی و دلێ خۆ بۆ ڤەکەت ژبۆ وەرگرتنا چارەسەریێ، دا کو بشێت پێنگاڤ پێنگاڤ بزڤڕیتە ژیانا خۆ یا ئاسایی و خشتەیەکێ نوی بۆ خۆ دانێت و ژیانا وی باشتر لێ بهێت.
ڕاهێنەرا گەشەپێدانا کەسایەتیێ ئەو چەندە ژی دا زانین، خەم و توڕەییێ چ باشی تێدا نینن و نابیت کەسەک ئاریشەیا خۆ ب توڕەبوونێ چارەسەر بکەت و گۆت؛ ژبەرکو ئەڤ چەندە نە ڕابردووی دزڤڕینیت، نە ژی داهاتووی چێدکەت، هەروەسا نەشێت مە بەختەوەر بکەت.
د. ئاوازێ ئەو چەندە ژی دیار کر کو ئەو کەسێ دناڤ توڕەییێ دا دمینیت، ڕەنگە گەلەک پەیوەندیێن خۆ ژ دەست بدەت، یان بەخت، کار و هەتا ساخلەمیا وی ژی ژ ناڤ بچیت و گۆت؛ لەوما پێدڤیـە مرۆڤ ژ هەر ئەزموون و تشتەکی وانەیان بۆ خۆ وەربگریت، داکو بشێت بەرامبەر خەم و توڕەییا خۆ ڕاوستیت.
