ئاشتی
خانم حسێن
ئاشتی نە بتنێ كاغەزێن سیاسینە، یان ڕێككەفتنەكە د ناڤبەرا دو وەلاتان دا، بەلكو ئاشتی ژیانە، هەناسە دانە و بهایەكێ بلندێ مرۆڤاتیێ یە، دەمێ مرۆڤ ل ڕەوشا ئەڤرۆ یا جیهانێ دنێریت دبینیت كو تشتێ ژ هەموو تشتان پتر مە پێدڤی پێ هەی ئاشتی و ئارامی و پێكڤەژیانا راستەقینە یە.
ب ڕاستی مرۆڤ چ جاران نەشێت ئاشتیێ ل دەوروبەرێن خۆ بەلاڤ بكەت هەكە دەروونێ وی مرۆڤی یێ پڕ بیت ژ كەرب و كین و نەخۆشیێ، هەردەم چاڤێ وی ل ئاریشایانە، شەڕێن مەزن و ئاژاوەێن جیهانێ، هەر ژ دل و مێشكێن مرۆڤێن نە ئارام و پڕ ژ ڕك سەر هلدگرن، دەمێ مرۆڤ ناخێ خۆ پاقژ بكەت، ناخێ خۆ پڕبكەن ژ ئارامی و لێبۆرینێ ڤیجا دەستەكێ پاك و پڕ ژ برایەتیێ بۆ كەسێ بەرانبەر درێژ بكەتن.
ئاشتیا گەلان ب رێزگرتنا هەڤپشك و قەبوولكرنا جوداهیێن ئێك و دوو گەشە دكەت، مللەتێن جیهانێ هەموو پشكەكن ژ ڤی دنیایا مەزن و چ جاران ئازارا مللەتەكی بیانی نینە ژ مللەتەكی دی؛ چنكو ئێش و خەما مرۆڤاتییێ ئێكە و دەمێ دادپەروەری و مرۆڤاتی هەبن، گەل ب ئارامی و بێ ترس دژین، گەلێن خودان ئاشتی ئەون یێ هەردەم رێزێ ل جوداهیێن چاند و زمان و ئایینی ئێك دگرن لەوما، باوەربكەن كو گوهۆڕینا جیهانێ هەر ل ناخێ مرۆڤی بۆ خۆ دەست پێ دكەت، هەر جارەكا مرۆڤ دلێ خۆ ژ رقێ ڤالا بكەت و بەحسێ ڤیان و ئارامیێ بكەت، دی جیهانەكا ئارام و بێ شەربیت، ئارامبوونا ناخێ تاكی، كلیلا مەزن و بنەمایێ راستەقینە یە بۆ ئارامبوونا تەڤایا جیهانێ، لەورا گرنگە ئەڤرۆ هەموو مللەت ژ بۆ ب دەستڤەئینانا ئاشتیێ كاربكەن، چنكو سەردەمێ شەڕ و كوشتنێ ب دووماهی هات و پێدڤیە ئێدی خوینا چو كەسان ل سەرتاسەری جیهانێ نەهێتە ڕێتن و ئاریشە هەر چەند د مەزن بن ب رێكا دانوستاندنێ بهێنە چارەكرن و ژبلی ڤێ چ چارەیێن دی نینن، لەورا بلا ئاشتی و تەناهی ببیتە درۆشمێ هەموو مرۆڤاتیێ و كوشتن و خوین رێتن بهێنە ریسواكرن.
