ئەڤرۆ زاخۆ و نەورۆز د دو تاقیكرنێن ب هێز دا
قەیس وەیس:
چاڤەڕێ دهێتە كرن ئەڤرۆ پێنج یاریێن مایی ژ هەڤڕكیێن گەڕا شەشێ یا خولا ستێرێن ئیراقێ یا فوتبۆلێ بهێنە كرن، هەردو نوونەرێن پارێزگەها كەركووك و ئیدارا سەربەخوەیا زاخۆ دو یاریێن بهێز هەنە.
زاخۆ پێدڤی ب سێ خالایە
تیما فوتبۆلا یانەیا زاخۆ دێ ل باژێرێ فەلوجە یا پارێزگەها ئەنبار بیتە مێڤانا یانەیا جەولان د تاقیكرنەكا دی دا بۆ كوڕێن خابۆری ئەوا دێ ل دەمژمێر شەشێ ئێڤاری هێتە كرن، تیما زاخۆ د كاودانەكێ هەستیار دا دەرباز دكەت ئەوا ژ پێنج یاریێن بۆری بتنێ سەركەفتنەك هەیی، دو وەكهەڤی و خوسارەتیەك سەرجەمێ خالان گەهاندینە پێنج خال ل ڕێزا 14ێ دهێت، ژلایێ خوەڤە یانەیا جەولان ئاست و ئەنجامێن وێ د باش ئەوا دو سەركەفتن، دو وەكهەڤی و خوسارەتیەك هەیی ڕێزا هەشتێ دهێت ب كۆمكرنا هەشت خالان.
جەماوەر چاڤەڕێ ڤەگەڕیانا سەركەفتنایە
پشتی ئاست و ئەنجامێن لاواز تایبەت خوسارەتییا گران بەرانبەر زەورا ب چار گۆلێن پاقژ و وەكهەڤی ب تاما خوسارەتیێ بەرانبەر تەلەبە ل یاریگەها خوە، جەماوەرێ یانەیا زاخۆ ژ یاریزانان تۆرەیە دناڤا تۆرێن چڤاكی دا پسیار كرینە ئەرێ ئەو گرێبەستێن ملیار دیناران ژ هەژی هەوەبوویە؟ ئەرێ ب دلسۆزە و وەفاداری یاریێ دكەن؟ یارییا ئەڤرۆ جەماوەر چاڤەڕێ سەركەفتنێ یە سەرباری یانەیا مێڤاندار ب سانەهی نابیت.
ڕاهێنەری كارەكێ جودا كرییە
د پرێسكونفرانسێ رۆژنامەڤانی دا یێ قەتەری تەلال ئەلبلۆشی ڕاهێنەرێ تیما یانەیا زاخۆ گۆت: ئەم هەموو دزانین ئاست و ئەنجامێن تیما مە نە دپێشبینیكرینە و دڤێت تیم ڤەگەڕیتە سەركەڤتنان، یارییا بۆری یا پێنجێ بوو د خولێ دا و یا من یا ئێكێ بۆ، هەموو یاریزان خودان شیانن، بۆ ڤێ یاریێ مە پتر كار ل سەر دەرۆنێ یاریزانان كرینە كو بێ گڤاشتن دناڤا یاریگەهێ دا بن، هەروەسان پلانێن باش هاتینە دانان بۆ ب دەستڤە ئینانا ئەنجامێ یاریێ، تیما جەولان جهێ ڕێزێ یە و یاریزانێن باش هەنە، لەوما ژی یاری ب سانەهی نابیت و هەردو یانە دێ هەڤڕكیێ بۆ سێ خالان كەن، هیڤییا من ئەوە دڤێ یاریێ دا دلێ جەماوەرێ زاخۆ خۆشبیت.
نەورۆز چاڤ ل پێشڤەچوونێ یە
ژلایێ خوەڤە تیما یانەیا نەورۆز دێ ناڤ ئەرد و جەماوەرێ خوە دا یانەیا مووسل ل دەمژمێر نەهی شەڤ مێڤان كەت، یانەیا كوردستانی د ڕێزەكا باش دایە ئەوا هەشت خال كۆمكرین ژ ڤەڕێژا دو یاریێن سەركەفتی، دو وەكهەڤی و خوسارەتیەك ل ڕێزا پێنجێ دهێت، ب هەمان خال دا لێ كێمترییا گۆلان یانەیا مووسل ل ڕیزا شەشێ دهێت، ئانكو دێ یارییەكا پڕی هەڤڕكی بیت، ب تنێ فیركا دادڤانی دێ ئەنجامی ئێكلاكەت.
ژ یاریێن دی یێن ئەڤرۆ
تەلەبە- كەرخ، ل دەمژمێر 6:45 بەری مەغرەب.
مینا- نەفت میسان، ل دەمژمێر نەهی شەڤ.
ئەلگەرمە- نەفت، ل دەمژمێر 10ی شەڤ.
