بـۆ ڕێگرتنا هێرشێن ئیراقـێ ل سـەر گـوندێن مەرینا و دێرەبینێ و پێشابیرێ مە مین د ڕێکا وان دا چاندن
رەمەزان دەشتمری/ زاخۆ
3-4
كو ئەم دا بۆ ئەنجامدانا چالاكیەكێ بۆ ڕۆژئاڤایێ كوردستانێ هاتبین ل ڤێرێ دێ ئەركێ مە چ بیت دێ دەست ب ڕێكخستنا پارتی بكەین، یانژی دێ قەستا خێزانێن خوە كین و ئەم چاڤەڕێ بەرسڤا جەنابێ تەینە. ئەوبوو دەمێ شەهید سەید حەمید ئەو پۆستە بۆ ڕۆژهەلاتێ كوردستانێ بری و چوویە دەف جەنابێ كاك ئیدریس بارزانی و هەلویستێ مە ل ڕۆژئاڤایێ كوردستانێ بۆ شڕوڤەكری. ئەوبوو جەنابێ كاك ئیدریس بارزانی بەرسڤا نامێ دایی و گوتی: دەست ب نویژەنكرنا ڕیكخستنا پارتی دیموكراتی كوردستان بكەن، و ل دەمەكی نێزیك دێ شۆڕەش بەردەوامی پێ ئێتەدان. دەمێ شەهید سەید حەمید ئەو ناما جەنابێ كاك ئیدریس بارزانی بۆ هەڤالێن مە ئینایی و مزگینیا دەست ب نویژەنكرنا ڕێكخستنا پارتی و شۆڕەش دێ دەست پێكەت ڤە. هەر وەسا جەنابێ كاك ئیدریس بارزانی گوت: پەیوەندیێن هەوە دێ دگەل جەنابێ كاك مەسعود بارزانی بن و ب ڕێكا نامەیان و ئامیرێ فاكسێ ڕینما و ڕاستپاردەیێن شۆڕشێ دێ بۆ هەوە گەهنە ڕۆژئاڤایێ كوردستانێ. ل ڤێرێ هویڤی و ئومێدێن مە گەشبین و بارێ خەمێن مە سڤك بین و مە جارەكا دیتر دەست ب كارێ خوە یێ پارتایەتیێ كرەڤە.
ل ڕۆژا 3/7/1975ی هەرسێ كادرێن پارتی محەمەد خالد بۆسەلی و جاسم جاسم و ئەحمەد ڕەمو بێتاسی د ڕیكا دەراڤێ گوندێ سێمالكا بۆ هەرێما كوردستانێ هاتن، و خوە گەهاندن چیایێ بێخێری و هەتا بۆ دەڤەرا لێفی و گوندێ بێژهێ و بێتاسی هاتن و چەند هەڤالێن خوە یێن پارتی دیتن و دەست ب نویژەنكرنا ڕێكخستنا پارتی دیموكراتی كوردستان كرنەڤە. دەمێ هەڤالێن مە زڤرێن ڕیكخستنا پارتی ل ڕۆژئاڤایێ كوردستانێ هەتا باژێرێ شامی هێلێن ڕێكخستنا پارتی لێ بەلاڤەبین، هەلبەت ل ئەوی دەمێ پەیوەندیێن مە و جەنابێ كاك مەسعود بارزانی ب ڕیكا ئامێرێ فاكس دگەل ئێك هەبین. مام محەمەد سەعید سوری كەنی و ڕوندك ژ چاڤان هاتنخوار و گوت: ل ئەوی دەمی هەڤژینا من یا دوو گیان بوو و خودایێ مەزن كەرەم دگەل مە كر و كوڕەك خودێ دا هەڤژینا من و مە ناڤێ ئەوی كر دارشین ژبەركو مە گوت: ئەڤە جارەكادیتر دارامە شوین بووڤە و شۆڕشا مە یا كوردی چریسكا وێ هەلبوو، و دێ خەباتێ ل پێناڤێ ئازادیێ شۆڕشێ كەین. دەمێ چریسكا شۆڕەشا 26ی گولانێ ل دەڤەرا كوماتەیی هاتی هەلكرن. ل ناڤەڕاستا هەیڤا دوازدە سالا 1975ی هەژمارا سێزدە پێشمەرگەیێن چەكدار د ڕیكا باژێرێ جزیرا بوتان و بۆ گوندێ بلكا هاتین و ل دەراڤێ تەنگا خەرزێ ل ڕویبارێ ئاڤا هیزل دەربازی سنوری بین و بۆ گوندێ سەناتێ و گوندێ بێجوهی و بۆ بارەگایێ كوماتەیی هاتین. هەلبەت ئەم هاتین ئاگەهداركرن كو بۆ گوندێ بێرمانێ بچین و ئەف گوندە سەر ب قەزا پێشەباتبێ ڤەیە، ژبەر كو سەركردایەتیا شۆڕشێ یا ل ئەوی گوندی بنەجه بوون. دەمێ ئەم بۆ دەف هەڤالێن سەركردایەتیا شۆڕشێ ئەوژی سەلیم سۆرانی و كەریم شنگاری و ئەبوعەنتەر ل وێرێ بوون. دەمێ مە سلاڤی ئەوان كرین گەلەك كەبفا ئەوان هات و ب تایبەتی ئەبو عەنتەر ئەم هەمبێزكرین. ئەوبوو ئەم ل ئەوان گوندێن عەشیرا قەشویریان هاتن بەلاڤەكرن. هەلبەت دەمێ شۆڕشێ دەستپێكری و مەفرەزیێن پێشمەرگەیی هاتن ڕیكخستن و دەست ب كار و چالاكیان كرن. مەفەزەیا مە ب سەرپەرشتیا فەرماندە محەمەد خالد بۆسەلی ئەم بۆ باشورێ كوردستانێ هاتین و دەست ب نویژەنكرنا ڕیكخستنا پارتی ل ئەوان گوندێن دەڤەرێ هاتكرن، ل ڕۆژا 26/6/1976ی مەفرەزیا مە بۆ دەڤەرا هوركێ هاتین و چالاكیەك ل دژی لەشكرێ حكومەتا ئیراقێ یا ئەوی سەردەمی هات ئەنجامدان.
