دێ ل نک تەبم
رەمەزان ئیسماعیل گەرەگوهی
هەرجارەکا
بەرانبەر خۆدیکێ دڕوینی و
خوە دخەملینی
ب نازداری و لەنجەولاری
ب مەشا، قاز و وەردەکا
ب ڕویێ گەش و حەنەکا
ب ڕەنگێ گولێن سۆر و زەر
ژ ئالیێ مالێ دهێیەدەر
ب وان چاڤێن پڕ ئەڤینی
دێ من بینی…
ئەزێ دلدار و وەفادار
یێ ل هیڤیا دیدارا تە و
یێ پرتێن ئەشقا تە ڤێددەم
سۆزەکێ ددەم
بۆ دەمێن مە
ئەوێن بڕێڤە و ژ نوکە وێڤە
ئەز
چاڤەڕێ و هەوەدارێ
دەریێ مالا بابێ تەبم…
هەر گاڤەکا تە ژ من حەزکر
دێ ل نک تەبم
ل هاڤینا و
ناڤەڕاستا بیابانێ
ل شەڕگەها
گەرما نیڤرۆ و کەلێژانێ
دێ تەزیاتی و ئاڤڕەشینک و
بایێ هینێ ڕۆژێن تەبم
ل پاییزا و
دەمێ بەلگێن دارا دوەریێن
گاڤا ئاشق
ل چۆل و چیا بۆ خۆ دگەڕیێن
ل کێلەکا
زۆم و زۆزانێن سەرحەدێ
وەک هنگڤێ
کەڤر و دارێن ڤی وەلاتی
ل بەرسینگێ تە شانەبم…
ل زڤستانا و
ل سوبەکا سڕ و سەقەم
دێ کەپەن و
قاپویتەکێ گەرم و نەرمێ
ل سەر هەردو ملێن تەبم…
ڕۆژێن کەیفێ و
ل هەمی ئاهەنگ و شەهیانا و
دیلانا میر
ل بەرچەمکی
دێ سەرکێشێ وێ گۆڤەندێ
ل دەستێ تەبم…
هندی قەدەر
من غەوارە و بەرزەنەکەت
دێ خودانێ سۆزا خوە بم
دێ ل نک تەبم.
