ژ دوورڤە حەز ژ تە دکەم
جەمال سورەییا
وەرگێڕان ژ زمانێ ترکی:
هاریوان هاشم
ژ دوورڤە حەز ژ تە دکەم
بێی کو بێھن بکەم تە
بێی کو بەژنا تە هەمبێز بکەم
بێی کو دەستێن خوە
بکەمە ڕوویێ تە
بتنێ و بتنێ…حەز ژ تە دکەم.
وەسا ژ دوورڤە حەز ژ تە دکەم
بێی کو دەستێن تە بگرم
بێی کو دەستێن خوە
دانمە سەر دلێ تە
بێی کو د کووراتیا چاڤێن تە دا
بەرزە ببم
ژكەربێن ڤان ئەڤینیێن
سێ ڕۆژی
و نە وەك مرۆڤێن سەرسەری
بەلکو وەك زەلامان حەز ژ تە دکەم
وەسا ژ دوورڤە حەز ژ تە دکەم
بێی کو ھەردو دلۆپێن
ڕۆندکێن سەر ڕوویێ تە
زووها بکەم
بێی کو ببمە هەڤپشکێ
کەنیێن تە یێن مەزن
بێی کو وێ سترانا تە
ژ هەموویان پتر حەز ژێدکر
ئەم پێکڤە ب ئارامی بێژین
وەسا ژ دوورڤە حەز ژ تە دکەم
بێی کو تە بشکێنم
بێی کو تە ب ئێشینم
بێی کو تە پارچە بکەم
بێی كو تە خەمگین بکەم
ژ دوورڤە حەز ژ تە دکەم
وەسا ژ دوورڤە حەز ژ تە دکەم
کو ھەر پەیڤەکا من ڤیای بۆ تە بێژم
ئه ز ل سەر ئەزمانێ خوە
پارچە پارچە دکەم و
حەز ژ تە دکەم
دەمێ پەیڤێن من دلۆپ دلۆپ
دهێنە خوارێ و
دکەڤنە سەر لاپەڕەکێ
سپی و بێ گوننەهـ
حەز ژ تە دکەم.