پێشمەرگەیێ شۆڕەشا ئیلۆن و گولانێ محەمەد سەعید بەردەوامی دا ئاخفتنێن خوە و گۆت: ئەز وەك پێشمەرگە هەر من دەست ب كارێ خۆە یێ ئەندازیارێ مینان كر و هەر وەسا كاك جەهوەر نامق ئەز ڕاستپارم ژبو ئەوان ڕێكخستیێن پارتی پێبگەهینن كو چاوانیا ب كارئینانا مینان و دێ چەوا ل ناڤ باژێڕاندا ئەڤان چالاكیان ل ناڤ دامودەزگەهێن حكومەتا ئیراقێ دا و هەستا نەتەوەیی ل ناڤ ناخێ خەلكێ دا بەلاڤەكەین. بۆ ماوەیەكی دیتر ئەم بۆ دەڤەرا شێخان هاتین و ل گەلیێ ڕمان ل هەشارێ دا بین. كو هندەك هەڤالێن مە یێن ڕیكخستی بۆ دەف هەڤالێن مە هاتین و كو نیازبی هندەك تەقەمەنی و مینان دروست بكەن، و ل بۆ ناڤ باژێرێ مووسل ئەنجام بدەن. بەلێ ب مخابنی ڤە هەڤالێ مە یێ قەهرەمان محەمەد سالح بۆسەلی ژبەر شاشیا ب كارئینان خەلەت ئەوبوو مینەك دناف دەستێن ویدا د پەقیت و دهێتە شەهیدكرن. هەر وەسا گوت: شكەفتەك ل ئاقارێ گوندێ بێجوهێ هەبی و ئەو جهێ مە بی و مە ئەف تەقەمەنی و مین بۆ پێشمەرگەیی دروست دكرن. ل پایزا سالا 1976ی من داخواز ژ كاك جەهوەر نامق سالم كر كو هندەك مینان بۆمە پەیدا بكەن، ژبەركو ئەندازیاریا ل كارئینان مینان ل لەشكرێ حكومەتا ئیراقێ بۆ شەڕێ پارتیزانی زورگرنگە. ئەوبوو ل دویف بڕیارا جەهوەر نامق هەڤالەكی مە ب ناڤێ عەلی و دگەل چەند پێشمەرگەیان بۆ ڕۆژئاڤایێ كوردستانێ چون و بارەكی مینان یێ دەوارا هێسترێ بومە ئینان. ئەوبوو من بیست و سێ مینێن مەزن ژێ دەرخستن ژبو دژی تانك و دەبابان و ئەو مین هەڤالێن مە ل جهێن جودا جودا ل بەراهیكا تانكێن حكومەتا ئیراقێ ڤە پەقاندن. بیرا من دهێت من مینەك یا تەوقیتكری دروستكر و هەڤالێن مە ئەو مینە بۆ گوندێ هرورێ ئینان ژبەر كو دەم بو دەمی لەشكرێ حكومەتا ئیراقێ هێرش و لێگەریانێن خۆە بۆ گوندێ هرورێ دئینان و هەر وەسا بۆ كەلەپویرتەیی دهاتن، ئەوبوو دەمێ هەڤالێن مە ئەو مینە ل بەراهیكا لەشكری ل ڕێكا گوندێ هرورێ دەینابی و دەمێ هێرشا لەشكری بۆ گوندی هاتی و ئەو مینا مە دروستكری ب لەشكری ڤە هات پەقاندن و زیانێن مەزن ب لەشكری كەفتن و ئێدی هێرشا لەشكری بۆ دەڤەرا گوندێ هرورێ نەهاتەڤە. هەر وەسا ئەز ل سەر ئەڤی ئاندازیاریا مینان بەردەوام بیم هەتا سالا 1979ی دەمێ كونگرێ نەهێ یێ پارتی دیموكراتی كوردستان هاتی بەستن و بڕیارا لق و لیژنەیان هاتەدان. بۆ ماوەیەكی دیتر ئەز ل بارەگایێ لقێ ئێك مام. دەمێ سالا 1983ی بارەگایێ لقێ ئێك ژ دەڤەرا كوماتەیی بۆ دەڤەرا گوندێ زێوە شكان هاتی ڤەگوهاستن، هەڤالێن یێن پێشمەرگە تێشكەكا هرچێ ل ناڤ ئاقارێ گوندێ هرورێ دیتن و ئەو تێشكا هرچی گرتن و دگەل خوە بۆ بارەگایێ لقێ ئێك ئینان و مەژی ب خودانكر و وەكی هەڤالەكێ دگەل هات و دچوو و خوارن و ڤەخوارن دخوار. ب ڕاستی ئەڤێ هرچێ دیمەنەكی گەلەك جوان و تازە و ڕەوشەكا بێ وێنە دابی بارەگایێ لقێ ئێك و ڕۆژانە مە سوحبەت و یاری دگەل ئەڤێ هرچێ دكرن.
