پێدڤیه خێزان قوتابی بۆ سالا نوی یا خواندنێ بهرههڤ بكهت
ههولێر، قائید میرۆ:
رێنماكارهكێ پهروهردێ ئاماژه بڤێ چهندێ دكهت کو نابیت خێزان دودل بن ژ دهستپێكرنا قۆناغا نوی یا خواندنێ، چونكه زۆر جاران دهمێ قوتابی دچیته قۆناغهكا نوو، دودلیا خێزانێ كاریگهریێن خراب لسهر قوتابی پهیداكرینه.
سهردار لهتیف، رێنماكارێ پهروهردهیی د دیدارەکێ دا بۆ رۆژنامەیا ئهڤرۆ دیار كر، دهستپێكرنا سالا نوی یا خواندنێ تنێ گۆهۆڕینا وهرزی نینه، بهرۆڤاژی دهستپێكهكا نویه ژلایێ هزریڤه بۆ قوتابی، ههتا رادهیهكی دگهل دهستپێكرنا سالا نوی یا خواندنێ خێزان تووشی دودلیێ دبن و گۆت؛ چونكه خۆ بهرههڤكرن دڤێت، بتایبهتی ئهگهر خێزانهكێ هژمارهكا قوتابیان تێدا بیت ههر ژ كڕینا جلكان و پێدڤیێن قوتابخانێ بگرە ههتا دگههیته دووماهیێ.
سەردار دیار کر ژی، نهخاسمه ئهگهر د خێزانێ دا قوتابیهك ژ قۆناغهكێ بچیته قۆناغهكا دی، ژبهركو ئهو خێزانه هزر لڤێ چهندێ دكهت ههتا چ ڕادە ئهو قوتابیه دێ دگهل ژینگهها ئهڤێ قۆناغێ یان قوتابخانێ گونجیت و گۆت؛ دودلیا خێزانێ بۆ سالا نوی یا خواندنێ كارهكێ ئاساییه، بهلێ نابیت بگههیته رادهیهكی كاریگهریێ لسهر قوتابی پهیدا بكهت،
سەردار لەتیف د بەردەوامیا ئاخفتنێن حۆدا گۆت؛ چهندین ساله مه ئهزموون ههیه ل قوتابخانێ مخابن هندهك جاران ئهو دودلیا بۆ خێزانێ پهیدا دبیت كاریگهری لسهر قوتابی پهیداكریه و ل ئاستێ قوتابی كێم كریه و گۆت؛ داخوازی لسهر پێدڤیێن قوتابخانێ زۆر بووینه و رهوشا دارایی ژی یا باش نینە، لەورا بارگرانی بۆ خێزانێ پهیداكریه.
رێنماكارێ پهروهردهیی زێدەتر گۆت؛ زۆر جارا مه یێ دیتی قوتابی ل باخچێ زارۆكان دێ چیته قۆناغا بنهڕهتی یانژی قوتابی ل قۆناغا بنهڕهتی دێ چیته ناڤنجی خێزان دودلن ژ هندێ کا زارۆكێ وان چەند دێ یێ سهركهفتی بیت، ئهڤهژی بۆیه ئهگهر قوتابی ل قۆناغا ئێكێ وهك پێدڤی یێ سهركهفتی نهبیت و كاریگهریێن خێزانێ لسهر ههنه.
سهردار ئهو چهنده ژى ديار كر كو كار گههشتیه ڤێ چهندێ قوتابی سالا ئێكێ دهست ژ پرۆسا خواندنێ بهردهت، لهوڕا نابیت دودلیا خێزانێ ژ سنوران دهرباز ببیت داكو نهبیته ئهگهرێ شكهستنا قوتابی ل پرۆسا خواندنێ، بگشتی ئهركێ خێزانێ یه قوتابی بهرههڤ بكهت، بتایبهتی ژلایێ دهروونیڤه بۆ دهستپێكرنا سالا نوویا خواندنێ.
ئهڤی رێنماكارێ پهروهردێ ئاماژه پێ كر، پهروهردە ژ خێزانێ دهێته دهستپێكرن، لەورا دهمێ قوتابی دچیته قوتابخانێ دڤێت ژلایێ سهمیانێن وانڤه چاڤدێری بهێتهكرن و گۆت؛ ههروهسا پێدڤیە پهیوهندی دناڤبهرا سهمیانێن قوتابی و كارگێڕیا قوتابخانێ ههبیت بۆ هندێ دهمێ ئاریشهیهك پهیدا دبیت بهێته كۆنتڕۆلكرن، چونكه خێزان و قوتابی و قوتابخانه تهمامكهرێن ئێكن،
سەردار گۆتژی؛ پهروهردهكرنا زارۆكی پلا ئێكێ ئهركێ خێزانێ یه، بهلێ ل قوتابخانێ و ناڤهندێن ئهكادیمی و زانستی دهێته پێشڤهبرن، ههر تاکەک دناڤا خێزانێ باش بهێته پهروهردهكرن ل قوتابخانێ ژی دێ سهركهڤیت، واته ئاستێ رهوشنبیری یێ خێزانێ رهنگڤهدان لسهر قوتابیێ ئهڤێ خێزانێ ژی ههیه ل قوتابخانێ.
لدۆر گۆهۆڕینا جلكێن قوتابیان، رێنماكارێ پهروهردهیی سهردار لهتیف دا زانین کو گۆهۆڕینا جلكێن قوتابیان پێنگاڤهكا ئهرێنیه، چونكه سالێن بۆری ژبهر رهنگێ جلكان زۆر ئاریشه ههبوون بۆ خێزانێ و دایكێن قوتابیان بهردهوام كار بۆ پاقژ راگرتنا جلكێت زارۆكێت خۆ دكر، بهلێ نوكه رهنگێن جودا و گونجایی هاتینه دیاركرن ژلایێ وهزارهتا پهروهردێ ڤە، ژلایێ ماددی ژیڤە ههتا رادهیهكی بهایێن وان د گونجاینه و گۆت؛ ئهز باوهرم گڤاشتن لسهر قوتابیان ژی ناهێنهكرن لدۆر سیستهمێ ئێك پۆشیێ و وهزارهت و قوتابخانه دێ هاریكاربن.
