دیاردهیا خـوازۆكیێ پاشـهرۆژا زارۆكـی ئێخستیه د مـهترسیێ دا
ههولێر، قائید میرۆ:
سهرۆكا رێكخراوا ئهستێره دیار کر کو دیاردهیا خوازۆكیێ دیمهنهكێ نه شارستانی ههیه، بتایبەت بكارئینانا زارۆكان بوویه ئهگهر پاشهڕۆژا وان بكهڤیته د مهترسیێ دا و گۆت؛ مخابن رهوشا نوكه ئهم تێدا و قهیرانێن بسهر ههرێما كوردستانێ دا هاتین كاریگهری لسهر رهوشا زارۆكان پهیداكریه و قوربانیێ ئێكێ زارۆكه.
سهیران سهلاح، سهرۆكا رێكخراوا ئهستێرە یا تایبهت ب زارۆكان د دیدارەکێ دا بۆ رۆژنامەیا ئهڤرۆ دیار كر، رهوشا زارۆكان یا باش نینه، چونكه ئهو قهیران و ئاریشهیێن ل ههرێما كوردستانێ هەین كاریگهری لسهر رهوشا زارۆكان ههیه و قوربانیێ ئێكێ زارۆكه و گۆت؛ چونكه زارۆك وهك كهسهكێ ئاسایی نینه بۆ نموونه زارۆك نزانیت مووچه گیرۆبوون یان نهبوونا پانزینێ چیه و بهردهوام پێدڤی ب مهزاختیێن خۆ ههیه.
سەیرانێ گۆتژی؛ لهوڕا ئەڤ رهوشا نوكه ئهم تێدا ئهگهر جارهكێ بۆ كهسهكێ ئاسایی بارگرانی بیت بێگومان دو جارا هند كاریگهری لسهر زارۆكان ههیه.
سهرۆكا رێكخراوا ئهستێرە دیار کر کو مخابن سهرهڕای ههبوونا قانوون و رێنمایان دیاردهیا خوازۆكیێ ژلایێ زارۆكانڤه یا بهردهوامه، ژلایێ كهسێن مهزن زارۆك دهێنه بكارئینان و گۆت؛ ئهم ههموو ل بازاڕ و جهێن گشتی و ترافیكا رۆژانه زارۆكان دبینین مژوولی دیاردهیا خوازۆكیێ نه، ئهڤێ چهندێ كاریگهری لسهر ژیان و پاشهڕۆژا زارۆكی ههنه.
سەیرانێ د بەردەوامیا ئاحفتنێن خۆدا دیار کر، یا ژ ههموویێ مهترسیدارتر ژی ئهوه زارۆك دهێنه بكارئینان و وهكی باند پهیدابووینه چهند كهسهك زارۆكان ل دهرڤهی باژێڕا دبنه ناڤا سهنتهرێ باژیڕان و خوازۆكیێ ب زارۆكان دكهن ژبۆ كۆمكرنا پارهی.
سەیرانێ زێدەتر گۆت؛ هندی خهلك هاریكاریان وان بكهت دێ زێدهتر بازاڕێ وان گهرم دبیت و د بهرههڤ نینهن دهستا ژ دیاردهیا خوازۆكیێ بهردهن، راسته دهمێ كهسهك زارۆكهكی دبینیت دخوازیت هاریكاریێ بكهت، بهلێ ئهڤه كارهكێ شاشه و نابیت ب چو شێوهیهكی فێری خوازۆكیێ بكهن.
سهرۆكا رێكخراوا ئهستێرە گۆتژی؛ مه قانوون و رێنمایی ههنه و ژلایێ وهزارهتا كارۆبارێن كۆمهلایهتی رێڤهبهریهك ههیه و ههتا رادهیهكێ باش ئهركێ خۆ ئهنجامدایه و گۆت؛ بەلێ جێبهجێنهكرنا ئهڤان رێنمایان ژلایێ پۆلیسان و پۆلیسێن ترافیكێ بوویه ئهگهر بهردهوام زارۆك خوازۆكیێ بكهن، چونكه ناهێنه گرتن و دویر خستن، ههتا دهمێ دهێنه گرتن ژی وەکی پێدڤی لێپرسین دگهلدا ناهێته كرن،
دهمێ سوزنامە ژ کەسوکارێن وان دهێتە وەرگرتن کوو نابیت ئهو زارۆك ڤهگهڕنە كارێ خوازۆكیێ دڤێت دووفچوون ژی بۆ ههبیت، ژبهركو پشتی ئازادكرنێ دووفچوون نینه، لەوما دوباره ڤهدگهڕن.
سەیران سەلاح سهرۆكا رێكخراوا ئهستێره گۆت؛ یا خۆیایه دیاردهیهكا نه شارستانیە و پاشهڕۆژا وان زارۆكان یێن خوازۆكیێ دكهن د مهترسیێ دایه، رهنگه زۆر جاران بهێنه ئیستیغلالكرن ژلایێ خهلكهكی ڤه و دهستدرێژی ل سهر وان بهێنه كرن.
