دێ چـاوا کـۆنترولا هـزرێن نەرێنی کـەی؟
رۆژانە مێشكێ تە مژویل دبیت ب هزرکرنا ئەرێنی و نەرێنی و ئەڤە تشتەكێ سروشتییە، بەلێ هەکە پتریا دەمی مێشكێ تە ب هزرکرنا نەرێنی مژویل ببیت، ئیش و ئازارێن بۆڕی و نەخۆشی كۆنترۆلا ژیانا تە بكەن، رامانا وێ چەندێیە كو پێدڤییە دەست ژێ بەردەی ب ڤان چەند ڕێكێن ژ لایێ مالپەڕێ tickledthink ڤە هاتینە بەڵاڤكرن:
1. بڕیارێ بدە دەست ژێ بەردەی
بەری هەر تشتەكی بۆ دەستبەردابوونا هەر هزرکرنەکێ، پێدڤییە بڕیارێ بدەی دەست ژێ بەردەی و حەزا تە ل سەر بڕیارا تە بیت، چونکی هەکە تۆ ب خۆ ئەوێ بڕیارێ ژ ناخێ دڵێ خۆ نەدەی، چەند پێنگاڤان ژی بهاڤێژی، چ ئەنجام نابن.
2. هەستێن خۆ دەرببڕە
دەما تو ڕووبەڕووی شكستەتن، ژدەستدان، دڵشكەستن، بێهیڤیێ ئو ئاستەنگان دبی، نەهێلە د ناخێ دڵێ تە دا بمینن، ل دەف هەڤالەكی، خێزانێ یان كەسەكێ جهێ باوەڕییێ بەحس بكە و هەستێن خۆ دیار بكە، ئەڤە ژی هاریکاریا تە دكەت بۆ چێبوونا دەرونی ئو ژبیركرنا وان.
3. یێ لێبووری بە
هەتا تۆ یێ لێبووری نەبی، تۆ نەشێی وێ كین و عاجزیا د ناخێ تە دا ژبیر بكەی، مەرج نینە ئەڤ عاجزی و كینە بەرامبەر كەسێن دی بن، هندەك جاران چێدبیت بەرامبەر خۆ ب خۆ بیت بۆ خەلەتیەكێ كو تە كربیت، پێدڤییە تۆ يێ لێبووری و میهرەبان بی دگەل خۆ، داكو بشێی خەلەتی و كێشەیێن خۆ یێن بۆڕی ژبیر بكەی.
4. سوپاسگوزار بە ئو باشیان ببینە
دەما تۆ د ناڤ سەختیان دا دەرباس دبی، يا ب ساناهیە سەرەنجا تە ل سەر تشتێن نەرێنی بیت، بەلێ دزانی هەکە سەرەنجا تە ل سەر باشیان بیت گەلەک تشت د دەروون ئو مۆڕالا تە دا دێ هێنە گۆهوڕین؟ لەورا بۆ وێ چەندێ رەوش ببنە ئەرێنی، هەردەم باشیێن ژیانا خۆ بژمێرە و سوپاسگوزار بە ل سەر وان.
